Mateyu Edwɛkpa 8:1-34

  • Kokobɛvolɛ bie ayileyɛlɛ (1-4)

  • Sogya kpanyinli bie diedi (5-13)

  • Gyisɛse yɛ menli dɔɔnwo ayile wɔ Kapɛnayɛm (14-17)

  • Kɛzi bɛtoa Gyisɛse la (18-22)

  • Gyisɛse maa ahumu bie gua dii (23-27)

  • Gyisɛse maa sunsum ɛtane ne mɔ kɔwolo agbolike nu (28-34)

8  Mɔɔ ɔvi boka ne azo ɔdwule la, menli dɔɔnwo doale ye.  Na nea! kokobɛvolɛ bie rale ɔ nwo ɛkɛ rahotole ye,* na ɔhanle kɛ: “Awulae, saa ɛkulo a, maa me nwo ɛde.”+  Yemɔti ɔdenrɛle ɔ sa ɔzɔle ye na ɔhanle kɛ: “Mekulo! Ɛ nwo ɛde.”+ Ɛkɛ ne ala ye kokobɛ ne hɔle.+  Akee Gyisɛse zele ye kɛ: “Nea na wɔanga wɔangile awie biala,+ noko kɔva ɛ nwo kile ɛsɔfo ne+ na fa ahyɛlɛdeɛ ne mɔɔ Mosisi hyehyɛle dole ɛkɛ ne la kɔ,+ amaa yeayɛ daselɛ yeamaa bɛ.”  Mekɛ mɔɔ ɔhɔle Kapɛnayɛm la, sogya kpanyinli bie rale ɔ nwo ɛkɛ ne razɛlɛle ye+  kɛ: “Yɛmenle, me sonvolɛ ɛbubu ɛgua sua nu na ɔlɛnwu amaneɛ kpole.”  Ɔbuale ye kɛ: “Saa medwu ɛkɛ a mebayɛ ye ayile.”  Sogya kpanyinli ne buale ye kɛ: “Yɛmenle, menfɛta kɛ ɛba me sua nu, wɔmɔ ka edwɛkɛ ala na me sonvolɛ ne bade kpɔkɛ.  Ɔluakɛ medame noko mewɔ awie abo, yɛɛ melɛ sogyama mɔɔ bɛwɔ me bo a, na meka mekile ko kɛ, ‘Kɔ a!’ ɔkɔ, yɛɛ bieko kɛ, ‘Bɛla a!’ ɔba, nee me akɛlɛ kɛ, ‘Yɛ ɛhye a!’ ɔyɛ.” 10  Mɔɔ Gyisɛse dele ɛhye la, ɔzinle ɔ nwo na ɔhanle ɔhilele menli mɔɔ doa ye la kɛ: “Meka nɔhalɛ ne meahile bɛ, metɛnwunle awie wɔ Yizilayɛ mɔɔ lɛ diedi kpole zɛhae a.+ 11  Na meka meahile bɛ kɛ, menli dɔɔnwo vi aduduleɛ nee adɔleɛ bara na bɛ nee Ebileham nee Ayezeke nee Gyekɔbo adɛnla ɛkponle nwo ali debie wɔ anwuma Belemgbunlililɛ ne anu;+ 12  na bɛbavuandi Belemgbunlililɛ ne amra ne mɔ bɛagua alienwo lɔ awozinli ne anu. Ɛkɛ ne a bɛbazu na bɛali nyane a.”+ 13  Akee Gyisɛse zele sogya kpanyinli ne kɛ: “Kɔ. Kɛ mɔɔ wɔ diedi ne de la, ɔyɛ zɔ ɔmaa wɔ.”+ Na mekɛ ne anu ala sonvolɛ ne dele kpɔkɛ.+ 14  Mɔɔ Gyisɛse hɔle Pita sua nu la, ɔnwunle kɛ ebunlu ɛhye ye ase* na ɔla ɛkɛ.+ 15  Yemɔti ɔzɔle ɔ sa,+ na ebunlu ne hɔle, na ɔdwazole ɔkpondɛle debie ɔmaanle ye. 16  Na ye nɔsolɛ nu, bɛvale menli dɔɔnwo mɔɔ sunsum ɛtane wɔ bɛ nwo la bɛrɛlɛle ye; na ɔhanle edwɛkɛ bie ɔdule sunsum ne mɔ, na ɔyɛle bɛdabɛ mɔɔ bɛlɛnwu amaneɛ la kɔsɔɔti ayile, 17  amaa mɔɔ bɛluale ngapezonli Ayezaya anwo zo bɛhanle la ara nu kɛ: “Ɔdaye a ɔvale yɛ anwodolɛ kɔsɔɔti na ɔzoale yɛ nwo ewule a.”+ 18  Mekɛ mɔɔ Gyisɛse nwunle kɛ menli dɔɔnwo wɔ ɔ nwo ɛkɛ la, ɔzele ye ɛdoavolɛma ne kɛ bɛmaa bɛpɛ bɛhɔ azule ne anzi lɔ.+ 19  Na mɛla kilehilevolɛ bie razele ye kɛ: “Kilehilevolɛ, ɛleka biala mɔɔ ɛkɔ la mebadoa wɔ.”+ 20  Noko Gyisɛse zele ye kɛ: “Ɛzonlɛ lɛ bɛ mbɔne* yɛɛ anwomanyunlu nloma lɛ bɛ sane, noko sonla Ra ne ɛnlɛ ɛleka mɔɔ ɔbava ɔ ti yeado a.”+ 21  Akee ɛdoavolɛma ne ko noko zele ye kɛ: “Awulae, maa me adenle maa menlimoa mengɔnzie me papa.”+ 22  Gyisɛse zele ye kɛ: “Kɔ zo toa me, na maa mowuamra ɛzie bɛ avunli.”+ 23  Na mɔɔ ɔvole ɛlɛne ne anu la, ye ɛdoavolɛma ne doale ye.+ 24  Na nea! ahumu kpole bie dule nyevile ne anye, yemɔti ɛnee azɛlɛkye ne ɛlɛbu agua ɛlɛne ne anu; noko ɛnee yelafe.+ 25  Na bɛhɔdunwuele ye na bɛhanle kɛ: “Awulae, die yɛ na asɛɛ yɛwu!” 26  Noko ɔzele bɛ kɛ: “Duzu ati a bɛ ahonle ɛdu zɛhae ɛ,* bɛmɛ mɔɔ bɛ diedi le ekyi a?”+ Akee ɔdwazole na ɔdeanle anwoma ne nee nyevile ne, na bɛguale dii.+ 27  Ɛhye zinle ɛdoavolɛma ne anwo na bɛhanle kɛ: “Duzu sonla a le ɛhye? Anwoma nee nyevile bɔbɔ tie ye.” 28  Mɔɔ ɔdwule azule ne anzi wɔ Gadala maanzinli nu la, mrenyia nwiɔ mɔɔ sunsum ɛtane wɔ bɛ nwo la vi nla* ne azo rayiale ye.+ Bɛ nwo yɛ ɛzulolɛ kpalɛ, yemɔti ɛnee awie biala ɛngola ɛnva adenle zɔhane azo. 29  Na nea! bɛdeanle nu kɛ: “Duzu a ɛkpondɛ wɔavi yɛ ɛkɛ a, Nyamenle Ara?+ Wɔra kɛ ɛbadea yɛ+ kolaa na mekɛ ne adwu ɔ?”+ 30  Ɛnee agbolike dɔɔnwo bie ɛlɛdidi wɔ moamoa nehane.+ 31  Yemɔti sunsum ɛtane ne mɔ zɛlɛle ye kɛ: “Saa ɛtu yɛ a, maa yɛhɔwolo agbolike ne mɔ anu.”+ 32  Na ɔzele bɛ kɛ: “Bɛhɔ!” Yemɔti bɛvile bɛ nwo na bɛhɔwolole agbolike ne mɔ anu, na nea! agbolike ne mɔ amuala vi boka ne azo dule twi hɔguale nyevile ne anu na bɛwule. 33  Na menli mɔɔ nea agbolike ne mɔ la nriandile hɔle suakpole ne azo hɔhanle mɔɔ ɛzi la amuala, nee mɔɔ dole menli ne mɔɔ sunsum ɛtane ne mɔ wɔ bɛ nwo la noko. 34  Na nea! sua ne azo amra kɔsɔɔti rayiale Gyisɛse, na mɔɔ bɛnwunle ye la, bɛzɛlɛle ye kɛ ɔvi bɛ maanzinli ne anu ɔhɔ.+

Ɔbodwɛkɛ

Anzɛɛ “rabɔle ɔ ti aze maanle ye.”
Anzɛɛ “ɔ ye mame.”
Anzɛɛ “bɛ dabelɛ.”
Anzɛɛ “ɛzulolɛ ɛha bɛ a.”
Anzɛɛ “ngakyelɛ nla.”