Wulu kɔ nuhua edwɛkɛ ne azo

Wulu kɔ nuninyɛne ne azo

EDWƐKƐ TITILI | BAEBOLO NE​—BƐANGOLA YE SƐKYE

Baebolo Ne Gyinlanle Dwazotia Nloa

Baebolo Ne Gyinlanle Dwazotia Nloa

NGYEGYELƐ: Maanyɛlɛma nee asɔne mgbanyima dɔɔnwo ɛyɛ ngyehyɛleɛ mɔɔ ko tia Baebolo nu edwɛkɛ ne. Fane dɔɔnwo ne ala, bɛfa bɛ tumi ne bɛsi menli adenle kɛ bɛkɛnyia Baebolo ne bie, bɛkɛyɛ anzɛɛ bɛkɛhile ɔ bo. Suzu neazo nwiɔ ɛhye anwo:

  • Kɛyɛ 167 K.Y.M.: Seleucid Belemgbunli Antiochus Epiphanes, mɔɔ bɔle mɔdenle kɛ ɔfa Giliki ɛzonlenlɛ yeatinlitinli Dwuuma anwo zo la lile mɛla kɛ bɛzɛkye Hibulu Ngɛlɛlera mɔɔ bɛhɛlɛ la kɔsɔɔti. Tetedwɛkɛnli Heinrich Graetz hɛlɛle kɛ, ye mgbanyima ne mɔ “tetele Mɛla buluku ne anu na bɛyelale bɛ wɔ mekɛ biala mɔɔ bɛkɛnwu bie la, yɛɛ bɛku bɛdabɛ mɔɔ bɛkpondɛ arɛlekyekyelɛ nee anwosesebɛ bɛfi nu la.”

  • Avinli Mekɛ: Kateleke mgbanyima bie mɔ vale ɛya kɛ bɛ asɔnema ne ɛlɛka mɔɔ Baebolo ne kilehile la anwo edwɛkɛ bɛagyakyi Kateleke ngilehilelɛ ne. Bɛbule asɔne sonla biala mɔɔ lɛ Baebolo ne na ɔnlɛ Edwɛndolɛ ne mɔɔ wɔ Latin nu la kɛ ɔle kpɔkyevo. Asɔne ayiama ne anu ko lile mɛla na bɛzoanle bɛ menli ne kɛ bɛbɔ mɔdenle, bɛva nɔhalɛlilɛ bɛkpondɛ kpɔkyevoma . . . ɔlua bɛ azua nu mɔɔ bɛbawolowolo nee ɛleka mɔɔ bɛnea a menli lɛ Baebolo mbuluku la. . . . Bɛyela azua biala mɔɔ bɛkɛnwu kɛ kpɔkyevoma wɔ nu la.”

Saa Baebolo ne kpɔvolɛma ne mɔ holale zɛkyele ye a, anrɛɛ nuhua edwɛkɛ ne minlinle.

William Tyndale Nrelenza Baebolo ngilebɛbo ne tɛbɔ ɛkɛ, ɔnva nwo kɛ bɛvale bɛ sa bɛdole zo, bɛyelale Baebolo dɔɔnwo na bɛhunle ɔdaye mumua ne wɔ 1536 la

KƐZI BAEBOLO NE GYINLANLE DWAZOTIA NLOA LA: Belemgbunli Antiochus vale ye adwenle ziele Yizilayɛma anwo zo titili ɛdeɛ, noko ɛnee Dwuuma dɔɔnwo wɔ maanle gyɛne zo. Nɔhalɛ nu, nwomama bule mgbonda kɛ ɔkadwu ɛvoya mɔɔ limoa Y.M. anu la, ɛnee Dwuuma ɛya ngyɛnu 60 de maanle gyɛne zo. Dwuuma vale Ngɛlɛlera mɔɔ bɛhɛlɛle la ziele bɛ nyianu azua ne mɔ anu​—Ngɛlɛlera ko ne ala mɔɔ awolɛndoazo bieko vale lile gyima mɔɔ Kilisienema boka nwo la.​—Gyima ne 15:21.

Wɔ Avinli Mekɛ ne anu, menli mɔɔ anye die Baebolo ne anwo la gyinlanle ɛkpɔlɛ nloa na bɛhɔle zo bɛhɛlɛle Ngɛlɛlera ne na bɛhilele ɔ bo. Kolaa na bɛayɛ milahyinli mɔɔ bɛfa bɛpenlete mbuluku wɔ ɛvoya 15 avinli ɛkɛ la, ɛnee bɛyɛ Baebolo ne foa bie wɔ aneɛ dɔɔnwo kɛyɛ 33 anu. Akee, bɛhilele Baebolo ne abo na bɛyɛle ye dɔɔnwo.

MƆƆ VI NU ƐRA: Ɔnva nwo kɛ arelemgbunli mɔɔ lɛ tumi nee ɛsɔfoma adalɛma vale ngyegyelɛ rale la, tetedwɛkɛ maa yɛnwu kɛ bɛva Baebolo ne bɛmaa wɔ ewiade amuala yɛɛ bɛhile ɔ bo dɔɔnwo. Yehakyi maanle nee aneɛ bie mɔ mɛla, yɛɛ menli dɔɔnwo ɛbɛlabɔlɛ.