1. (a) Niki ekyahikire ahari Petero omu ihunga aha nyanja ya Garilaaya? (Reeba ekishushani aha kutandika.) (b) Ahabw’enki Petero yaatandikire kutobera?

ENTUMWA Petero n’ezindi ntumwa bakaba nibateeraho kwambusya obwato aha nyanja ya Garilaaya omu eihunga ry’amaani nyekiro. Ku baabaire bari aho, baareeba Yesu naagyendera aha nyanja. Petero akeeta Yesu, yaamushaba kugyendera aha maizi kuza ahu yaabaire ari. Yesu ku yaamwikiriize, Petero akaruga omu bwato reero omu muringo gw’eky’okutangaaza yaagyendera aha maizi kushanga Yesu. Kwonka bwanyima y’akaire kakye, Petero akatandika kutobera. Ahabw’enki? Akareeba eihunga, yaatiina. Petero akatakira Yesu, reero Yesu yaagorora omukono gwe yaamukwata yaamugira ati: ‘Iwe oine okwikiriza kukye, ahabw’enki noobanganisa?’—Mat. 14:24-32.

2. Nituza kushwijuma ki?

² Ka tushwijume ebintu bishatu ebirikukwata aha kwikiriza kwa Petero: (1) oku Petero yaabandize kwikiririza omu maani ga Ruhanga, (2) ahabw’enki okwikiriza kwa Petero kwatandikire kutuuba, kandi (3) niki ekyahwereire Petero kugaruka kugira okwikiriza. Okushwijuma ebintu bishatu ebi nikubaasa kutuhwera ‘kuhamira omu kwikiriza.’—1 Kor. 16:13.

3. Ahabw’enki Petero yaatemburukire omu bwato kandi itwe tukozire tuta ekirikushushana n’ekyo?

³ Obu Petero yaaruga omu bwato kugyendera aha maizi akakikora ahabw’okwikiriza. Yesu niwe yaabaire naamweta, kandi Petero akaba naamanya ngu Ruhanga naija kukoresa amaani ge kumushagika nk’oku yaashagikire Yesu. Nikyo kimwe, naitwe tukeehayo ahari Yehova kandi twabatizibwa, ahabw’okwikiriza kwaitu. Yesu akatweta kuba abakuratsi be, kugyendera omu bigyere bye. Tukaikiririza omuri Yesu na Ruhanga, turikuhamya ngu nibaija kutushagika omu miringo mingi.—Yoh. 14:1; shoma 1 Petero 2:21.

4, 5. Ahabw’enki okwikiriza kiri ekintu ky’omuhendo?

⁴ Buzima okugira okwikiriza n’ekintu ky’omuhendo. Nk’oku okwikiriza kwa Petero kwamubaasiise kugyendera aha maizi, okwikiriza kwaitu nikutubaasisa kukora ebintu ebirikureebeka nk’ebitarikubaasika aha bantu. (Mat. 21:21, 22) Nk’eky’okureeberaho, baingi ahariitwe tuhindwire emitwarize, emiteekateekyere, emicwe, n’ebikorwa byaitu kyareetera n’abaabaire nibatumanya kwenda kutwebwa. Yehova naatushagika ahabw’okugira ngu nitumwikiririzamu. (Shoma Abakolosai 3:5-10.) Okwikiriza ku kwatuhigire kwehayo ahari Yehova, tukaba banywani be, ekintu eki tutarikubaasize kukora ahabw’amaani gaitu.—Efe. 2:8.

⁵ Okwikiriza kwaitu nikwongyera kutureetera kuhama. Ahabw’okwikiriza nitubaasa kwangira emitego y’Omuregi omuzigu waitu orikukirayo. (Efe. 6:16) Okwongyera ahari ekyo, okwikiririza omuri Yehova nikutuhwera kuterarikirira munonga omu bwire bw’oburemeezi. Yehova naturaganisa ngu twabanza kusherura Obukama bwe ahabw’okwikiriza, naija kutuha byona ebi turikwetenga. (Mat. 6:30-34) Ahabw’okugira okwikiriza, nitwija n’okutunga ekiconco eki omuntu atarikubaasa kutunga ahabwe, nigo magara agatahwaho.—Yohaana 3:16.

6, 7. (a) Niki eki turikubaasa kugyeragyeranisa n’omuyaga n’ebingonzi ebyabaire byehinguririize Petero? (b) Ahabw’enki okwikiriza kwaitu kurikubaasa kutuuba?

⁶ Omuyaga n’ebingonzi ebyabaire byehinguririize Petero arikugyendera aha maizi, nibibaasa kugyeragyeranisibwa n’okugyezibwa n’okwohibwa okurikutuhikaho omu kuheereza Ruhanga. N’obu n’okugyezibwa nari okwohibwa kwakuba kuri okw’amaani, nitubaasa kukwemera ahabw’obuhwezi bwa Yehova. Ijuka ngu Petero taratobeire ahabw’omuyaga nainga ebingonzi by’amaani. Teekateeka aha byabaireho: “Ku yaareebire omuyaga gwaba mwingi, yaatiina.” (Mat. 14:30) Petero akahuga tiyaata mutima gwe ahari Yesu, ekyarugiremu okwikiriza kwe kutuuba. Nitubaasa kutandika kuba nk’abarikutobera ‘twareeba omuyaga gwaba mwingi,’ tutandikye kuteekateeka aha maani gaagwo tubanganise obushagiki bwa Yehova.

⁷ Tushemereire kumanya ngu okwikiriza kwaitu nikubaasa kutuuba, ahakuba Baibuli neegamba aha kutagira kwikiriza ‘nk’ekibi ekitwezingiriire.’ (Heb. 12:1) Nk’oku kyahikire ahari Petero, okwikiriza kwaitu nikubaasa kutuuba twata omutima aha bintu ebitahikire. Mbwenu shi nitubaasa kumanya tuta ngu ekyo kiri haihi kutuhikaho? Yetegyereze ebibuuzo ebi turikubaasa kukoresa kweshwijuma.

8. Ebi Ruhanga arikuraganisa nibibaasa kuba bita nk’ebitari byabuzima ahariitwe?

⁸ Ebiraganiso bya Ruhanga tinkibitwara nk’ebyabuzima? Nk’eky’okureeberaho, Ruhanga aragaaniise kucwekyereza ensi egi  embi. Kwonka shi, nitwikiriza ebintu by’ensi egi eby’okweshemeza kutuubya okwikiriza kwaitu? Nitubaasa kutandika kubanganisa ngu emperu eri haihi. (Hab. 2:3) Eki n’eky’okureeberaho ekindi. Ruhanga akaturaganisa kutusaasira ebibi byaitu kurabira omu kitambo. Kwonka twatandika kuta omutima aha nshobe ezi twakozire enyima, nitubaasa kubanganisa yaaba Yehova yaatusaasiire ebibi byaitu byona. (Byak. 3:19) Ekirikurugamu, okushemererwa kwaitu omu kuheereza Ruhanga nikubaasa kutuuba turekyere aho kubuurira.

9. Niki ekirikubaasa kubaho twateekateeka munonga aha kusherura ebintu?

⁹ Nkiri omweziriki omu kuheereza Ruhanga nk’oku naabaire ndi ira? Entumwa Paulo akooreka ngu okuheereza Ruhanga twine obweziriki nikitureetera “kugira amatsiko tutarikubanganisa okuhitsya aha muheru.” Kwonka shi niki ekirikubaasa kubaho twatandika kuta omutima aha kwesherurira ebyaitu, nk’okutunga omurimo gw’esente nyingi kwonka ogurikuturemesa kwejumba omu kuramya? Okwikiriza kwaitu nikubaasa kutuuba, reero “tube abarikweganda,” tuhe Yehova kakye kukira oku embeera zaitu zirikutubaasisa.—Heb. 6:10-12.

10. Nitworeka tuta ngu nitwikiririza omuri Yehova twasaasira abandi?

¹⁰ Ningumirwa kusaasira abarikunshobeza? Abantu baatukora kubi nitubaasa kubagambuura nari twetantare kugamba n’abo. Kwonka, twasaasira abandi nitworeka ngu nitwikiririza omuri Yehova. Mu muringo ki? Abarikutushobeza nibaba baine eibanja ahariitwe, nk’oku naitwe ebibi byaitu birikutureetera kugira eibanja ahari Ruhanga. (Luk. 11:4) Twasaasira abandi, twine kugira obwesigye ngu okusiimwa Ruhanga ahabw’okubasaasira nikukira okubareka bakaguma bari nk’abaine eibanja. Abeegi ba Yesu bakaba  nibamanya ngu okusaasira abandi nikyetengyesa okugira okwikiriza. Ku yaabagambire ngu baine kusaasira ababashobereize emirundi mingi, bakamweshengyereza bati: “Twongyereho okwikiriza.”—Luk. 17:1-5.

11. Ahabw’enki nitubaasa kutagasirwa omu kuhanwa okurikutuheebwa kuruga omu Byahandiikirwe?

¹¹ Ninguubwa kubi ku barikumpana barikukoresa Ebyahandiikirwe? Omu mwanya gw’okureeba ebirungi ebiri omu kuhanwa, nitubaasa kuta omutima aha nshobe eziri omu kuhana nari ez’omuntu orikutuhana. (Enf. 19:20) N’ahabw’ekyo nitubaasa kufeerwa omugisha gw’okugira emiteekateekyere nk’eya Ruhanga.

12. Nikiba nikyoreka ki omuntu yaaguma naayetomboitera abu Ruhanga arikukoresa kwebembera abantu be?

¹² Niinyetomboitera abaine obujunaanizibwa omu kibiina? Abaisraeli ku baataire omutima aha makuru mabi agareetsirwe entatsi ikumi, bakatandika kwetomboitera Musa na Arooni. Yehova akabuuza Musa ati: “Baryahitsya hi okutanyikiriza?” (Kub. 14:2-4, 11) Buzima, okwetomboita kwa Baisraeli kukooreka ngu tibarikwesiga Ruhanga, owaabaire atooraine Musa na Arooni. Nikyo kimwe, ku turikuguma nitwetomboitera abo abu Ruhanga arikukoresa kwebembera ekibiina kye, nikyoreka ngu okwikiriza kwaitu omuri Ruhanga kutuubire.

13. Ahabw’enki tutashemereire kuhwa amaani twashanga ngu twine obweremwa omu kwikiriza? 

¹³ Kwonka, otakaahwa amaani waayeshwijuma okashanga oine obweremwa omu kwikiriza. Entumwa Petero, nawe akagira okutiina n’okubanganisa. Obumwe, Yesu akahana abeegi be boona ahabw’okugira “okwikiriza kukye.” (Mat. 16:8) Guma noijuka ngu hariho eki turikubaasa kwegyera ahari Petero obu okwikiriza kwe kwatuuba reero akatandika kutobera omu nyanja.

14, 15. (a) Petero akakora ki ku yaatandikire kutobera? (b) N’obu turaabe tutarikureeba Yesu, nitubaasa kuguma tumuhangire amaisho tuta?

¹⁴ Petero ku yaarebire omuyaga kandi akatandika kutobera, ashemereire kuba yaateireho kugaruka enyima omu bwato. Akaba naamanya kuziha, n’ahabw’ekyo ashemereire kuba yaateekateekire aha kugaruka enyima. (Yoh. 21:7) Kwonka, omu mwanya gw’okweyesiga, akagaruka yaata omutima ahari Yesu kandi yaikiriza obuhwezi bwe. Twayetegyereza ngu okwikiriza kwaitu kuriyo nikutuuba, twine kutooreza Petero. Kwonka eki nitubaasa kukikora tuta?

¹⁵ Nk’oku Petero yaataire omutima ahari Yesu, naitwe ‘amaisho tugahangye Yesu wenka, owaatandikire okwikiriza kwaitu kandi omuhikiiriza waakwo.’ (Heb. 12:2, 3) Buzima, titurikubaasa kureeba Yesu nka Petero. Kureka, itwe ‘amaisho nitugahanga’ Yesu turikushwijuma enyegyesa ze n’ebikorwa bye kandi tukabigyendereho. Teekateeka ahari bimwe ebi turikubaasa kukora twatooreza Yesu. Twabikora, nitutunga obuhwezi kubaasa kuhamya okwikiriza kwaitu.

16. Nitubaasa kwega Baibuli tuta kubaasa kuhamya okwikiriza kwaitu?

¹⁶ Yeyongyere kwesiga Baibuli. Yesu akaba naahamiza kimwe ngu Baibuli n’Ekigambo kya Ruhanga ekirimu obuhabuzi oburikukirayo. (Yoh. 17:17) Kubaasa kutooreza Yesu, twine kushoma Baibuli buri izooba, tukagyega, kandi tukateekateeka aha bi turikwega. Waaba nooyega Baibuli, condooza aha bintu ebi orikubaasa kuba nooyebuuzaho. Nk’eky’okureeberaho, noobaasa kuhamya ngu emperu y’ensi egi eri haihi orikushwijuma Ebyahandiikirwe ebirikuhamya ngu turi omu biro by’emperu. Hamya okwikiriza kwawe omu ki Baibuli erikuraganisa aha biro by’omumaisho orikucondooza aha bunabi bwingi obwahikiriire. Yeyongyere kwesiga Baibuli  orikushwijuma eby’okureeberaho bya bamwe abu Baibuli ehwereire kuhindura emitwarize yaabo ekaba mirungi. *—1 Tes. 2:13.

17. Ahabw’enki Yesu yaagumire ari omwesigwa kandi noobaasa kumutooreza ota?

¹⁷ Ta omutima aha migisha ei Yehova arikuraganisa. Yesu “ahabw’okushemererwa okwatairwe omu maisho ge,” akabaasa kuguma ari omwesigwa n’obu yaabaire naagyezibwa munonga. (Heb. 12:2) Tarahugiibwe bintu by’ensi. (Mat. 4:8-10) Noobaasa kutooreza Yesu orikuteekateeka aha migisha ei Yehova arikukuraganisa. Noobaasa kuhandiika ebi orikwija kukora, Ruhanga ku araacwekyereze ensi egi embi. Noobaasa kuhandiika omubaro gw’abantu abu oyiniire ekihika kureeba ku baraazookye, n’eki orikwenda kugaaniira nabo. Reeba oku ebiraganiso ebi birikukugasira iwe nk’omuntu, beitu batari bantu boona okutwarira hamwe.

18. Okushaba nikubaasa kukuhwera kuta kuhamya okwikiriza kwawe?

¹⁸ Shaba Ruhanga kukwongyera okwikiriza. Yesu akeegyesa abeegi be kushaba Yehova omwoyo gwe gurikwera. (Luk. 11:9, 13) Omu kukora eki, shaba Ruhanga kukwongyera okwikiriza; ahabw’okuba n’omutwarize ogu omwoyo gurikutuhwera kugira. Shaba Ruhanga orikumugambira butunu, omushabe kukuhwera kusingura obweremwa oburikworeka ngu okwikiriza kwawe kutuubire, nk’okutasaasira abandi.

19. Twine kunywana abantu ba muringo ki?

¹⁹ Nywana abantu abaine okwikiriza. Yesu akaba naayegyendesereza omu kutoorana abanywani, okukira munonga abu yaahindwire banywani be ab’ahamara. Banywani be abaabuzima, nibo beegi be, bakooreka okwikiriza barikworebera ebiragiro bye. (Shoma Yohaana 15:14, 15.) N’ahabw’ekyo waaba nootoorana abanywani, sherura abantu abarikworeka okwikiriza kwabo barikworobera Yesu. Kandi oijukye ngu akamanyiso kakuru ak’omukago ogwabuzima, n’okugaaniira mutarikusherekana, nangwa eki n’obu kiraabe nikitwariramu okuhana nari okuhanwa.—Enf. 27:9.

20. Nitugasirwa tuta twahwera abandi kuhamya okwikiriza kwabo?

²⁰ Hwera abandi kuhamya okwikiriza kwabo. Omu bigambo n’omu bikorwa, Yesu akahwera abeegi be kuhamya okwikiriza kwabo. (Mak. 11:20-24) Tushemereire kumutooreza ahakuba okuhwera abandi kugira okwikiriza kuhami, nikihamya okwikiriza kwaitu. (Enf. 11:25) Waaba noobuurira kandi orikwegyesa abandi amazima, nooba noohamya ngu Ruhanga ariho, naatufaho, kandi ngu Baibuli n’Ekigambo kye. Hwera Ab’eishe-emwe na banyaanyazi-itwe kuhamya okwikiriza kwabo. Haagira owaayoreka okubanganisa, obundi arikwetomboitera ab’eishe-emwe abaine obujunaanizibwa, otakaarahuka kumwetantara. Omu mwanya gw’ekyo, muhwere omu bwengye kugaruka kugira okwikiriza. (Yud. 22, 23) Waaba ori omu ishomero ahu barikwegyesa ngu ebintu bikabaho kuruga omu bindi, n’obweziriki yoreka ngu noikiririza omu kuhangwa kw’ebintu, noobaasa kutangaara oku ebigambo byawe birikuhwera abandi.

21. Yehova aragaaniise ki buri muntu aha bikwatiraine n’okwikiriza?

²¹ Petero akabaasa kusingura obwoba n’okubanganisa arikuhwerwa Ruhanga kurabira omuri Yesu Kristo yaaba enyomyo y’okwikiriza aha Bakristaayo aba ira. Omu muringo nigo gumwe, Yehova naatuhwera twena kuhama omu kwikiriza. (Shoma 1 Petero 5:9, 10.) Okuteeraho kwaitu kw’okugira okwikiriza ti kwa busha, ahakuba ebirikurugamu tibirikubaasa kugyeragyeranisibwa n’ekintu kyona.