Maake Edwɛkpa 7:1-37

  • Bɛkpale menli amaamuo nwo ɛdanlɛ (1-13)

  • Mɔɔ vi ahonle nu la gua sonla nwo evinli (14-23)

  • Fonehyea raalɛ bie diedi kpole (24-30)

  • Nrenyia anzondiliravolɛ bie ayileyɛlɛ (31-37)

7  Akee Falasiima nee mɛla kilehilevolɛma bie mɔ mɔɔ vi Gyɛlusalɛm rale la rayiale ɔ nwo ɛkɛ.+  Na bɛnwunle kɛ ye ɛdoavolɛma ne bie mɔ ɛlɛfa bɛ sa anwo evinli, kile kɛ, ɛsalɛ mɔɔ bɛannrinzi nwo la,* ali aleɛ.  (Ɔluakɛ Falasiima nee Dwuuma kɔsɔɔti ɛnli aleɛ kyesɛ bɛnrinzi bɛ sa anwo ɔkɔdwu bɛ sa kpɔkɛ zo, bɛfa bɛdi bɛ nenyia mɔ amaamuo ne azo,  na saa bɛvi gua nu bɛba a, bɛnli aleɛ kyesɛ bɛnrinzi bɛ nwo. Bɛlɛ amaamuo gyɛne dɔɔnwo wɔ ɛkɛ mɔɔ bɛdi zo a, bie a le kanrɛlɛ,* mbuakɛ nee kɔbele ninyɛne mɔɔ bɛwula ye nzule nu la.)+  Yemɔti Falasiima nee mɛla kilehilevolɛma ne mɔ bizale ye kɛ: “Duzu ati a wɔ ɛdoavolɛma ɛnli yɛ nenyia mɔ amaamuo ne azo, na bɛfa bɛ sa anwo evinli bɛdi aleɛ ɛ?”+  Ɔzele bɛ kɛ: “Ayezaya nwunle ye a ɔhanle bɛmɛ nabalabama anwo edwɛkɛ a, kɛ mɔɔ bɛhɛlɛ la, ɔse, ‘Menli ɛhye mɔ fa bɛ nloa di me eni, na bɛ ahonle ɛdeɛ ɔmbikye me fee.+  Bɛsonle me mgbane ɔluakɛ bɛkilehile mɔɔ menli ka la.’+  Bɛfa Nyamenle mɛla ne bɛsie ahane na bɛdi menli amaamuo zo.”+  Eza ɔzele bɛ kɛ: “Bɛdua nrɛlɛbɛ adenle zo bɛbu bɛ nye bɛgua Nyamenle mɛla zo amaa bɛali bɛ amaamuo ne azo.+ 10  Kɛ neazo la, Mosisi hanle kɛ, ‘Di wɔ papa nee wɔ mame eni,’+ na ‘Awie biala mɔɔ kɛha edwɛkɛ ɛtane kɛhile ye papa anzɛɛ ye mame* la bɛhu ye.’+ 11  Noko bɛmɛ bɛse, ‘Awie biala mɔɔ kɛha kɛhile ye papa anzɛɛ ye mame kɛ: “Debie biala mɔɔ melɛ mɔɔ anrɛɛ ɛbanyia zolɛ nvasoɛ la le kɔban (ɛhye kile, ahyɛlɛdeɛ mɔɔ bɛyila zo bɛmaa Nyamenle)”’ a, 12  bɛmmaa ɔnyɛ ɛhwee ɔmmaa ye papa anzɛɛ ye mame bieko.+ 13  Yemɔti bɛva bɛ amaamuo ne mɔɔ bɛkilehile la bɛzɛkye Nyamenle edwɛkɛ ne.+ Yɛɛ bɛyɛ ninyɛne dɔɔnwo mɔɔ le kɛ ɛhye mɔ la.”+ 14  Ɔti ɔvɛlɛle menli dɔɔnwo ne ɔrale ɔ nwo ɛkɛ ne bieko na ɔzele bɛ kɛ: “Bɛ muala bɛdie me na bɛde ɔ bo.+ 15  Debie biala ɛnle ɛkɛ mɔɔ kɔ sonla nu mɔɔ ɔgua ɔ nwo evinli a; emomu, mɔɔ vi sonla nu finde la a gua ɔ nwo evinli a.”+ 16 * —— 17  Akee mɔɔ ɔvile menli dɔɔnwo ne anu ɔhɔle sua bie anu la, ye ɛdoavolɛma ne bɔle ɔ bo bizale ye ndonwo ne anwo edwɛkɛ.+ 18  Yemɔti ɔzele bɛ kɛ: “Bɛdabɛ noko bɛnde ɔ bo ɔ? Asoo bɛnze kɛ debie mɔɔ vi alienwo kɔ sonla nu la ɛngola ɛngua ɔ nwo evinli, 19  ɔluakɛ ɔngɔ ye ahonle nu, emomu ɔkɔ ɔ kunlu na ɔfa ye aze ɔse ɔ?” Yemɔti ɔhanle kɛ aleɛ biala anwo te. 20  Bieko, ɔhanle kɛ: “Mɔɔ vi sonla nu finde la a gua ɔ nwo evinli a.+ 21  Ɔluakɛ sonla nu, ye ahonle nu+ a nzuzulɛ ɛtane vi ba a: adwɔmane ɛbɛla,* awule, kodiawuyɛlɛ, 22  agyalɛzɛkyelɛ, amile, amumuyɛ, mɛlɛbɛla, anyiemgba ɛbɛla,* anyebolo, munzule edwɛkɛ, anwomemaazo yɛɛ ngoaseade. 23  Ninyɛndane ɛhye mɔ amuala vi sonla nu na ɔgua ɔ nwo evinli.” 24  Ɔvile ɛkɛ ne na ɔhɔle Taya nee Saedɛn maanzinli nu.+ Ɔhɔle sua bie anu na ɛnee ɔngulo kɛ awie kɛnwu ye, noko yeangola yeanva ɔ nwo yeanzie. 25  Yeangyɛ biala, raalɛ bie mɔɔ sunsum ɛtane wɔ ɔ ra raalɛ ekyi bie anwo la dele ye nganeɛ na ɔradule ɔdɔle ɔ gyakɛ anu.+ 26  Ɛnee raalɛ ne le Gilikinli, ɔvi* Fonehyea mɔɔ wɔ Selea la; na ɔhɔle zo ɔzɛlɛle ye kɛ ɔdu sunsum ɛtane ne wɔ ɔ ra raalɛ ne anwo. 27  Noko ɔzele ye kɛ: “Maa ngakula ne mɔ ɛlimoa ɛli bie bɛ ko ɛyi, ɔluakɛ ɔnle kpalɛ kɛ bɛkɛvuandi paano mɔɔ le ngakula ne mɔ ɛdeɛ la bɛkɛmaa ahwea mralɛ.”+ 28  Na ɔbuale ye kɛ: “Yɛmenle, ɔle zɔ, noko ahwea mralɛ ne mɔ mɔɔ gua ɛkponle ne abo la di ngakula ne mɔ mgbokpoloka ne.” 29  Akee ɔzele ye kɛ: “Kɛmɔ wɔha ɛhye la ati, kɔ; sunsum ɛtane ne ɛvi ɛ ra raalɛ ne anwo.”+ 30  Yemɔti ɔhɔle ye sua nu na ɔnwunle kɛ kakula ne la ɛkpa ne azo, na sunsum ɛtane ne ɛvi ɔ nwo.+ 31  Mekɛ mɔɔ Gyisɛse vi Taya maanzinli nu ɛlɛsia ara la, ɔvale Saedɛn ɔhɔle Galeli nyevile ne anloa wɔ Dɛkapɔlese maanzinli ne anu.*+ 32  Wɔ ɛke, bɛvale nrenyia bie mɔɔ anzo ɛdi na ɔngola tendɛ kpalɛ+ la bɛrɛlɛle ye, na bɛbodole ye kɛ ɔva ɔ sa ɔdo ɔ nwo zo. 33  Na ɔvale ye ɔvile menli ne anu ɔhɔle ahane. Akee ɔvale ɔ sa mrɛlɛsɛka ɔwulowulale nrenyia ne anzo nu, ɔdole nyɛlɛ na ɔvale ɔ sa ɔhanle ɔ tafinlima.+ 34  Na ɔnleanle anwuma, ɔgule ɛnwomenle kpole na ɔhanle kɛ: “Ɛfata,” ɛhye kile, “Buke.” 35  Akee ɔ nzo bukele,+ ɔ tafinlima zianyinle, na ɔbɔle ɔ bo ɔdendɛle kpalɛ. 36  Na ɔbɔle bɛ nloa kɛ bɛmmaka bɛkile awie biala,+ noko mɔɔ ɔlɛtua bɛ la, ɛnee bɔ zo mɔɔ bɛlɛka ye kpalɛ a.+ 37  Nɔhalɛ nu, ɔzinle bɛ nwo kpole+ na bɛhanle kɛ: “Yeyɛ debie biala boɛ. Ɔmaa anzondiliravolɛ bɔbɔ te edwɛkɛ na mumule tendɛ.”+

Ɔbodwɛkɛ

Nea Mt 15:2 ɔbdw.
Anzɛɛ “ahɔpo.”
Anzɛɛ “kɛbɔ bɛ aholoba.”
Giliki, por·nei′a. Nea Edwɛkɛbohilelɛ.
Giliki, a·sel′gei·a. Nea Edwɛkɛbohilelɛ.
Anzɛɛ “bɛwole ye wɔ.”
Anzɛɛ “Azuamgbole Bulu Maanzinli ne anu.”