E Misterio dje Para di Yonchi di Gran Bretania

DJE CORESPONSAL DI SPIERTA! NA GRAN BRETANIA

NA Gran Bretania, e para di Yonchi, presente tur caminda cu su chip-chip bon conocí, pa hopi tempu ta un bista comun dje paisahe británico. Pero awor e ta disparciendo—hopi bes di ripiente—for di áreanan urbano, i niun hende no sa di con. E korant Independent di Londen ta ofrecé un premio di 5.000 libra esterlina (13.000 florin) pa e promé publicacion científico di ken cu por solucioná e misterio. E Sociedad Real pa Proteccion di Para i e Instituto Británico di Ornitologia lo sirbi como hurado. Nan ta verwagt cu e proyecto lo tuma por lo ménos dos aña pa e keda completá.

Encuestanan ta revelá cu pueblitonan i stadnan rond e pais a sufri di un caida catastrófico den e cantidad di paranan di Yonchi. Den algun área, nan a disparcé por completo. Sin embargo, den otro stadnan europeo, manera Paris i Madrid, ainda tin yen di para di Yonchi. Dr. Denis Summer-Smith, experto mundial riba tereno di para di Yonchi, ta bisa: ‘Esaki ta un dje misterionan di bida den naturalesa mas remarcabel dje último 50 añanan.’

Hende ta kere cu e caida di 65 porciento den poblacion di para di Yonchi den áreanan rural ta debí pa gran parti na cultivacion intensivo di cunucu. Poblacion di otro sorto di paranan tambe a mengua hopi den áreanan rural. Pero esaki no ta splica e bahada di 92 porciento den cantidad di para di Yonchi den áreanan urbano. Defensor di medio ambiente, Michael McCarthy, ta concluí cu e desaparicion dramático dje para di Yonchi “ta un indicacion sigur cu algu a bai hopi robes den e ecosistema di para di Yonchi—i podisé den esun di nos tambe.” Awor no a keda nada otro sino pa wak kico precis a bai robes i con serio e ta.