Mary: Soma, ahye o. Me nye ɛlie kɛ merado wɔ wɔ sua nu a.

Soma: Medame noko zɔhane ala.

Mary: Ɛkenle mɔɔ membale ɛke la, yɛzuzule kɛzi Nyamenle te nganeɛ wɔ yɛ amaneɛnwunlɛ nwo la anwo. * Ɛhanle kɛ wɔva mekɛ tendenle wɔdwenle ɛhye anwo, titile wɔ mekɛ mɔɔ kale dɔle aze na wɔ mame bodale la. Ɔyɛ, kɛ wɔ mame anwo de ɛ?

Soma: Ɔyɛ a ɛnee ɔ nwo ɛyɛ kpalɛ, ɔyɛ a ɔnle kpalɛ. Ɛnɛ, yemɔ ɔ nwo le kpalɛ.

Mary: Me nye ɛlie kɛ mede edwɛkɛ ɛhye a. Tɛnlabelɛ ne ba ye zɛhae a ɔyɛ ɛvɛlɛ kpalɛ.

Soma: Ɔle zɔ. Ɔyɛ a medwenle amaneɛ mɔɔ ɔbanwu ye mekɛ tendenle la anwo.

Mary: Kɛ ɔde ala ɛne. Ɛbahakye kɛ ɛkenle mɔɔ yɛlile adwelie yɛwiele la, membizale deɛmɔti Nyamenle lɛ tumi maa amaneɛnwunlɛ bo pɛ noko yemaa nwolɛ adenle yemaa ɔlɛkɔ zo la anwo kpuyia.

Soma: Ɛhɛe, mekakye.

Mary: Kolaa na yɛaha Baebolo ne mualɛ ne anwo edwɛkɛ la, maa yɛzuzu edwɛkɛ mɔɔ yɛhanle ye ɛkenle la ekyi anwo.

Soma: Yoo.

Mary: Debie ko mɔɔ yɛzukoale la a le kɛ nrenya bie mɔɔ di nɔhalɛ wɔ Baebolo mekɛ zo bɔbɔ la bizale deɛmɔti Nyamenle maa amaneɛnwunlɛ nwo adenle la. Noko, Nyamenle andea ye kɛ ɔbizale zɔhane edwɛkɛ ne la, yɛɛ Nyamenle anga ye sikalɛ kɛ ɔhyia diedi kpole.

Soma: Ɔle debie fofolɛ mɔɔ menzukoale a.

Mary: Eza yɛzukoale kɛ Gyihova Nyamenle kyi kɛ ɔkɛnwu kɛ yɛlɛnwu amaneɛ. Kɛ neazo la, Baebolo ne ka kɛ ye menli ne nyanelilɛ “yɛle ye nyanelilɛ.” * Asoo ɔnkyekye yɛ rɛle kɛ yɛkɛnwu kɛ Nyamenle te nganeɛ maa yɛ wɔ mekɛ mɔɔ yɛlɛnwu amaneɛ la ɔ?

Soma: Ɛhɛe, ɔle zɔ.

Mary: Awieleɛ kolaa ne, yɛhanle kɛ saa yɛnea tumi kpole mɔɔ yɛ Bɔvolɛ ne lɛ la a, ɔkile kɛ ɔlɛ tumi kpole mɔɔ ɔkola ɔfa ɔ nwo ɔdie nu na ɔpɛ amaneɛnwunlɛ bo mekɛ biala a.

Soma: Yemɔ a mende ɔ bo la. Duzu ati a Nyamenle maa ninyɛndane ɛhye mɔ si wɔ mekɛ mɔɔ ɔlɛ tumi ɔmaa bɛgyakyi la ɛ?

Mary: Yɛbahola yɛabua wɔ kpuyia ne a kyesɛ yɛkɔ Baebolo buluku ne mɔɔ lumua, mɔɔ le Mɔlebɛbo la anu. Ɛze Adam nee Yive yɛɛ bakama ne mɔɔ bɛhanle kɛ bɛmmadi bie la anwo edwɛkɛ ɔ?

 Soma: Ɛhɛe, menzukoale zɔhane edwɛkɛ ne wɔ Sunday sukulu. Nyamenle hanle kɛ bɛmmadi baka bie ma, noko bɛandie na bɛlile.

Mary: Ɔdaye ala ɛne. Akee, maa yɛnlea mɔɔ manle Adam nee Yive yɛle ɛtane la. Edwɛkɛ ɛhye maa yɛte deɛmɔti yɛnwu amaneɛ la abo. Mesɛlɛ wɔ, kenga Mɔlebɛbo tile 3, ngyehyɛnu 1 mɔɔ kɔ 5 maa me wɔ ɔ?

Soma: Yoo mede. “Ɛwɔlɛ le mɛlɛbɛla tɛla ɛbɔ nu nane biala mɔɔ [Gyihova] Nyamenle bɔle la. Ɔbizale raalɛ ne kɛ: Yemɔti Nyamenle ɛze bɛ kɛ, ‘bɛmmadi mbakama mɔɔ wɔ tola ye anu la biala bie ɔ?’ Raalɛ ne buale ɛwɔlɛ ne kɛ, ‘Yɛkola yɛdi mbakama mɔɔ wɔ tola ye anu la biala bie; na Nyamenle zele yɛ kɛ, “Bɛmmadi baka ne mɔɔ gyi tola ne avinli lɔ la ma ne bie, eza bɛmmafa bɛ sa bɛka ye anrɛɛ bɛkɛwu.”’ Ɛwɔlɛ ne hanle hilele raalɛ ne kɛ, ‘Bɛnrɛwu. Nyamenle ze kɛ saa bɛdi baka ne ma ne bie a bɛ nye babuke na bɛayɛ kɛ ɔdaye Nyamenle la, na bɛanwu mɔɔ le kpalɛ, [bɛanwu] mɔɔ le ɛtane la.’”

Mary: Meda wɔ ase. Maa yɛzuzu ngyehyɛnu ɛhye mɔ anwo ekyii. Mɔɔ lumua la, yɛ ye nzonlɛ kɛ ɛwɔlɛ bie dendɛle hilele raalɛ ne, mɔɔ le Yive la. Baebolo ne foa bie ka kɛ Seetan Abɔnsam a amgba luale ɛwɔlɛ nwo zo dendɛle hilele ye a. * Seetan bizale Yive mɛla mɔɔ Nyamenle ɛva ɛmaa wɔ baka ne anwo la. Ɛyɛle mɔɔ Nyamenle hanle kɛ saa Adam nee Yive di bakama ne a ɔbavi nu yeara la nzonlɛ ɔ?

Soma: Ɔse bɛbawu.

Mary: Wɔyɛ deɛ. Wɔ ye edwɛkɛ bieko anu, Seetan dole Nyamenle ɛzonle kpole bie. Tie mɔɔ ɔhanle la: “Bɛnrɛwu.” Ɛnee Seetan ɛlɛka kɛ Nyamenle le adalɛ!

Soma: Metɛtele edwɛkɛ ɛhye ɛlɛ.

Mary: Mekɛ mɔɔ Seetan hanle kɛ Nyamenle le adalɛ la, ɔmanle edwɛkɛ bie dwazole mɔɔ ɔhyia mekɛ na bɛava bɛaziezie a. Wɔnwu deɛmɔti ɔle zɔ la ɔ?

Soma: Hmm. Mennwu ye kpalɛ.

Mary: Ɔyɛ, bie a mebahile nuhua wɔ adenle ɛhye azo. Maa yɛva ye kɛ kenle ko bie mengale mengilele wɔ kɛ me nwo yɛ se tɛla wɔ. Kɛ ɔkɛyɛ na wɔanwu kɛ ɔnle zɔ ɛ?

Soma: Bie a kyesɛ memaa ɛyɛ debie na menea.

Mary: Ɔle zɔ, pɛpɛɛpɛ. Bie a ɛbakpondɛ debie mɔɔ nuhua yɛ ɛnlomboɛ la na wɔanlea yɛ nuhua mɔɔ bahola amaa ye zo la. Saa yɛyɛ ye zɔ a, ɔnrɛyɛ se kɛ yɛbanwu mɔɔ anwo yɛ se la.

Soma: Menwu mɔɔ ɛkpondɛ wɔahile la.

Mary: Na yɛva ye kɛ meanga kɛ me nwo yɛ se tɛla wɔ na mese meka nɔhalɛ metɛla wɔ ɛ? Ɛhye le edwɛkɛ ngakyile, ɔnle zɔ ɔ?

Soma: Ɛhɛe, ɔyɛ me zɔ.

Mary: Ɔboalekɛ, nɔhalɛlilɛ ɛnle kɛ anwosesebɛ mɔɔ bɛkola bɛsɔ bɛnea la.

Soma: Ɛhɛe.

Mary: Nɔhalɛ nu, adenle mɔɔ yɛbalua zo yɛaziezie edwɛkɛ ne la a le kɛ yɛbamaa mekɛ agua nu na awie mɔ anwu yɛ nuhua mɔɔ ka nɔhalɛ kpalɛ la.

Soma: Ndelebɛbo wɔ nu.

Mary: Akee, nea Mɔlebɛbo edwɛkɛ ne bieko. Asoo Seetan hanle kɛ ɔ nwo yɛ se tɛla Nyamenle?

Soma: Kyɛkyɛ.

Mary: Anrɛɛ Nyamenle bamaa yeanwu ye ndɛndɛ kɛ ɔle adalɛ. Emomu, Seetan hanle kɛ ɔka nɔhalɛ kpalɛ ɔtɛla Nyamenle. Wɔ adenle bie azo, ɔhanle ɔhilele Yive kɛ, ‘Nyamenle ɛlɛbɔ adalɛ ahile wɔ, noko melɛka nɔhalɛ ne meahile wɔ.’

Soma: Me nye ɛlie nwolɛ.

Mary: Nyamenle luale ye nrɛlɛbɛ ne azo nwunle kɛ adenle kpalɛ mɔɔ ɔbalua zo yeaziezie ɛzonledolɛ ne la a le kɛ ɔbamaa mekɛ agua nu. Awieleɛ kolaa ne, bɛbanwu mɔɔ ɛlɛka nɔhalɛ nee mɔɔ ɛlɛbɔ adalɛ la wienyi.

Soma: Noko mekɛ mɔɔ Yive wule la, asoo yeanla ali kɛ Nyamenle le nɔhalɛ ɔ?

Mary: Wɔ adenle bie azo ɛnee ɔle zɔ. Noko ɛnee debie gyɛne boka Seetan ɛzonledolɛ ne anwo. Sia nea ngyehyɛnu 5 ne bieko. Ɛnwu debie bieko mɔɔ Seetan hanle hilele Yive la ɔ?

 Soma: Ɔhanle kɛ saa ɔdi bakama ne a, ɔ nye babuke.

Mary: Ɛhɛe, na ɔbayɛ kɛ ‘Nyamenle la, na yeanwu mɔɔ le kpalɛ, yeanwu mɔɔ le ɛtane la.’ Yemɔti Seetan hanle kɛ Nyamenle ɛlɛfa ninyɛne kpalɛ avea alesama.

Soma: Mede ɔ bo.

Mary: Na ɛnee ɛhye noko le ɛzonledolɛ kpole kpalɛ.

Soma: Boni a ɛkile a?

Mary: Seetan luale ye edwɛkɛ zo hilele kɛ Yive—yɛɛ alesama kɔsɔɔti bahola anlea bɛ nwo mɔɔ bɛngyia Nyamenle tumililɛ nwo a. Wɔ ɛke noko, ɛnee Gyihova ze kɛ adenle kpalɛ mɔɔ ɔbalua zo yeaziezie ɛzonledolɛ ne la a le kɛ ɔbamaa Seetan ayɛ mɔɔ ɔkpondɛ yeahile la. Ɛhye ati, Nyamenle ɛmaa Seetan adenle kɛ ɔnlea ewiade ɛhye azo wɔ mekɛ bie anu. Ɛhye maa yɛnwu deɛmɔti amaneɛnwunlɛ ɛbu zo la—kɛmɔ Seetan a amgba ɛlɛnea ewiade ye azo a na tɛ Nyamenle la ati ɔ. * Noko edwɛkɛ kpalɛ wɔ ɛkɛ.

Soma: Edwɛkɛ boni ɔ?

Mary: Baebolo ne kilehile Nyamenle anwo nɔhalɛ nwiɔ mɔɔ yɛ anyelielɛ la. Mɔɔ lumua la, Gyihova dwenle amaneɛ mɔɔ yɛnwu ye la anwo. Kɛ neazo la, suzu Belemgbunli Devidi edwɛkɛ ne mɔɔ wɔ Edwɛndolɛ 31:7 la anwo nea. Devidi nwunle amaneɛ dɔɔnwo wɔ ye ɛbɛlabɔlɛ nu, noko tie mɔɔ ɔhanle ɔhilele Nyamenle wɔ asɔneyɛlɛ nu la. Mesɛlɛ wɔ kenga ngyehyɛnu ɛhye maa me.

Soma: Yoo. Ɔkenga kɛ: “Wɔ ɛhulolɛ kpundii ne ati mebali fɛlɛko na me nye alie, ɔboalekɛ wɔnwu me amaneɛnwunlɛ; wɔnwu munzule mɔɔ ɛdo me la.”

Mary: Yemɔti Devidi nwunle amaneɛ ɛdeɛ, noko ɔ rɛle kyekyele ɔluakɛ ɛnee ɔze kɛ Gyihova ɛnwu debie biala mɔɔ ɛdo ye la. Asoo ɛhye kyekye ɛ rɛle—nɔhalɛ mɔɔ ɔde kɛ Gyihova nwu debie biala, bɔbɔ nyanelilɛ mɔɔ bie a alesama bie mɔ ɛnrɛde ɔ bo kpalɛ la?

Soma: Ɛhɛe, ɔkyekye me rɛle.

Mary: Nyamenle anwo nɔhalɛ mɔɔ tɔ zo nwiɔ mɔɔ yɛ anyelielɛ la a le kɛ ɔnrɛmaa yɛ amaneɛnwunlɛ ne ɛnrɛhɔ zo dahuu. Baebolo ne kilehile kɛ ɔnrɛhyɛ ɔbaye Seetan atisesebɛ tumililɛ ne yeavi ɛkɛ. Na ɔbaye ninyɛndane kɔsɔɔti mɔɔ ɛzi la yeavi ɛkɛ ne bɔkɔɔ, ninyɛne mɔɔ ɛdo wɔ nee wɔ mame la boka nwo. Mebahola meara dapɛne bieko na meahile wɔ deɛmɔti yɛkola yɛsi ye pi kɛ ɔnrɛhyɛ Nyamenle baye amaneɛnwunlɛ kɔsɔɔti avi ɛkɛ ne la ɔ? *

Soma: Me nye balie nwolɛ.