Библийы фыст ис, адӕм алойӕ кӕй пайда кодтой, цӕмӕй сӕ дзаумӕттӕ ӕмӕ сӕ хуыссӕнтӕ хорз тӕф кодтаиккой (Псалом 45:8; Ӕмбисӕндтӕ 7:17; Соломоны зарӕг 4:14). Библийы цы алойы кой ис, уый, ӕвӕццӕгӕн, кодтой агарбӕласӕй (бӕласы мыггаг Aquilaria). Уыцы бӕласы хъӕд куы фембийы, уӕд дзы рахъары хӕрздӕф сой ӕмӕ чъиу. Хъӕд-иу ӕрыссадтой, ӕмӕ-иу дзы цы ссад рауад, уый-иу уӕй кодтой. Хуыдтой йӕ «алой».

Библийы фыст ис, зӕгъгӕ, Израилы цатыртӕ сты, «Йегъовӕ кӕй ныссагъта, уыцы алойбӕлӕсты хуызӕн» (Нымӕцтӕ 24:5, 6). Ӕвӕццӕгӕн уый тыххӕй, ӕмӕ агар у пӕлӕхсар бӕлас, йӕ дӕргъ та вӕййы 30 метры бӕрц. Абон Израилы агарбӕлас нӕ зайы. Фӕлӕ иу чиныг куыд ӕмбарын кӕны, афтӕмӕй Иорданы дӕлвӕзы – бирӕ адӕм кӕм цард ӕмӕ йӕ зӕхх хъӕздыг кӕмӕн уыд, уыцы бӕстӕйы – зади агарбӕлас дӕр ӕмӕ ма ӕндӕр бӕлӕстӕ дӕр. Уымӕ гӕсгӕ афтӕ зӕгъӕн нӕй, ӕмӕ уыцы бӕлӕстӕ уыцы бынаты нӕ зыдтой (A Dictionary of the Bible).

Хуыцауы Закъоны фыст уыд, кувӕндоны-иу цы нывӕндтӕ хастой, уыдон-иу фосӕн сӕ хуыздӕртӕ кӕй хъуамӕ уыдаиккой, уымӕн ӕмӕ Хуыцау сахъат нывӕндтӕ нӕ иста (Рацыд 23:19; Левит 22:21–24). Н. э. фыццаг ӕнусы цӕрӕг дзуттаг фыссӕг Филон куыд зӕгъы, афтӕмӕй-иу сауджынтӕ фосмӕ «сӕрӕй къӕхты онг» лӕмбынӕг ӕркастысты, цӕмӕй-иу сбӕлвырд кодтаиккой, хорз кӕй сты ӕмӕ сӕм кӕй «ницы хъӕндзинад ис».

Ахуыргонд Э. П. Сандерс куыд зӕгъы, афтӕмӕй-иу, ӕвӕццӕгӕн, кувӕндоны кусджытӕ, «ӕууӕнк кӕуыл уыд, уыцы уӕйгӕнджытӕн бар радтой, цӕмӕй-иу уӕй кодтаиккой, сауджынтӕ-иу рагацау кӕмӕ ӕркастысты ӕмӕ-иу нывондӕн ӕрхӕссынӕн чи бӕззыд, ахӕм фос ӕмӕ мӕргътӕ. Уӕйгӕнӕг-иу ӕлхӕнӕгӕн хъуамӕ радтаид, нывондмӕ фау ӕрхӕссӕн кӕй нӕй, уый чи бӕлвырд кодта, ахӕм гӕххӕтт».

2011 азы археологтӕ кувӕндонмӕ хӕстӕг ссардтой ӕлыгӕй конд мыхуыр, уыд лыстӕг ӕхцайы йас (н. э. размӕ 1 ӕнус – н. э. 70 аз). Цы дыууӕ арамейаг дзырды йыл ис фыст, уыдон нысан кӕнынц «Хуыцауӕн сты сыгъдӕг». Куыд зӕгъынц, афтӕмӕй-иу нывондӕн хойрагӕй ӕмӕ цӕрӕгойӕ цыдӕриддӕр хастой, уыдӕттимӕ-иу кувӕндоны кусджытӕ лӕвӕрдтой гӕххӕттытӕ мыхуырӕвӕрдимӕ.