E Goso di Hiba un Bida Simpel
DANIEL KU MIRIAM a kasa na sèptèmber 2000 i a bai biba den e stat di Barcelona, Spaña. Daniel ta konta: “Nos tabatin loke bo por yama un bida normal . . . Nos tabata gana sufisiente ku nos por a kome na restorantnan eksklusivo, bai di biahe i kumpra paña di bon kalidat. Ademas, nos tabata bai sirbishi regularmente.” Pero algu a kambia.
Daniel a keda masha konmoví ora el a skucha un diskurso na un kongreso na 2006 ku a lanta e pregunta: “Nos ta hasiendo tur loke nos por pa yuda hende ku ‘ta kore peliger di wòrdu matá’ pa subi riba e kaminda ku ta hiba na bida eterno?” (Pro. 24:11) E diskurso a enfatisá nos responsabilidat di kompartí e mensahe di Beibel ku ta salba bida. (Echo. 20:26, 27) Daniel ta kòrda: “Mi a sinti komo si fuera ku ta ku mi Yehova tabata papia.” E diskurso a menshoná tambe ku ora un ruman amplia su sirbishi, e ta haña mas goso. Daniel tabata sa ku esei ta bèrdat. Miriam a kuminsá traha pionero kaba i tabata haña hopi bendishon i goso.
Daniel a bisa: “Mi a konkluí ku tabata tempu pa dal un buèlta di 180 grado.” I esei ta loke el a hasi. El a baha su oranan di trabou, a kuminsá traha pionero i a pensa riba e goso ku e ku Miriam por haña ora nan muda bai otro lugá kaminda tin mester di mas predikadó di Reino.
DESPUES DI UN RETO A BINI UN NOTISIA EMOSHONANTE
Na mei 2007, Daniel ku Miriam a kita for di trabou i a bai Panamá, un pais ku nan a yega di bishita kaba. Nan teritorio nobo tabata konsistí di e vários islanan den e grupo di isla ku yama Bocas del Toro den Laman Karibe, kaminda e indígenanan ngabe ta biba. Daniel ku Miriam a pensa ku nan por a keda mas o ménos ocho luna na Panamá ku e sèn ku nan a spar.
Nan tabata biaha ku boto i baiskel, i nan ta kòrda bon bon kon nan promé biahe riba baiskel tabata. Nan mester a kore rònt di 32 kilometer riba seru steil den un higra di solo. Kasi Daniel a kai flou di kansansio. Pero e famianan ngabe ku nan a topa na kaminda a risibí nan hospitalariamente, foral ora Daniel ku Miriam a siña algun palabra di e idioma lokal. No a tarda muchu ku nan a kuminsá dirigí 23 estudio di Beibel.
Pero ora nan sèn di spar a kaba, nan goso a bira tristesa. Daniel ta kòrda: “Ku awa na wowo nos a kuminsá pensa pa bai Spaña bèk. Nos tabata asina tristu pa bai laga nos studiantenan di Beibel.” Pero, despues di un luna nan a haña un notisia emoshonante. Miriam a bisa: “Nos a haña invitashon pa sirbi komo pionero spesial. Ki un goso tabata ku nos por a keda den nos asignashon!”
NAN GOSO DI MAS GRANDI
Na 2015, komo resultado di algun ahuste ku e organisashon a hasi, nan a bisa Daniel ku Miriam pa sigui nan sirbishi komo pionero regular. Kiko nan lo a hasi? Nan a konfia den e promesa ku tin na Salmo 37:5, NW: “Laga bo kaminda den man di Yehova, i dependé riba dje, i e mes lo aktua na bo fabor.” Nan a haña trabou pa kubri nan gastunan, i awe nan ta sirbi den un kongregashon den e provinsia di Veraguas, Panamá.
Daniel ta konta: “Promé ku nos a muda bai for di Spaña, nos no tabatin sigur ku nos por a hiba un bida simpel. Awe nos ta hibando un bida simpel i nos no tin falta di nada.” Kiko ta nan goso di mas grandi? Nan ta kontestá: “E goso di yuda hende humilde siña tokante Yehova ta inkomparabel!”