Nk’oku kirikworekwa omu kishushani ekiri ahari buryo, abantu baingi nibateekateeka ngu aha Izooba ry’Okucwa Orubanja obuhumbi bw’abantu nibaija kureetwa omu maisho g’ekitebe kya Ruhanga bacwerwe emanja kurugiirira aha bikorwa byabo eby’enyima, reero abamwe baheebwa amagara agatahwaho omu iguru, abandi banagwe omu muriro ogutarikuraara. Kwonka Baibuli neeyoreka ngu ekigyendererwa ky’Eizooba ry’Okucwa Orubanja n’okureetera abantu oburingaaniza. (Zaaburi 96:13) Ruhanga atooraine Yesu kuba Omuramuzi orikwija kureetera abantu oburingaaniza.—Shoma Isaaya 11:1-5; Ebyakozirwe 17:31.

Obu omushaija w’okubanza Adamu yaagomera Ruhanga nkana, akahunguza oruzaaro rwe rwona ekibi, okubonabona, n’okufa. (Abarooma 5:12) Yesu kubaasa kwihaho obutari buringaaniza obwo, naija kugaruraho amagara, nari azoore obuhumbi bw’abantu abaafiire. Ekitabo ky’Okushuuruurwa nikyoreka ngu eki nikiija kubaho omu myaka rukumi ei Kristo Yesu araamare arikutegyeka.—Shoma Okushuuruurwa 20:4, 11, 12.

Abaraazoorwe tibarikwija kucwerwa orubanja kurugiirira aha bikorwa byabo eby’enyima batakafiire, beitu aha bi barikwija kukora bwanyima y’okumanya ebiri ‘bitabo bisya’ nari emizingo misya erikugambwaho omu Okushuuruurwa eshuura 20. (Abarooma 6:7) Abaraazoorwe bakatunga omugisha gw’okwega ebirikukwata ahari Ruhanga nibatwariramu ‘abahikiriire n’abatahikiriire,’ nk’oku entumwa Paulo yaagizire.—Shoma Ebyakozirwe 24:15.

Abo abaafiire batakamanyire Yehova Ruhanga n’okumuheereza, nibaija kutunga omugisha gw’okuhindura emitwarize yaabo bakore ebirungi. Ekyo baakikora, okuzooka kwabo nikwija kuba ‘okuzookyera amagara.’ Kwonka bamwe abaraazoorwe, nibaija kuba batarikwenda kwega ebirikukwata aha mihanda ya Yehova. Okuzooka okwabo nikwija kuba ‘okuzookyera okucwerwa orubanja.’—Shoma Yohaana 5:28, 29; Isaaya 26:10; 65:20.

Emyaka rukumi y’okucwa orubanja yaaza kuhwa, Yehova naija kuba yaahaire abantu abarikumworobera okuhikiirira nk’oku yaabaire abahaire omu kubanza. (1 Abakorinso 15:24-28) Aga ka n’amatsiko g’omuhendo ag’abantu abarikumworobera! Ruhanga naija kukomoorora Sitaane Omuregi kumwiha omu kiina ahu araabe amazire emyaka rukumi, reero habeho okugyezibwa okw’aha muheru. Sitaane naija kugaruka kuteeraho kwiha abantu ahari Yehova, kwonka abo abaraayangire Sitaane nibaija kwesiimira amagara omu nsi ebiro byona.—Shoma Isaaya 25:8; Okushuuruurwa 20:7-9.

Kandi Baibuli neekoresa ebigambo “eizooba ry’okucwa orubanja” kumanyisa ebiraabeho entebeekanisa y’ensi egi yaaba neecwekyerezibwa. Eizooba ry’okucwa orubanja eri niriija kubaho ahonaaho nk’Omwegyemure gw’omu biro bya Noa, ogwacwekyereize abantu ababi boona. Ekirikushemeza, okucwekyerera ‘kw’abantu abatarikutiina Ruhanga’ nikwija kureetaho ensi ensya ‘eraabe erimu okuhikiirira.’—Shoma 2 Petero 3:6, 7, 13.