Ацы статьяйы ӕвзӕрст цӕуынц алыхуызон фарстатӕ. Чи зоны сыл ды дӕр хъуыды кодтай. Алы фарстамӕ дӕр дзы амынд ис, Библийы йын дзуапп дӕ бон кӕм у ссарын, уыцы бынат. Йегъовӕйы Ӕвдисӕнтӕ уыцы фарстатыл демӕ ӕхсызгонӕй аныхас кӕндзысты.

1. Ӕмбӕлттӕ ӕвзаргӕйӕ ӕмбаргӕ цӕмӕн хъуамӕ уӕм?

Адӕмӕн сӕ фылдӕры фӕнды, цӕмӕй сын иууылдӕр аргъ кӕной, ӕмӕ сӕ уымӕ гӕсгӕ нӕ фӕфӕнды, цӕмӕй иннӕтӕй истӕмӕй хицӕн кӕной. Ӕмбӕлттӕ тынг ӕндавынц зӕрдӕйы фӕндтыл. Уӕдӕ, цавӕр адӕймӕгтӕ уыдзыстӕм, уый кӕнгӕ у, нӕхицӕн цавӕр ӕмбӕлттӕ равзардзыстӕм, уымӕй. (Бакӕс Ӕмбисӕндтӕ 4:23; 13:20.)

Библи фысджытӕй иу, Давид, йӕхицӕн ӕмбӕлттӕ ӕвзаргӕйӕ тынг лӕмбынӕг уыд. Йе ’мбӕлттӕ уыдысты, Хуыцауӕн лӕггад кӕнынӕн ын чи ’ххуыс кодта, ахӕм адӕм (Псалом 26:4, 5, 11, 12). Зӕгъӕм, Давид Ионафанимӕ уый тыххӕй балымӕн, ӕмӕ йын Ионафан ӕххуыс кодта, цӕмӕй Йегъовӕйыл йӕ ныфс ноджы тынгдӕр дардтаид. (Бакӕс 1 Самуилы 23:16–18.)

2. Цӕмӕй Хуыцауы ӕмбал суай, уый тыххӕй цы хъӕуы?

Кӕд Йегъовӕ Ӕппӕтхъомысджын Хуыцау у, уӕддӕр нӕ бон у, цӕмӕй йе ’мбӕлттӕ суӕм. Зӕгъӕм, Авраам Хуыцауы ӕмбал сси, уымӕн ӕмӕ йыл ӕууӕндыд ӕмӕ йӕ коммӕ каст (Райдиан 22:2, 9–12; Иаковы 2:21–23). Мах дӕр Йегъовӕйыл куы ӕууӕндӕм ӕмӕ йӕ коммӕ куы кӕсӕм, уӕд йе ’мбӕлттӕ суыдзыстӕм. (Бакӕс Псалом 15:1, 2.)

  3. Хорз ӕмбал схонӕн кӕй ис?

Хорз ӕмбӕлттӕ кӕрӕдзийыл ӕнувыд вӕййынц ӕмӕ кӕрӕдзийы раст зондыл фӕаразынц (Ӕмбисӕндтӕ 17:17; 18:24). Ахӕм ӕмбӕлттӕ уыдысты Ионафан ӕмӕ Давид. Ӕвӕццӕгӕн Ионафан Давидӕй уыд 30 азы хистӕр ӕмӕ йӕ фыды фӕстӕ уый хъуамӕ суыдаид Израилы паддзах, фӕлӕ уӕддӕр Давиды фарс рахӕцыд, уымӕн ӕмӕ йӕ ’мбӕрста, Хуыцау уый кӕй равзӕрста паддзахӕй. Хорз ӕмбал ма хорз уымӕй у, ӕмӕ дын дӕ рӕдыд ӕргом зӕгъдзӕн (Псалом 141:5). Йегъовӕйы чи уарзы, ахӕм ӕмбӕлттӕ дын баххуыс кӕндзысты, цӕмӕй дӕм хорз миниуджытӕ фӕзына. (Бакӕс 1 Коринфӕгтӕм 15:33.)

Хорз ӕмбӕлттӕ ссарӕн ис Йегъовӕйы Ӕвдисӕнты ӕмбырды. Уыцы ӕмбӕлттӕ дын ӕххуыс кӕндзысты, цӕмӕй Хуыцауы зӕрдӕ рухс кӕнай. (Бакӕс Дзуттӕгтӕм 10:24, 25.)

Фӕлӕ кӕд не ’мбӕлттӕ Хуыцауы уарзынц, уӕддӕр нӕ уыдон дӕр иуӕй-иу хатт фӕхъыг кӕнынц. Гыццыл ницӕй тыххӕй дӕр-иу сӕм ма фӕтӕргай у (Екклесиаст 7:9, 20–22). Рох дӕ ма уӕд, ӕнӕрӕдигӕ ӕмбал кӕй нӕй, Хуыцауы чи уарзы, уыцы ӕмбалӕн та аргъ нӕй. Библи нын дзуры, цӕмӕй, Хуыцауӕн иумӕ кӕимӕ лӕггад кӕнӕм, уыдонӕн хатыр кӕнӕм. (Бакӕс Колоссӕгтӕм 3:13.)

4. Де ’мбӕлттӕ демӕ разы куы нӕ уой, уӕд куыд бакӕндзынӕ?

Адӕймаг Библи ахуыр кӕнын куы райдайы, уӕд уый йӕ раздӕры ӕмбӕлттӕн кӕмӕндӕрты сӕ зӕрдӕмӕ нӕ фӕцӕуы. Ӕвӕццӕгӕн, уыдон нӕ фембарынц, Библи ахуыр кӕнын пайда кӕй у ӕмӕ адӕймаджы стыр ныфс кӕй уадзы, уый. Чи зоны, ӕмӕ дӕ фӕрцы сӕ хъуыды фӕивой. (Бакӕс Колоссӕгтӕм 4:6.)

Ахӕм ӕмбӕлттӕ ма фӕхудынц, Библийы цы хорз хабар фыст ис, ууыл (2 Петры 3:3, 4). Йе та дӕ хынджылӕг фӕкӕнынц, Хуыцауы закъӕттӕм гӕсгӕ цӕрыныл кӕй архайыс, уый тыххӕй (1 Петры 4:4). Ахӕм уавӕры дӕ хъӕудзӕн равзарын, чи дын у зынаргъдӕр: де ’мбӕлттӕ ӕви Хуыцау. Хуыцауы куы равзарай, уӕд никуы фӕфӕсмон кӕндзынӕ, уымӕн ӕмӕ уымӕй хуыздӕр ӕмбал нӕй. (Бакӕс Иаковы 4:4, 8.)

Фылдӕр базонӕн ис ацы чиныджы, «Библи бӕлвырдӕй цы дзуры?», 12 ӕмӕ 19 сӕрӕй. Мыхуыры йӕ рауагътой Йегъовӕйы Ӕвдисӕнтӕ.