Wulu kɔ nuhua edwɛkɛ ne azo

Wulu kɔ nuninyɛne ne azo

Asoo Ɛze?

Asoo Ɛze?

Duzu a le ngakyile wɔ kɛzi Gyisɛse nee kokobɛvolɛma lile la anwo a?

Ɛnee tete Dwuuma sulo kokobɛ mɔɔ ɛnee ɛbu zo wɔ Mosisi mekɛ zo la. Ewule anwo ɛzulolɛ ɛhye ka ahenle ndinli ne na ɔsɛkye ye nwonane ne bɔkɔɔ. Ɛnee bɛnlɛ kokobɛ ayile. Emomu, bɛye menli mɔɔ kɛnyia bie la bɛfi menli nu na bɛmaa bɛbɔ menli mɔɔ ɛlɛbikye bɛ la kɔkɔ.​—Sɛlɛvolɛma 13:45, 46.

Dwuuma ɛzonlenlɛ nu mgbanyima yɛle mɛla dɔɔnwo bokale mɔɔ ɛnee wɔ Ngɛlɛlera ne anu la anwo, na bɛmaanle bɛdabɛ mɔɔ ewule ne bie ɛha bɛ la anwo hyelele bɛ. Kɛ neazo la, relabaema mɛla tua kɛ awie babikye kokobɛvolɛ mɔɔ bɛ avinli kɛyɛ mita 2. Noko saa anwoma ɛlɛbɔ kpole a, ɔnle kɛ awie bikye ye kɛyɛ mita 45. Talmudma bie mɔ hilele mɔɔ Ngɛlɛlera ne ka fale kokobɛvolɛma anwo kɛ bɛdɛnla “azokoɛleɛ ne kandiba” la abo kɛ ɔwɔ kɛ bɛye bɛ bɛfi suakpole mɔɔ bɛlie nwolɛ bane la anu. Yemɔti, saa relabaenli bie nwu kokobɛvolɛ wɔ suakpole ne azo a ɔtoto awolɛ ɔbɔ ye na ɔka kɛ: “Kɔ ɛleka mɔɔ ɛde la, mmafa evinli ɛka awie mɔ.”

Nea kɛzi Gyisɛse ɛdeɛ ne le ngakyile a! Kɛ anrɛɛ ɔbavoa kokobɛvolɛma la, ɛnee ɔkulo kɛ ɔfa ɔ sa ɔka bɛ na ɔyɛ bɛ ayile bɔbɔ.​—Mateyu 8:3.

Duzu a ɛnee Dwuuma asɔne mgbanyima gyinla zo maa bɛbɔ ewole a?

Ewolebɔlɛ Dasɛlɛlilɛ Kɛlata Ɔvi 71/72 Y.M.

Ɛnee asɔne mgbanyima su ewolebɔlɛ nwo kpolera wɔ ɛvoya mɔɔ limoa Y.M. la anu. Yemɔti, kenle ko bie Falasiima bie vale kpuya zɔle Gyisɛse nleanle kɛ: “Asoo yɛ mɛla ne maa adenle kɛ nrenya kola bɔ ɔ ye ewole wɔ edwɛkɛ biala anwo?”​—Mateyu 19:3.

Mosisi Mɛla ne maa adenle kɛ nrenyia kola bɔ ɔ ye ewole saa “ɔnwu kɛ raalɛ ne ɛnli ɔ nwo eni a.” (Mɛla ne 24:1) Wɔ Gyisɛse mekɛ zo, ɛnee relabaema gua ye ekpunli nwiɔ mɔɔ asolo kɛzi biala kile mɛla zɔhane abo a. Hyameeyae ekpunli ne mɔɔ bɛbɔ mɔdenle la hilele nu kɛ adenle ko mɔɔ bɛgyinla zo bɛbɔ ewole la a le “evinli nyɛleɛ” mɔɔ yemɔ a le agyalɛzɛkyelɛ la. Helɛle ekpunli ne noko hanle kɛ nrenyia bahola abɔ ɔ ye ewole wɔ edwɛkɛ ekyi biala mɔɔ kɛra bɛ avinli la anwo. Ekpunli ɛhye kile kɛ saa nrenyia nwu kɛ ɔ ye ɛnze aleɛ to anzɛɛ ɔnwu raalɛ fofolɛ mɔɔ anwo yɛ fɛ a, ɔbahola yeabɔ ɔ ye ewole.

Kɛzi Gyisɛse buale Falasiima ne ɛ? Ɔhanle ye wienyi kɛ: “Nrenya biala mɔɔ kɛbɔ ɔ ye ewole, kɛgya raalɛ fofolɛ la ɛdo awuvolɛvalɛ mɛla ne, kyesɛ raalɛ ne anli nɔhalɛ ammaa ye.”​—Mateyu 19:6, 9.