Wulu kɔ nuhua edwɛkɛ ne azo

Boni A Baebolo Ne Ka Ye Wɔ Easter Nwo A?

Boni A Baebolo Ne Ka Ye Wɔ Easter Nwo A?

Baebolo ne bua kɛ

Easter ɛvoyialilɛ ne ɛngyi Baebolo ne azo. Saa ɛnea nwolɛ tetedwɛkɛ a, ɛbanwu mɔɔ Easter kile la​—ɔle amaamuo mɔɔ fale awolɛ nwo. Suzu mɔɔ doa zo la anwo.

  1. Duma: Encyclopædia Britannica ka kɛ: “Awie biala ɛnze ɛleka mɔɔ Nrelenza edwɛkɛkpɔkɛ Easter ne vi a; Anglo-Saxon ɛsɔfo Venerable Bede mɔɔ dɛnlanle aze wɔ ɛvolɛ 700 la nyianle duma ne vile Anglo-Saxon nyenyesuo nyamenle raalɛ mɔɔ bɛfɛlɛ ye Eostre la duma ne anu.” Mbuluku bie mɔ noko ka kɛ ɔvi Astarte mɔɔ le Fonehyea awolɛ nyamenle raalɛ mɔɔ ɛnee ye sɔhovolɛ a le Babelɔnma bozonle Ishtar la anu.

  2. Asoasoa: Ɔle awolɛ nwo sɛkɛlɛneɛ mɔɔ “bɛnyianle ye bɛvile tete awozonle ɛzonlenlɛma ɛvoyialilɛ mɔɔ ɛnee bɛdi ye wɔ Europe nee Middle East wɔ nyenyesuo mekɛ nu la anu.”​—Encyclopædia Britannica.

  3. Aholonvia: Funk & Wagnalls Standard Dictionary of Folklore, Mythology and Legend kile kɛ Easter aholonvia mɔɔ bɛkpondɛ mɔɔ bɛdie bɛdi kɛ Easter asoasoa bie a fa ba la “ɛnle nwɔra mɔɔ bɛto bɛkile ngakula ala, ɔle awolɛ nwo amaamuo mɔɔ kɔ zo a.” Wɔ maanle bie mɔ anu bɛdie bɛdi kɛ Easter kolonvia “bahola amaa bɛanyia anyelielɛ, anwonyia, kpɔkɛdelɛ nee anwobanebɔlɛ.”​—Traditional Festivals.

  4. Easter tɛladeɛ fofolɛ: “Bɛbu ye kɛ ɔngile ɛbulɛ yɛɛ ɔle munzule kɛ awie babiza Scandinavia Nyenyesuo nyamenle raalɛ anzɛɛ Eastre ahye wɔ mekɛ mɔɔ ɔnwula tɛladeɛ fofolɛ la.”​—The Giant Book of Superstitions.

  5. Sɛnzɛne ne ɛzonlenlɛ: Ɛhye le debie mɔɔ ɛnee menli mɔɔ sonle sɛnzɛne ne wɔ tete ne la “yɛ wɔ mekɛ mɔɔ alehyenlɛ nee aledwolɛ tendenle sɛ la bɛfa bɛyɛ sɛnzɛne ne nee tumi mɔɔ maa ninyɛne kɔsɔɔti fifi la akoaba.”​—Celebrations​—The Complete Book of American Holidays.

American Book of Days ne kilehile ɛleka mɔɔ Easter vi la anu kpalɛ kɛ: “Kpolerazulɛ biala ɛnle nwo kɛ Kilisiene ɛzonlenlɛ nu mgbanyima mɔɔ dɛnlanle aze wɔ ɛvoyia mɔɔ tɔ zo nna la vale awozonle ɛzonlenlɛma amaamuo na bɛhanle kɛ ɔwɔ kɛ Kilisienema die to nu.”

Baebolo ne bɔ yɛ kɔkɔ kɛ ɔnle kɛ yɛdua amaamuo mɔɔ Nyamenle anye ɛnlie nwo la azo yɛsonle ye. (Maake 7:6-8) Baebolo ne ka ye wɔ 2 Kɔlentema 6:17 kɛ: ‘Gyihova se, “Bɛhwe bɛ nwo bɛvi bɛ nwo. Bɛmmafa bɛ sa bɛka debie mɔɔ anwo ɛnde la.”’ Easter le awozonle ɛzonlenlɛma amaamuo mɔɔ ɔwɔ kɛ menli mɔɔ kulo kɛ sɔ Nyamenle anye la kpo a.