1, 2. а) Хуыцаумӕ кувын нӕхицӕн стыр кадыл цӕмӕн хъуамӕ нымайӕм? ӕ) Хуыцаумӕ кувын куыд хъӕуы, уый тыххӕй Библи цы дзуры, уый зонын нӕ ӕнӕмӕнг цӕмӕн хъӕуы?

ЗӔХХ ӕнӕкӕрон Дун-дунеимӕ куы абарай, уӕд тынг гыццыл у. «Арв ӕмӕ зӕхх Скӕнӕг» Хуыцау Йегъовӕйы цӕсты ӕнӕхъӕн адӕмтӕ ведрайы иу ӕртахӕй уӕлдай не сты (Псалом 115:15; Исай 40:15). Фӕлӕ уӕддӕр Библи зӕгъы: «Йегъовӕ хӕстӕг у, чи йӕм кувы, уыдонмӕ, рӕстдзинадмӕ гӕсгӕ йӕм чи кувы, уыдонмӕ се ’ппӕтмӕ дӕр. Уый сӕххӕст кӕндзӕн, чи дзы тӕрсы, уыдонӕн сӕ зӕрдӕйы фӕндон. Фехъусдзӕн сын сӕ дзыназын» (Псалом 145:18, 19). Ахъуыды-ма кӕн, Дунесфӕлдисӕг Ӕппӕтхъомысджын Хуыцау хӕстӕг у махӕй алкӕмӕ дӕр, ӕмӕ йӕм «рӕстдзинадмӕ гӕсгӕ» куы кувӕм, уӕд нӕ хъусдзӕн. Хуыцауимӕ ныхас кӕныны фадат дын кӕй ис, уымӕй стырдӕр кад ма цы хъуамӕ уа!

² Фӕлӕ нын цӕмӕй Йегъовӕ нӕ куывдтытӕ хъуса, уый тыххӕй йӕм хъуамӕ кувӕм, йӕхӕдӕг нын куыд амоны, афтӕ. Ӕмӕ уый тыххӕй та Библийы куы нӕ бакӕсӕм, уӕд ӕй кӕцӕй базондзыстӕм? Уӕдӕ Хуыцаумӕ кувын куыд хъӕуы, уый тыххӕй Библи цы дзуры, уый зонын ӕнӕмӕнг хъӕуы, уымӕн ӕмӕ Йегъовӕмӕ куы кувӕм, уӕд ӕм уый фӕрцы ӕввахсдӕр кӕндзыстӕм.

3. Йегъовӕмӕ сӕйраджыдӕр цӕмӕн хъуамӕ кувӕм?

³ Йегъовӕмӕ сӕйраджыдӕр уый тыххӕй хъуамӕ кувӕм, ӕмӕ нӕ уымӕ йӕхӕдӕг разӕнгард кӕны. Йӕ Ныхасы фыст ис: «Мӕт мацӕуыл кӕнут, фӕлӕ алы уавӕры дӕр Хуыцаумӕ кувут, лӕгъстӕ йын кӕнут, бузныг ын дзурут ӕмӕ дзы афтӕмӕй курут, цы уӕ хъӕуы, уый. Ӕмӕ уын Хуыцауы фарн, зонд кӕуыл не ’ххӕссы, уыцы фарн, Йесо Чырыстийы фӕрцы бахъахъхъӕндзӕн уӕ зӕрдӕтӕ ӕмӕ уӕ зонд» (Филиппӕгтӕм 4:6, 7). Дунедарӕг Стыр Хуыцау нын йӕхӕдӕг дӕтты ахӕм диссаджы фадат, ӕмӕ йӕм уӕдӕ куыннӕ хъуамӕ кувӕм!

4. Цӕмӕн ис зӕгъӕн, ӕмӕ Йегъовӕмӕ алы бон дӕр куы кувӕм, уӕд ӕм ӕввахсӕй-ӕввахсдӕр кӕндзыстӕм?

⁴ Стӕй Йегъовӕмӕ алы бон дӕр куы кувӕм, уӕд ӕм ӕввахсдӕр кӕндзыстӕм. Хорз ӕмбӕлттӕ кӕрӕдзиимӕ, искӕй сӕ исты куы бахъӕуы, ӕрмӕст уӕд нӕ фӕныхас кӕнынц. Уыдон ӕдзухдӕр фӕхъуыды кӕнынц сӕ кӕрӕдзийыл ӕмӕ кӕрӕдзийӕн сӕ хъуыдытӕ, сӕ мӕт, сӕ цин ӕмӕ сӕ сагъӕстӕ ӕргом фӕдзурынц. Ӕмӕ уый фӕрцы сӕ хӕлардзинад тыхджынӕй-тыхджындӕр фӕкӕны. Зӕгъӕн ис, ӕмӕ Йегъовӕ дӕр нӕ Хӕлар афтӕ свӕййы. Библи  ахуыр кӕнгӕйӕ ды бирӕ цыдӕртӕ базыдтай, Йегъовӕ чи у, цавӕр миниуджытӕ йӕм ис ӕмӕ йӕм цавӕр фӕндтӕ ис, уый тыххӕй. Уый фӕрцы бамбӕрстай, Йегъовӕ удӕгас Хуыцау кӕй у. Ӕмӕ дын ахӕм фадат кӕй ис, цӕмӕй йӕм кувай, уый фӕрцы йын дӕ бон у, цы хъуыды кӕныс ӕмӕ дӕ зӕрдӕйы цы ис, уый ӕргом дзурын. Уӕдӕ дӕ уӕларвон Фыд Йегъовӕмӕ алы бон дӕр куы кувай, уӕд ӕм ӕввахсӕй-ӕввахсдӕр кӕндзынӕ (Иаковы 4:8).

5. Йегъовӕ алкӕй куывдтытӕ кӕй нӕ хъусы, уый кӕцӕй зонӕм?

⁵ Цымӕ Йегъовӕ алкӕй куывдтытӕ дӕр хъусы? Ӕркӕс-ма, пехуымпар Исайы рӕстӕджы хивӕнд израилӕгтӕн цы загъта, уымӕ: «Цасфӕнды мӕм ма куват – нӕ уӕм хъусын. Сымахӕн уӕ къухтӕ тугӕйдзаг сты» (Исай 1:15). Куыд уынӕм, афтӕмӕй Хуыцау нӕ хъусы, ӕвзӕр хъуыддӕгтӕ чи аразы, уыдоны куывдтытӕ. Уӕдӕ нын цӕмӕй Хуыцау нӕ куывдтытӕ ӕхсызгонӕй хъуса, уый тыххӕй хъуамӕ кӕнӕм, цы нӕ домы, уый.

6. а) Цӕмӕй нын Хуыцау нӕ куывдтытӕ хъуса, уый тыххӕй нӕм фыццаджыдӕр цы хъуамӕ уа? ӕ) Уырнындзинад нӕм кӕй ис, уый цӕмӕй бӕрӕг уыдзӕн?

⁶ Фыццаджыдӕр нӕм хъуамӕ уа уырнындзинад (Марчы 11:24). Апостол Павел фыста: «Ӕнӕ уырнындзинадӕй... Хуыцауы зӕрдӕ барухс кӕнӕн нӕй, уымӕн ӕмӕ Хуыцауӕн кувӕг адӕймаджы хъуамӕ уырна, Хуыцау кӕй ис ӕмӕ йӕ зӕрдиагӕй чи агуры, уыдонӕн кӕй арфӕ кӕны» (Дзуттӕгтӕм 11:6). Ӕцӕг уырнындзинад ӕрмӕст уый нӕу, ӕмӕ, Хуыцау кӕй ис ӕмӕ адӕмы куывдтытӕ кӕй хъусы ӕмӕ сын дзуапп кӕй дӕтты, уый зонай. Нӕ уырнындзинад хъуамӕ бӕрӕг уа, алы бон дӕр нӕ цард куыд аразӕм, уымӕй (Иаковы 2:26).

7. а) Йегъовӕимӕ уӕзданӕй цӕмӕн хъуамӕ ныхас кӕнӕм? ӕ) Хуыцаумӕ кувгӕйӕ нӕ бон куыд у равдисын, сӕрныллӕг кӕй стӕм ӕмӕ йемӕ зӕрдӕбынӕй кӕй ныхас кӕнӕм, уый?

⁷ Йегъовӕйы ма фӕнды, цӕмӕй йӕм сӕрныллӕгӕй ӕмӕ  зӕрдиагӕй кувӕм. Ӕмӕ ӕцӕгдӕр, Йегъовӕимӕ ныхас кӕнгӕйӕ сӕрныллӕг куыннӕ хъуамӕ уӕм! Адӕймаг ма паддзахмӕ кӕнӕ президентмӕ куы бацӕуы, уӕд дӕр ма йемӕ уыцы уӕзданӕй куы фӕныхас кӕны – фембары йӕ, хицау цы стыр бынат ахсы, уый. Ӕмӕ уӕд Йегъовӕимӕ та куыд уӕзданӕй хъуамӕ ныхас кӕнӕм! (Псалом 138:6). Ахъуыды-ма кӕн, уый у «Ӕппӕтхъомысджын Хуыцау» (Райдиан 17:1). Уӕдӕ йӕм куы фӕкувӕм, уӕд хъуамӕ уӕм сӕрныллӕг ӕмӕ ӕмбарӕм, уый чи у ӕмӕ мах та чи стӕм. Сӕрныллӕг куы уӕм, уӕд ма нын уый ӕххуыс кӕндзӕн, цӕмӕй йӕм зӕрдӕбынӕй кувӕм ӕмӕ уыцы иу ныхӕстӕ ма дзурӕм (Матфейы 6:7, 8).

8. Кӕд уыдзӕн зӕгъӕн, ӕмӕ нӕ куывдтытӕм гӕсгӕ архайӕм?

⁸ Цӕмӕй нын Хуыцау нӕ куывдтытӕ хъуса, уый тыххӕй хъуамӕ нӕ куывдтытӕм гӕсгӕ архайгӕ дӕр кӕнӕм. Йегъовӕйӕ исты куы курӕм, уӕд хъуамӕ нӕхӕдӕг дӕр, нӕхицӕй цы кӕнгӕ у, уый аразӕм. Зӕгъӕм, куы йӕм кувӕм, «ратт нын къӕбӕр абоны фаг», зӕгъгӕ, уӕд хъуамӕ нӕхи фӕдарыны тыххӕй цыфӕнды уӕззау куыст дӕр нӕ сӕрмӕ хӕссӕм (Матфейы 6:11; 2 Фессалоникӕгтӕм 3:10). Цыдӕр ӕвзӕр миниуӕгӕй фервӕзын нӕ куы фӕнда ӕмӕ дзы ӕххуыс куы курӕм, уӕд та хъуамӕ нӕхи хизӕм, фӕрӕдийынӕй нын тӕссаг кӕм у, ахӕм уавӕртӕй (Колоссӕгтӕм 3:5). Фӕлӕ ма ацы сӕйраг домӕнтӕй уӕлдай, кувын куыд хъӕуы, уый фӕдыл фӕзыны ӕндӕр фарстатӕ дӕр.

9. Кувын кӕмӕ хъӕуы ӕмӕ кӕй номӕй?

⁹ Кувын кӕмӕ хъӕуы? Чырысти йӕ фӕдылдзӕуджытӕн амыдта, афтӕ кувут, «нӕ уӕларвон Фыд», зӕгъгӕ (Матфейы 6:9). Уӕдӕ кувын хъӕуы ӕрмӕстдӕр Йегъовӕ Хуыцаумӕ. Фӕлӕ Йегъовӕйы фӕнды, цӕмӕй йын йӕ иунӕг Фырт Йесо Чырыстийы дӕр нымайӕм. Хуыцау Йесойы зӕхмӕ рарвыста, цӕмӕй йӕ цард мах тыххӕй радтаид ӕмӕ нӕ тӕригъӕд ӕмӕ мӕлӕтӕй балхӕдтаид (Иоанны 3:16; Ромӕгтӕм 5:12). Ныртӕккӕ уый у Хуыцауы ӕвӕрд Хистӕр сауджын ӕмӕ Тӕрхонгӕнӕг (Иоанны 5:22; Дзуттӕгтӕм  6:20). Уымӕ гӕсгӕ нын Библи амоны, цӕмӕй Хуыцаумӕ Чырыстийы номӕй кувӕм. Йесо йӕхӕдӕг загъта: «Ӕз дӕн фӕндаг, рӕстдзинад ӕмӕ цард. Мӕ Фыдмӕ мӕн уылты йеддӕмӕ ӕрцӕуӕн никӕуылты ис» (Иоанны 14:6). Уӕдӕ нын цӕмӕй Хуыцау нӕ куывдтытӕ хъуса, уый тыххӕй хъуамӕ кувӕм ӕрмӕстдӕр Йегъовӕмӕ йӕ Фырты номӕй.

10. Лӕугӕйӕ кувӕм ӕви бадгӕйӕ, уый сӕйраг цӕуылнӕ у?

¹⁰ Хуыцаумӕ лӕугӕйӕ хъӕуы кувын, бадгӕйӕ ӕви ӕндӕр искуыд? Лӕугӕйӕ кувӕм ӕви бадгӕйӕ, Йегъовӕ уымӕ нӕ кӕсы. Библи куыд ӕвдисы, афтӕмӕй кувӕн ис бадгӕйӕ дӕр ӕмӕ лӕугӕйӕ дӕр. Нӕ бон ма у нӕ сӕр ӕркъул кӕнын кӕнӕ нӕ зонгуытыл ӕрлӕууын ӕмӕ афтӕмӕй кувын дӕр (1 Азфыстыты 17:16; Нееми 8:6; Данел 6:10; Марчы 11:25). Иннӕтӕ нӕ лӕугӕйӕ феной кувгӕ ӕви бадгӕйӕ, уый сӕйраг нӕу – сӕйраг у, цы зӕрдӕйӕ кувӕм, уый. Ӕрвылбоны хъуыддӕгтӕ кӕнгӕйӕ кӕнӕ тыхст уавӕры бахаугӕйӕ нӕ бон у нӕхинымӕр скувын дӕр. Чи зоны, кувгӕ кӕй кӕнӕм, уый нӕ алыварс ӕмбаргӕ дӕр мачи бакӕна, фӕлӕ нӕ Йегъовӕ фехъусдзӕн (Нееми 2:1–6).

11. Цӕй тыххӕй ис кувӕн?

¹¹ Цӕй тыххӕй ис кувӕн? Библи нын ӕмбарын кӕны: «Мах ӕй фидарӕй зонӕм, ӕмӕ Хуыцауӕй йӕ фӕндонмӕ гӕсгӕ цыфӕнды ма ракурӕм,– хъусы нӕ» (1 Иоанны 5:14). Уӕдӕ кувӕн ис, Хуыцауы фӕндонмӕ гӕсгӕ раст цыдӕриддӕр у, уый тыххӕй. Цӕуыл тыхсӕм ӕмӕ нын ӕнцой цы нӕ дӕтты, уыдӕтты тыххӕй дӕр ӕм ис кувӕн? Ӕнӕмӕнгӕй! Йегъовӕмӕ кувын у, мӕнӕ дӕ хорз ӕмбалимӕ куыд ныхас кӕнай, раст афтӕ. Нӕ бон у, ӕмӕ йын алцыдӕр дзурӕм, «нӕ зӕрдӕтӕ йын ӕргом кӕнӕм» (Псалом 62:8). Хуыцауӕй ма нӕ бон у йӕ сыгъдӕг тых курын дӕр, цӕмӕй нын, раст цы у, уый аразынӕн ӕххуыс кӕна (Лукайы 11:13). Уымӕй уӕлдай ма нӕ исты хъуыддаг аскъуыддзаг кӕнын куы хъӕуа, уӕд дзы нӕ бон у зонд курын, зын уавӕрты бахаугӕйӕ та – хъарутӕ, цӕмӕй фидар фӕлӕууӕм (Иаковы 1:5). Куы фӕрӕдийӕм, уӕд та-иу дзы хатыр ракурӕм, Чырысти нӕ тӕригъӕдты тыххӕй йӕ туг кӕй  ныккалдта, уый номӕй (Ефесӕгтӕм 1:3, 7). Фӕлӕ ма кувӕн ис иннӕты тыххӕй дӕр, зӕгъӕм, нӕ бинонты ӕмӕ не ’муырнджыты тыххӕй (Хъуыддӕгтӕ 12:5; Колоссӕгтӕм 4:12).

12. Сӕйраджыдӕр Хуыцауыл кӕй хъуыды кӕнӕм, уый нӕ куывдтытӕй бӕрӕг куыд уыдзӕн?

¹² Фӕлӕ нын кувгӕйӕ сӕйрагдӕр хъуамӕ уой Йегъовӕимӕ баст хъуыддӕгтӕ. Хъуамӕ йӕ ӕппӕт зӕрдӕйӕ кадджын кӕнӕм ӕмӕ йын йӕ хорздзинӕдты тыххӕй бузныг дзурӕм (1 Азфыстыты 29:10–13). Матфейы 6:9–13 стихты фыст ис, Чырысти йӕ ахуыргӕнинӕгты кувын куыд ахуыр кодта, уый тыххӕй. Фыццаг уал загъта, Хуыцаумӕ кӕй хъуамӕ кувӕм, цӕмӕй йӕ ном срухс уа. Уый фӕстӕ загъта, цӕмӕй кувӕм, ӕрцӕуӕд дӕ Паддзахад ӕмӕ дӕ фӕндон уӕлӕрвты куыд ис, афтӕ уӕд зӕххыл дӕр, зӕгъгӕ. Йесо ӕрмӕстдӕр уыцы ахсджиаг хъуыддӕгты фӕстӕ загъта, адӕймагӕн йӕхи цы хъӕуы ӕмӕ цӕуыл тыхсы, уыдӕтты тыххӕй. Мах дӕр афтӕ куы кувӕм, уӕд уымӕй бӕрӕг уыдзӕн, ӕрмӕст нӕхи мӕт кӕй нӕ кӕнӕм.

13. Цас хъуамӕ кувӕм, уый тыххӕй Библийы цы фыст ис?

¹³ Цас рӕстӕг хъуамӕ кувӕм? Нӕхӕдӕг иунӕгӕй кувӕм ӕви иннӕты номӕй,– Библийы ницы ис фыст, цас рӕстӕг хъуамӕ кувӕм, уый тыххӕй. Зӕгъӕм, хӕрды размӕ нӕ бон у Йегъовӕйӕн дыууӕ ныхасӕй бузныг зӕгъын. Нӕ бон ма у иунӕгӕй цалдӕр сахаты дӕр фӕкувын ӕмӕ йын, нӕ зӕрдӕйы цыдӕриддӕр ис, уый радзурын (1 Самуилы 1:12, 15). Фӕлӕ Библийы фыст ис, йӕхи цӕсты рӕстгӕнӕг чи уыд ӕмӕ иннӕты цӕстмӕ бирӕ чи куывта, уыдонӕн Йесо кӕй бауайдзӕф кодта (Лукайы 20:46, 47). Йегъовӕйы ахӕм куывдтытӕй дисы нӕ бафтаудзыстӕм. Хуыцауӕн сӕйраг у, цӕмӕй йӕм зӕрдӕбынӕй кувӕм. Уӕдӕ цас кувдзыстӕм, уый аразгӕ у уавӕртӕй ӕмӕ нӕ цӕй тыххӕй фӕнды кувын, уымӕй.

14. Библийы фыст ныхӕстӕ, «ӕдзухдӕр кувут», зӕгъгӕ, куыд ӕмбарын хъӕуы ӕмӕ нӕ уый ныфс куыд уадзы?

¹⁴ Бон цал хатты хъӕуы кувын? Библийы фыст ис, «ӕппынӕдзух кувут», зӕгъгӕ (Матфейы 26:41; Ромӕгтӕм 12:12;  1 Фессалоникӕгтӕм 5:17). Кӕй зӕгъын ӕй хъӕуы, ацы ныхӕстӕ афтӕ ӕмбарын нӕ хъӕуы, ӕмӕ хъуамӕ алы минут дӕр кувгӕ кӕнӕм. Библи нӕ уымӕ разӕнгард кӕны, цӕмӕй Йегъовӕйӕн йӕ хорздзинӕдты тыххӕй алкӕддӕр арфӕ кӕнӕм ӕмӕ дзы зонд, хъарутӕ ӕмӕ удӕнцой курӕм. Йегъовӕимӕ нӕ бон кӕдфӕнды дӕр ӕмӕ цасфӕнды дӕр кӕй у ныхас кӕнын, уый нӕ ныфс нӕ уадзы? Нӕ уӕларвон Фыдмӕ кувын цы стыр кад у, уый куы ӕмбарӕм, уӕд-иу йемӕ аныхас кӕнынӕн бирӕ фадӕттӕ ссардзыстӕм.

15. Куывды фӕстӕ «аммен» зӕгъын цӕмӕн фӕхъӕуы?

¹⁵ Куывды фӕстӕ «аммен» дзурын цӕмӕн хъӕуы? Дзырд «аммен» нысан кӕны «раст у» кӕнӕ «афтӕ уӕд». Библи нын ӕвдисы, адӕймаг иунӕгӕй йе та иннӕты номӕй куы скува, уӕд «аммен» зӕгъын кӕй ӕмбӕлы (1 Азфыстыты 16:36; Псалом 41:13). Хуыцаумӕ нӕхӕдӕг куы скувӕм ӕмӕ уый фӕстӕ «аммен» куы фӕзӕгъӕм, уӕд уый ууыл дзурӕг вӕййы, ӕмӕ нӕ ныхӕстӕ зӕрдӕйӕ цӕуынц. Ӕндӕр исчи куы скувы нӕ номӕй, уӕд та, «аммен» нӕхинымӕр зӕгъӕм ӕви хъӕрӕй,– уымӕй равдисӕм, цы загъта, ууыл разы кӕй стӕм (1 Коринфӕгтӕм 14:16).

16. Цӕмӕн ис фидарӕй зӕгъӕн, ӕмӕ нын Йегъовӕ нӕ куывдтытӕн дзуапп дӕтты?

¹⁶ Йегъовӕ нын нӕ куывдтытӕн ӕцӕгдӕр ратты дзуапп? Йегъовӕ у, «куывдтытӕ чи хъусы, уыцы Хуыцау», ӕмӕ фидарӕй зӕгъӕн ис, милуангай сыгъдӕгзӕрдӕ адӕймӕгты куывдтытӕ кӕй хъусы ӕмӕ сын дзуапп дӕр кӕй дӕтты (Псалом 65:2). Йегъовӕ нын нӕ куывдтытӕн дзуапп ратты алыхуызӕтты.

17. Хуыцау нын нӕ куывдтытӕн дзуапп йӕ зӕдты ӕмӕ йӕ зӕххон лӕггадгӕнджыты фӕрцы кӕй ратты, уый цӕмӕй бӕрӕг у?

¹⁷ Цӕмӕй нын Йегъовӕ нӕ куывдтытӕн дзуапп радта, уый тыххӕй нӕм ӕххуысмӕ рарвиты йӕ зӕдты ӕмӕ йӕ зӕххон лӕггадгӕнджыты (Дзуттӕгтӕм 1:13, 14). Арӕх вӕййы афтӕ, ӕмӕ адӕймаг Хуыцаумӕ куывта, цӕмӕй йын раст фӕндаг  ссарынӕн баххуыс кӕна, ӕмӕ бирӕ нӕ рацӕуы, афтӕ Йегъовӕйы лӕггадгӕнджытыл сӕмбӕлы. Ахӕм хабӕрттӕ ӕвдисынц, Хуыцауы лӕггадгӕнджытӕ хорз хабар куы фӕхъусын кӕнынц, уӕд сын зӕдтӕ кӕй феххуыс кӕнынц (Раргомад 14:6). Йегъовӕмӕ тыхст уавӕры куы фӕкувӕм, уӕд та арӕх не ’муырнджыты сразӕнгард кӕны, цӕмӕй нӕ фарсмӕ ӕрбалӕууой (Ӕмбисӕндтӕ 12:25; Иаковы 2:16).

18. Йегъовӕ йӕ лӕггадгӕнджыты куывдтытӕн йӕ сыгъдӕг тых ӕмӕ йӕ Ныхасы фӕрцы дзуапп куыд дӕтты?

¹⁸ Йегъовӕ ма йӕ лӕггадгӕнджыты куывдтытӕн дзуапп  ратты йӕ сыгъдӕг тых ӕмӕ йӕ Ныхас Библийы фӕрцы дӕр. Фӕлварӕнты куы бахауӕм ӕмӕ дзы ӕххуыс куы фӕкурӕм, уӕд нын йӕ сыгъдӕг тыхы фӕрцы бацамоны, куыд бакӕнын нӕ хъӕуы, уый ӕмӕ ма нын нӕ хъарутыл хъарутӕ дӕр бафтауы (2 Коринфӕгтӕм 4:7). Арӕх ма нын нӕ куывдтытӕн дзуапп ратты Библийы фӕрцы дӕр. Библи куы фӕахуыр кӕнӕм ӕмӕ йӕ чи ӕмбарын кӕны, уыцы литературӕ куы фӕкӕсӕм, зӕгъӕм, мӕнӕ ацы чиныг, уӕд дзы ссарӕм, нӕ уавӕры нын стыр ӕххуыс чи фӕвӕййы, ахӕм стихтӕ. Хуыцауы Ныхасӕй ма хъӕугӕ хъуыдытӕ фехъусӕм ӕмбырды дӕр кӕнӕ, хистӕр нӕлгоймӕгтӕй искӕимӕ куы аныхас кӕнӕм, уӕд (Галатӕгтӕм 6:1).

19. Афтӕ нӕм куы кӕса, ӕмӕ нын Йегъовӕ нӕ куывдтытӕн дзуапп нӕ дӕтты, уӕд нӕ зӕрдыл цы хъуамӕ дарӕм?

¹⁹ Кӕд нӕм иуӕй-иу хатт афтӕ фӕкӕсы, ӕмӕ нын Йегъовӕ нӕ куывдтытӕн дзуапп нӕ дӕтты, уӕд афтӕ макуы ахъуыды кӕнӕм, ӕмӕ нын йӕ бон баххуыс кӕнын нӕу. Алкӕддӕр нӕ зӕрдыл дарӕм, Йегъовӕйӕн алцӕмӕн дӕр йӕхи рӕстӕг кӕй ис. Йегъовӕ махӕй хуыздӕр зоны, цӕуыл тыхсӕм ӕмӕ нын куыд ис баххуыс кӕнӕн, уый. Арӕх нӕ фӕхъӕуы цасдӕр рӕстӕг курын, агурын ӕмӕ хойын (Лукайы 11:5–10). Уымӕй рабӕрӕг вӕййы, цы дзы курӕм, уый дзы ӕцӕгдӕр зӕрдиагӕй курӕм ӕмӕ нӕ кӕй фехъусдзӕн, уый нӕ фидарӕй уырны ӕви нӕ. Вӕййы  ма афтӕ дӕр, ӕмӕ нын Йегъовӕ нӕ куывдтытӕн дзуапп ратты, мах ӕнхъӕл куыд нӕ вӕййӕм, афтӕ. Зӕгъӕм, фӕлварӕны бахаудыстӕм ӕмӕ йӕм кувӕм, цӕмӕй нӕ фервӕзын кӕна, уӕд, чи зоны, уыцы зындзинад ма аиуварс кӕна, фӕлӕ нын фидар фӕлӕууынӕн хъарутӕ ратта (Филиппӕгтӕм 4:13).

20. Йегъовӕмӕ нӕ ӕдзухдӕр цӕмӕн хъӕуы кувын?

²⁰ Куыд федтам, афтӕмӕй ӕнӕкӕрон Дун-дуне Сфӕлдисӕг хӕстӕг у, раст ӕм чи кувы, уыдонӕй алкӕмӕ дӕр. Ӕмӕ дзы уый тыххӕй бузныг куыннӕ хъуамӕ уӕм! (Псалом 145:18). Нӕ зӕрдыл дарӕм, Хуыцаумӕ кувыны фадат нын кӕй ис, уый стыр кад кӕй у, ӕмӕ йӕм ӕдзухдӕр кувӕм. Афтӕмӕй ӕввахсӕй-ӕввахсдӕр кӕндзыстӕм Йегъовӕмӕ, куывдтытӕ чи хъусы, уыцы Хуыцаумӕ.