Enfrentando e Desafionan di un Teritorio Úniko

YA PA vários dékada Testigunan di Yehova ta prediká riba e reservashon di indjan navaho, situá den partinan di Arizona, New Mexico i Utah, na Merka. Na idioma navaho, e ta konosí komo Diné Bikeyah (pais di navaho). E mas ku 220.000 indjannan di e nashon ei, ku na nan lenga ta ser yamá diné (e pueblo), ta un di e tribunan mas grandi di indjan norteamerikano.

Durante e añanan ei vários kongregashon di Testigunan di Yehova a keda formá rònt di un núkleo di hende hòmber i muhé navaho ku tabata interesá den Beibel. Aktualmente, tin kuater kongregashon riba e reservashon: na Tuba City, Kayenta, Keams Canyon i Chinle. (Wak e mapa aki bou.) Te ku poko tempu pasá kada un tabatin nan mes Salòn di Reino, ku eksepshon di e kongregashon na Chinle, ku tabatin ku hür lokal di klas pa nan reuní aden. Pero awor e situashon a kambia.

Un Salòn di Reino pa un Teritorio Úniko

Djasabra 7 di yüni 2003, tabata fecha di e dedikashon di e Salòn di Reino di Chinle. E diskurso di dedikashon a keda presentá pa Gerrit Lösch, un miembro di e Kuerpo Gobernante di Testigunan di Yehova. Den su diskurso el a deskribí e gran oumento ku ta tumando lugá mundialmente den e kantidat di Salònnan di Reino. I sin embargo, manera el a splika, ainda falta míles di salòn mas pa sirbi e mas ku 94.600 kongregashonnan. Tambe el a presentá na e 165 personanan presente 15 punto pakiko nan mester apresiá nan Salòn di Reino nobo i e benefisionan di asistí regularmente na reunionnan kristian. El a konkluí ku un orashon di dedikashon, pidiendo Yehova su bendishon riba e uso di e ekselente lugá di reunion aki.

E kongregashon aki anteriormente tabata un grupo ku a asosiá ku Kongregashon Keams Canyon, un 100 kilometer den direkshon zùitwèst. Awor Kongregashon Chinle tin e asignashon di prediká e bon nobo di e Reino di Dios den un teritorio ku ta abarká 11.000 kilometer kuadrá! Hopi navaho ta biba den kas-karavana òf den loke nan ta yama hogan, ku ta kasnan ku tin seis òf ocho banda. Pa yega na lugánan aislá, ta esensial  pa bo tin un vehíkulo four-wheel-drive (esta, ku tur kuater wil ta gara), spesialmente pa yega na e kasnan plamá den Canyon de Chelly (pronunsiá d’Shé), un parti fasinante di e teritorio di e kongregashon.

Canyon de Chelly—Sagrado pa Navaho

E plateaunan haltu di Arizona ta konosí pa nan paisahenan ku espasio inmenso, aparentemente sin final, i ku kareteranan largu ku ta manera disparsé na horizonte. Canyon de Chelly ta djis un par di kilometer for di e Salòn di Reino, riba e mesun karetera. E klof (canyon) ta lora i bira atraves di 40 kilometer di baranka steil ku ta kuminsá ku un haltura di 9 meter i gradualmente ta alkansá 300 meter. E área, apuntá komo monumento nashonal, tur aña ta haña bishita di míles di turista. E pueblo navaho ta konsiderá e klof aki, huntu ku Canyon del Muerto, komo tera sagrado. Algun famia ta biba aki, isolá den nan hogan trahá di palu i lodo. Sin embargo, nan tur ta haña bishita di Testigunan di Yehova, kendenan ta trese literatura bíbliko pa nan den nan propio idioma.

Pa drenta e klof, bo mester ta kompañá pa un guia navaho outorisá. Algun bishitante ta pasa dor di dje na pia, i otronan ta bai riba kabai; pero mayoria bishitante ta krusa e klof den vehíkulo four-wheel-drive. E tipo di vehíkulonan aki ta nesesario pasobra e kaminda hopi bes ta krusa dor di Chinle Wash, ku ta fondo di un riu ku ta yena ku awa segun temporada. Tambe e  guianan sa kon pa evitá drijfzand ku de bes en kuando ta traga un kabai òf un pikòp. Pero kiko ta hasi Canyon de Chelly asina interesante?

E historia di e klof ta skirbí riba muraya di e barankanan steil, sea pintá òf grabá riba piedra. Arkeólogonan ta kere ku e famoso habitashonnan den e barankanan steil, konstruí den kuebanan habrí grandi, a ser trahá entre aña 350 i 1300 di nos era. Podisé esun di mas famoso ta Ruina di Kas Blanku, ku nan ta yama asina debí na e muraya blanku di un di e edifisionan. El a ser bandoná dor di e pueblo anasazi (nòmber navaho pa “enemigu bieu”) rònt di aña 1300. Ekspertonan ta kere ku ta te den siglo 18 numa indjannan navaho a drenta e region aki.

Si bo bishitá Canyon de Chelly, lo bo kore riba karetera Navaho Route 7. Einan, den un bògt di e karetera djis promé ku e Monumento Nashonal, paga tinu i lo bo mira skirbí riba un muraya “Jiihōvah Yádahalne’í bi Kingdom Hall” i “Kingdom Hall of Jehovah’s Witnesses” (Salòn di Reino di Testigunan di Yehova). Bo ta bonbiní pa para i hasi un bishita.

[Mapanan na página 20]

(Pa e teksto den su formato kompleto, wak e publikashon)

COLORADO

NASHON NAVAHO

ARIZONA

MONUMENTO NASHONAL DI CANYON DE CHELLY

Chinle

Kayenta

Tuba City

NASHON HOPI

Keams Canyon

NEW MEXICO

UTAH

[Plachi na página 21]

Arkeólogonan ta bisa ku podisé un dozein di famia anasazi a biba den e kas den baranka aki

[Plachi na página 22]

Hogan

[Plachi na página 22]

Canyon del Muerto

[Plachi na página 22]

Spider Rock na Canyon de Chelly