1, 2. Ahabw’enki Abajurizi ba Yehova baine omutindo gw’ahaiguru aha bikwatiraine n’enjwara? (Reeba ekishushani aha kutandika.)

ORUPAPURA rw’amakuru orwa Budaaci rukahandiika aha ruteerane rw’abeebembezi b’ediini ruti: ‘Abantu bakaba bajwaire kubi, na munonga obu haabaire hariho omushana mwingi.’ Kwonka ‘omu nteerane empango ez’Abajurizi ba Yehova tikwo birikuba bityo. Aboojo n’abashaija nibajwara ekooti n’etayi, kandi abaishiki n’abakazi nibajwara sikaati zishemeire n’obu ziraabe niziba ziri aha murembe.’ Buzima, Abajurizi ba Yehova nibakira kusiimwa ahabw’okujwara ‘ebijwaro ebibashemereire [ebirikuhaisa ekitiinisa], baine obucureezi n’okwerinda omu muringo ogushemereire abarikweyeta abarikutiina Ruhanga.’ (1 Tim. 2:9, 10) Entumwa Paulo akaba naagamba aha bakazi, kwonka omutindo nigwo gumwe nigukwata n’aha bashaija Abakristaayo.

² Emitindo ehikire erikukwata aha kujwara ni mikuru aha Bajurizi ba Yehova, kandi ni mikuru ahari Ruhanga ou turikuramya. (Kut. 3:21) Eki Ebyahandiikirwe birikugamba aha kujwara n’okweboneza, nibyoreka gye ngu Yehova aine emitindo mirungi erikukwata aha njwara eshemereire abaheereza be ab’amazima. N’ahabw’ekyo, oku turikucwamu kujwara n’okweboneza tikushemereire kuba nikwegamira aha birikutushemeza byonka. Kureka tushemereire n’okuteekateeka n’aha kirikushemeza Yehova.

3. Ebiragiro ebi Ruhanga yaahaire Abaisraeli nibitwegyesa ki aha njwara?

 ³ Nk’eky’okureeberaho, ebiragiro ebi Ruhanga yaahaire Abaisraeli hakaba harimu ebirikubarinda emitwarize mibi ey’amahanga agaabaire gabeetoroire. Ebiragiro bikaba nibyoreka ngu Yehova naayangira kimwe enjwara etarikworeka gye entaaniso eri aha gati y’omushaija n’omukazi. N’obunaku obu, abantu nibajwara emyenda nk’egyo etarikutaanisa omushaija n’omukazi. (Shoma Eky’Ebiragiro 22:5.) Kuruga omu biragiro ebyo, nitwega ngu Yehova tarikushemererwa yaareeba abashaija nibajwara emyenda erikubareebekyesa nk’abakazi, nari yaareeba abakazi nibajwara emyenda erikubareebekyesa nk’abashaija.

4. Niki ekirikubaasa kuhwera Abakristaayo kucwamu gye aha bikwatiraine n’ebi baine kujwara?

⁴ Ekigambo kya Ruhanga kirimu emisingye erikuhwera Abakristaayo kucwamu aha bikwatiraine n’enjwara. Emisingye egi neekora hoona ahu turikuba nitutuura, omu mbeera y’obwire yoona, n’omu nganda zoona. Tikirikwetengyesa kuheebwa omushororongo gw’ebiragiro ebirikukwata aha bijwaro ebi twine kujwara n’ebi tutashemereire kujwara. Omu mwanya gw’ekyo, emisingye erikutuhwera kwecweramu eki turikwenda eri omu Byahandiikirwe niyo erikutwebembera. Ka tushwijume emwe aha misingye ya Baibuli erikubaasa kutuhwera “kumanya gye ebi Ruhanga” arikukunda twaba nitucwamu ebi turaajware.​—Rom. 12:1, 2.

5, 6. Enjwara yaitu neekwata eta aha bandi?

⁵ Entumwa Paulo akooreka obukuru bw’omusingye oguri omu 2 Abakorinso 6:4. (Kishome.) Abantu nibabaasa kumanya emitwarize yaitu kurugiirira aha ku turikujwara. Abantu baingi nibatugiraho emiteekateekyere kurugiirira aha ‘mireebekyere yaitu ey’aharuguru.’ (1 Sam. 16:7) N’ahabw’ekyo obu turi abaheereza ba Ruhanga, okujwara tikirikumanyisa okujwara eki itwe turikukunda. Emisingye ei turikwiha omu Kigambo kya Ruhanga eshemereire kutuhiga kwetantara kujwara emyenda erikutukwatira aha mubiri, erikureeberwamu, nari erikushendashenda abantu kugira ekyetengo ky’okuteerana. Eki nikitwariramu okwetantara kujwara emyenda erikworeka ebicweka by’omubiri eby’omubonano. Tihaine oshemereire kwehurira kubi nari kugyemwa kureeba aha rubaju yaareeba oku tujwaire.

⁶ Twaba turi abeecumi, tujwaire gye, kandi tweboneize gye, abantu nibabaasa kutuha ekitiinisa ahabw’okuba abaheereza ba Yehova. Kandi nibabaasa kwenda kwija kuramya naitwe Ruhanga waitu. Kandi, enjwara yaitu nungi neija kuhaisa ekitiinisa ekibiina kyaitu eki turikujwekyera.

7, 8. Okukira munonga ni ryari obu twine kujwara ebishemeire?

⁷ Tushemereire kujwara gye ahabwa Ruhanga orikwera ou turikuramya, ab’eishe-emwe bagyenzi baitu, abantu abu turikubuurira, kandi n’ahabw’okwenda kuhaisa ekitiinisa amakuru marungi agu turikubuurira. (Rom. 13:8-10) Eki ni kikuru munonga twaba nitwejumba omu buheereza bw’Ekikristaayo, nk’okuza omu nteerane, nari twaba nitubuurira. Twine kujwara omu miringo “mirungi eshemereire [abantu] abeeyeta abarikutiina Ruhanga.” (1 Tim. 2:10) Kwonka, twine kwijuka ngu enjwara eshemeire omu kicweka ekimwe neebaasa kuba etashemeire ahandi. N’ahabw’ekyo, abaheereza ba Yehova nibafayo aha ntwaza y’ekicweka kugira ngu batateeza abandi entsibo.

⁸ Shoma 1 Abakorinso 10:31. Twaba turi omu nteerane empango, enjwara yaitu eine kuba eshemeire etarikworeka emishono eijwire  omu nsi erimu okurengyesereza. Nangwa n’obu turikuba nituza ahu turikuraara nari niturugayo, nari twaba turi omu bwire bw’okuhuumuramu oruteerane oruhango rutakatandikire nari rwahwa, twine kwetantara kujwara tutefeereireyo nari kujwara ebijabiiriire. Omu mwanya gw’ekyo, kishemereire kuba nikitwesiimisa kweyoreka ngu turi Abajurizi ba Yehova. Kandi nikiija kuba nikitworobera kubuurira twatunga omugisha.

9, 10. Ahabw’enki ebiri omu Abafilipi 2:4 bishemereire kukwata aha bi turikujwara?

⁹ Shoma Abafilipi 2:4. Ahabw’enki Abakristaayo baine kufayo oku ebijwaro byabo birikukwata aha b’eishe-emwe bagyenzi baabo? N’ahabw’okugira ngu abaheereza ba Ruhanga nibafayo munonga kugyendera aha kwehanangiriza kwa Baibuli oku: “Mwite eby’ensi ebiri omu ngingo zaanyu, obushambani, ebihagaro, okurigira okubi.” (Kol. 3:2, 5) Titurikwenda kureetera ab’eishe-emwe bagyenzi baitu kugumirwa kworobera obuhabuzi obu. Ab’eishe-emwe n’abanyaanyazi-itwe abaabaire nibeejumba omu bikorwa by’obushambani, nibabaasa kuba nibakirwanisa ebyetengo bibi. (1 Kor. 6:9, 10) N’ahabw’ekyo titurikwenda kwongyera kugumisa okurwana kwabo.

¹⁰ Twaba turi n’ab’eishe-emwe, twine kujwara omu muringo ogurikureetera ekibiina kuba omwanya murungi ogw’emicwe eshemeire. Eki kishemereire kuba nikwo kyaba twaba turi omu nteerane nari omu mbeera ezindi ezitari ez’eby’omwoyo. Twine obugabe bw’okucwamu eki turaajware. Kwonka nabwo, twine obujunaanizibwa bw’okujwara emyenda erikureetera abandi kworoberwa kuguma bashemeire, n’okworobera emitindo ya Ruhanga erikwera omu  biteekateeko, ebigambo, n’ebikorwa. (1 Pet. 1:15, 16) Okukunda okwabuzima tikurikutwaza kubi kandi “tikwesherurira byakwo.”​—1 Kor. 13:4, 5.

11, 12. Tushemereire kugira miteekateekyere ki emirungi twaba nitucwamu ebi turaajware?

¹¹ Abaheereza ba Ruhanga baaba nibacwamu ebi baraajware, nibaijuka ngu “buri kintu na buri murimo [biine] obunaku bwabyo.” (Mub. 3:1, 17) Nikyetegyerezibwa ngu nitubaasa kujwara omu muringo ogurikuhikaana n’embeera y’obwire eriho. Nikyo kimwe n’embeera zitarikushushana ezi turikutuuramu. Kwonka embeera y’obwire terikuhindura emitindo ya Yehova.​—Mal. 3:6.

¹² Omu bwire bw’omushana, nikibaasa kuguma kujwarwa gye n’okweboneza omu muringo ogurikuhaisa ekitiinisa, ogushemeire, kandi ogurikworeka okwetegyereza. N’ahabw’ekyo, ab’eishe-emwe nibasiima twayetantara kujwara emyenda erikutukwata munonga, nari emihango munonga erikureeberwamu. (Yob. 31:1) Kandi, twaba tuhuumwireho aha nyanja, nari tugiire kwibira, ebijwaro ebi turikujwara kuza kwibira biine kuba bishemeire. (Enf. 11:2, 20) N’obu baingi omu nsi baraabe nibajwara ebirikureeberwamu baaba nibaza kwibira, itwe abarikuheereza Yehova nitufayo kutajumisa Ruhanga orikwera ou turikukunda.

13. Ahabw’enki obuhabuzi oburi omu 1 Abakorinso 10:32, 33 bushemereire kukwata aha njwara yaitu?

¹³ Hariho ogundi omusingye mukuru ogurikutuhwera kutoorana emyenda eshemeire. Omusingye ogu nigutuhiga kufayo aha muntu w’omunda ow’abandi yaaba n’ab’eishe-emwe nari ngaaha. (Shoma 1 Abakorinso 10:32, 33.) Obujunaanizibwa bwaitu obw’okwetantara emyenda erikubaasa kuteeza abandi entsibo tushemereire kubutwara nka bukuru. Paulo akahandiika ati: “Omuntu weena omuriitwe ashemeze mutaahi we, amukwatse omu birungi” eby’okumwombeka. Kandi akoongyeraho ati: “Ahakuba na Kristo tareeshemeize wenka.” (Rom. 15:2, 3) Buzima, Yesu akeebembeza okuhwera abandi omu mwanya gw’okufayo aha bye wenka, kandi okuhwera abandi kikaba kiri kikuru omu kukora ebi Ruhanga arikukunda. N’ahabw’ekyo, nitwija kwefeerereza ebintu n’emishono y’okujwara ei turikukunda, kwonka erikubaasa kuremesa abantu abu turikubuurira.

14. Abazaire nibabaasa kutendeka bata abaana baabo kuhimbisisa Ruhanga omu micwe n’enjwara?

¹⁴ Abazaire Abakristaayo baine obujunaanizibwa bw’okwegyesa amaka gaabo kugyendera aha misingye ya Baibuli. Eki nikitwariramu okuhamya ngu bo n’abaana baabo nibateeraho kushemeza Ruhanga barikujwara kandi bakeeboneza omu muringo murungi. (Enf. 22:6; 27:11) Abazaire nibabaasa kuta omu baana baabo omutima gw’okukunda Ruhanga orikwera ou turikuramya barikubateeraho eky’okureeberaho kirungi, kandi bakabaha obuhabuzi omu muringo gwa rukundo. Ka nikiba kiri kirungi abazaire kwegyesa abaana oku barikubaasa kutunga ebijwaro birungi n’ahu barikubaasa kubiiha! Eki tikirikumanyisa ngu ebi barikukunda byonka, beitu n’ebiraababaasise kuhikiiriza obujunaanizibwa bwabo obw’okujwekyera Yehova Ruhanga.

15. Niki ekishemereire kutwebembera omu kucwamu ebi turaajware?

¹⁵ Ekigambo kya Ruhanga kirimu obuhabuzi oburikutuhwera kucwamu gye tukahaisa Ruhanga ekitiinisa. Kwonka, ebi turikujwara nibitwariramu ebi turikuba nitukunda. Ebi turikukunda nibitaana kurugiirira aha sente ezi turikuba twine. Kwonka  ebijwaro byaitu butoosha bishemereire kuba biboneire, bicumire gye, bishemeire, birikuhikaana n’omukoro, kandi birikwikirizibwa omu kicweka.

16. Ahabw’enki okuteeraho kwaitu kujwara gye kitari kya busha?

¹⁶ Tikyorobi butoosha kucwamu ebirikworeka okwetegyereza, eby’oburyo, kandi ebirikworeka ngu nitubanza twateekateeka aha nshonga zoona. Amaduuka maingi nigaba garimu emyenda ey’emishono ehangire, n’ahabw’ekyo nikibaasa kutwara obwire n’amaani kutunga sikaati, ebiteeteeyi, na burawuzi, nari suuti, n’empare ebitarikutukwata munonga. Kwonka, ab’eishe-emwe bagyenzi baitu nibasiima okuteeraho kwaitu kutunga ebijwaro ebirikushemeza kandi ebishemeire. Kandi okumarwa oku twine ahabw’okuhaisa ekitiinisa Tataitwe ow’omu iguru, nikukirira kimwe ebi turikwefeerereza aha bikwatiraine n’enjwara.

17. Ni nshonga ki ezi ow’eishe-emwe arikubaasa kwihiriraho kugira ebireju?

¹⁷ Mbwenu shi kihikire kugira ebireju? Ebiragiro bya Musa bikaba nibyetengyesa ngu abashaija babe baine ebireju. Kwona, Abakristaayo tibari hansi y’ebiragiro bya Musa kandi tikirikubetengyesa kukwata ebiragiro ebyo. (Lev. 19:27; 21:5; Gal. 3:24, 25) Omu mahanga agamwe, ebireju ebishazire gye nibiikirizibwa kandi nibiheebwa ekitiinisa, kandi tibirikuhaisa eiziina ribi obutumwa bw’Obukama. Omu mahanga agamwe nangwa n’ab’eishe-emwe abamwe abaine obujunaanizibwa omu kibiina, nibaba baine ebireju. N’obu kiraabe kiri kityo, ab’eishe-emwe abamwe nibacwamu kutagira ebireju. (1 Kor. 8:9, 13; 10:32) Kwonka omu mahanga agandi, ti mucwe gwabo kukuza ebireju, n’ahabw’ekyo Abakristaayo abari omu mahanga ago tibarikugira bireju. Kandi omu mahanga ago ow’eishe-emwe yaaba aine ebireju nikireebwa nk’ekitarikuhimbisisa Ruhanga, kandi naba aine eki arikugaywaho.​—Rom. 15:1-3; 1 Tim. 3:2, 7.

18, 19. Ebiri omu Miika 6:8 nibituhwera bita kujwara omu muringo ogurikushemeza Ruhanga?

¹⁸ Ka nikitushemeza munonga kureeba ngu Yehova tarikutuha mushororongo gw’ebiragiro ebirikukwata aha njwara n’okweboneza. Omu mwanya gw’ekyo, atwikiriize kukoresa obugabe bwaitu kucwamu gye, kandi obugabe bwaitu bwine kwegamira aha misingye y’Ebyahandiikirwe. N’ahabw’ekyo, n’aha bikwatiraine n’enjwara n’okweboneza nitwenda ‘kugyenda na Ruhanga waitu n’obucureezi.’​—Mik. 6:8.

¹⁹ Obucureezi bwaitu nibutureetera kumanya ngu Yehova n’oshemeire, orikwera, kandi ngu emitindo ye niyo erikutuhabura gye. Nituba abacureezi turikugyendera aha mitindo ye. Kandi obucureezi nibutwariramu okuha abandi ekitiinisa ahabw’enyehurira zaabo n’ebiteekateeko byabo. N’ahabw’ekyo, ‘nitugyenda na Ruhanga waitu n’obucureezi’ turikuhikaanisa emitwarize yaitu n’emitindo ye, kandi turikworeka ngu nituha ekitiinisa enyehurira n’emiteekateekyere y’abandi.

20. Enjwara yaitu n’oku turikweboneza nibikwata bita aha bandi?

²⁰ Enjwara yaitu teshemereire kureetera abantu kuteekateeka okundi, kureka baine kumanya ngu turi abaheereza ba Yehova. Ab’eishe-emwe n’abantu abandi okutwarira hamwe, bashemereire kureeba ngu buzima nitujwekyera Ruhanga waitu ohikiriire. Aine emitindo erikukirayo, kandi nitushemererwa kujwara omu muringo ogurikuhikaana nayo. Nitusiima munonga ab’eishe-emwe na banyaanyazi-itwe abu endeebeka yaabo erikushemeza Yehova, kandi ekareetera abantu kusiima obutumwa oburi omu Baibuli. Okucwamu gye aha njwara nikiija kugumizamu kuhimbisisa ogwo “ojwaire ekitiinisa n’obukuru.”​—Zab. 104:1, 2.