Mɔɔ Tɔ Zo Nwiɔ Kɔmaa Kɔlentema 6:1-18

  • Bɛmmamaa Nyamenle ɛlolɛ ne yɛ mgbane (1, 2)

  • Pɔɔlo ɛzonlenlɛ gyima ne anwo edwɛkɛ (3-13)

  • Bɛ nee menli mɔɔ ɛnle diedima la mmatu (14-18)

6  Yɛ nee ye bɔ nu yɛ gyima,+ na eza yɛsɛlɛ bɛ kɛ bɛmmadie Nyamenle ɛlolɛ kpole ne bɛmaa ye bodane ne yɛ mgbane.+  Ɔluakɛ ɔse: “Wɔ ɛlolɛ mekɛ nu, mendiele wɔ, yɛɛ ngoanelielɛ kenle ne, memboale wɔ.”+ Nea! Ɛnɛ a le ɛlolɛ mekɛ titili ne a. Nea! Ɛnɛ le ngoanelielɛ kenle.  Yɛndenda awie agyakɛ anu wɔ debie biala anu, amaa bɛanga yɛ ɛzonlenlɛ gyima ne anwo edwɛkɛ ɛtane;+  emomu wɔ adenle biala anu yɛda yɛ nwo ali kɛ Nyamenle azonvolɛ,+ yɛgyinla kpundii wɔ sɔnea dɔɔnwo anu, anwongyelelɛ nu, ehyia nu, ngyegyelɛ nu,+  ɛbolɛ nu, efiadelalɛ nu,+ basabasayɛlɛ nu, gyima ɛsesebɛyɛlɛ nu, nafelɛ ɛsololɛ nu, ɛhɔnehyelɛ nu;+  anwodelɛ nu, ndelebɛbo nu, abotane nu,+ atiakunlukɛnlɛma nu,+ sunsum nwuanzanwuanza nu, ɛlɔlɛ mɔɔ nabalaba ɛnle nu la anu,+  nɔhalɛ edwɛkɛ nu, Nyamenle tumi nu;+ ɔlua tenleneyɛlɛ akodeɛ+ mɔɔ wɔ yɛ sa fema* ne nee bɛne* ne anu la azo,  ɔlua anyunlunyia nee anyiemgba ɛbɔlɛ zo, ɔlua dumamɔlɛ ɛtane nee dumamɔlɛ kpalɛ zo. Bɛbu yɛ kɛ yɛbɛlɛbɛla menli noko yɛka nɔhalɛ,  kɛ menli mɔɔ bɛnze yɛ noko bɛze yɛ, kɛ menli mɔɔ yɛlɛwu* noko nea! yɛde aze,+ kɛ bɛhwe yɛ nzo* noko bɛtɛkunle yɛ,+ 10  kɛ menli mɔɔ yɛlɛdi nyane noko yɛ nye die dahuu, kɛ yɛle ehyiavolɛma noko yɛlɛmaa menli dɔɔnwo ayɛ sukoavolɛma, kɛ yɛnlɛ bie noko yɛlɛ debie biala.+ 11  Kɔlentema, yɛbuke yɛ nloa yɛdendɛ* yɛhile bɛ, yɛɛ yɛbuke yɛ ahonle nu kpalɛ. 12  Yɛtɛsile ɛlɔlɛ mɔɔ yɛlɛ yɛmaa bɛ la anwo adenle,+ bɛmɛ a bɛzi ɛlɔlɛ mɔɔ bɛlɛ bɛmaa yɛ la anwo adenle a. 13  Melɛtendɛ meahile bɛ kɛ me mra—yɛsɛlɛ bɛ bɛdabɛ noko bɛyɛ ye zɔhane ala bɛmaa yɛ—bɛbuke bɛ ahonle nu kpalɛ.*+ 14  Bɛ nee menli mɔɔ ɛnle diedima la mmatu.*+ Na agɔnwolɛvalɛ boni a wɔ tenleneyɛlɛ nee amumuyɛyɛlɛ avinli a?+ Anzɛɛ kyɛfoa boni a wienyi nee awozinli lɛ a?+ 15  Bieko, ngitanwolilɛ boni a wɔ Kelaese nee Biliale* avinli a?+ Anzɛɛ kyɛfoa boni a diedinli* nee mɔɔ ɛnle diedinli la lɛ a?+ 16  Na koyɛlɛ boni a wɔ Nyamenle ɛzonlenlɛsua nee awozonle avinli a?+ Ɔluakɛ yɛle tease Nyamenle ne ɛzonlenlɛsua;+ kɛ mɔɔ Nyamenle ɛha la: “Me nee bɛ badɛnla+ na me nee bɛ alua, na mebayɛ bɛ Nyamenle na bɛayɛ me menli.”+ 17  “‘Yemɔti bɛvi bɛ avinli na bɛhwe bɛ nwo,’ Gyihova* a se a, ‘na bɛmmafa bɛ sa bɛka debie mɔɔ anwo ɛnde la’”;+ “‘na mebalie bɛ.’”+ 18  “‘Na mebayɛ bɛ ze,+ na bɛayɛ me mra mrenyia nee mraalɛ,’+ Gyihova,* Tumivolɛ Bedevinli ne a se a.”

Ɔbodwɛkɛ

Bie a bɛfa bɛko.
Bie a bɛfa bɛbɔ bɛ nwo bane.
Anzɛɛ “yɛfɛta ewule.”
Anzɛɛ “bɛdea yɛ.”
Anzɛɛ “yɛha debie biala.”
Anzɛɛ “bɛdabɛ noko bɛdɛlɛ bɛ ɛlɔlɛ nu.”
Anzɛɛ “mmabɔ nu yɛ debie.”
Ɔvi Hibulu edwɛkɛkpɔkɛ mɔɔ kile “Mɔɔ Nvasoɛ Ɛnle Zo” la anu. Ɔfale Seetan anwo.
Anzɛɛ “sonla mɔɔ di nɔhalɛ la.”