1-2. Kurugiirira ahari Matayo 5:11, twine kutwara tuta okugyezibwa?

YESU akaraganisa abakuratsi be ngu bakaba nibaija kugira okushemererwa okwabuzima. Kandi nabwo akarabura ngu abarikumukunda nibaija kugyezibwa. (Mat. 10:22, 23; Luk. 6:20-23) Okuba abeegi ba Kristo nikitureetera kugira okushemererwa. Kwonka shi nitwehurira tuta twateekateeka aha kuhiiganisibwa abanyabuzaare, gavumenti, abakozi bagyenzi baitu, nari abu turikushoma nabo baatugyemesereza kukora ekigwire? Amazima gari ngu embeera nk’ezo nizitwerarikiriza.

² Abantu tibarikuteekateeka ngu okuhiiganisibwa nikurugamu okushemererwa. Kwonka, Ekigambo kya Ruhanga nikituhiga kushemererwa twaba nituhiiganisibwa. Nk’eky’okureeberaho, Yakobo akahandiika ngu omu mwanya gw’okurengwa amaganya, tushemererwe twaba nitugyezibwa. (Yak. 1:2, 12) Kandi Yesu akagira ngu tushemereire kushemererwa twaba nituhiiganisibwa. (Shoma Matayo 5:11.) Nitubaasa kuguma tuta tushemereirwe n’obu twakuba nituhiiganisibwa? Nitubaasa kwega kihango twayetegyereza gye bimwe ebi Yakobo yaahandiikiire Abakristaayo aba ira. Ka tubanze tureebe oburemeezi obu Abakristaayo abo baatungire.

3. Niki ekyabaireho ahonaaho Yakobo aherize kuba omwegi wa Yesu?

³ Bwanyima ya Yakobo murumuna wa Yesu kuba omwegi, Abakristaayo omuri Yerusaalemu bakatandika kuhiiganisibwa. (Byak. 1:14; 5:17, 18) Kandi Stefano ku yaitsirwe, Abakristaayo baingi bakahunga omu rurembo “boona baataataanira omu  byanga bya Buyudaaya na Samaria,” baahika n’omu Kupuro na Antiokia. (Byak. 7:58–8:1; 11:19) Nitubaasa kuteekateeka aha mbeera zigumire ezi baabaire baine kwemera. Kwonka, bakabuurira amakuru marungi n’ekihika hoona ahu baabaire baza, kandi baatandikaho n’ebibiina omu matware ga Rooma goona. (1 Pet. 1:1) Kwonka Abakristaayo aba bakaba nibaija kuhikwaho oburemeezi bwingi.

4. Ni buremeezi ki obundi obu Abakristaayo aba ira baabaire baine kwemera?

⁴ Abakristaayo aba ira bakaba baine kwemera okugyezibwa kw’emiringo mingi. Nk’eky’okureeberaho, omu mwaka nk’ogwa 50 Y.A.K., Kulaudio omutegyeki wa Rooma akaragiira Abayudaaya boona kuruga omuri Rooma. N’ahabw’ekyo Abayudaaya Abakristaayo bakaba baine kutsigaho amaka gaabo bakaza ahandi. (Byak. 18:1-3) Nk’omu gwa 61 Y.A.K., entumwa Paulo akahandiikira Abakristaayo bagyenzi be abaabaire nibahiiganisibwa butunu, batairwe omu bihome, kandi banyagirweho n’ebintu byabo. (Heb. 10:32-34) Abakristaayo nk’abandi bantu, bakaba baine kwemera obworo n’endwara.​—Rom. 15:26; Fil. 2:25-27.

5. Nituza kugarukamu bibuuzo ki?

⁵ Obu Yakobo yaahandiika ebaruha ye omwaka gwa 62 Y.A.K., gutakahikire, akaba naamanya gye okugyezibwa kw’ab’eishe-emwe. Yehova akahwera Yakobo kuhandiikira Abakristaayo abo kubaha obuhabuzi oburikukora, kubahwera kuguma bashemereirwe omu kugyezibwa kwabo. Ka tushwijume ebaruha ya Yakobo reero tugarukyemu ebibuuzo ebi: Okushemererwa oku Yakobo yaahandiikireho ni kuuha? Niki ekirikubaasa kuremesa Omukristaayo kuguma ashemereirwe? Kandi, obwengye, okwikiriza, n’obumanzi nibibaasa  kukuhwera bita kuguma oshemereirwe waaba noogyezibwa?

6. Kurugiirira ahari Luka 6:22, 23, ahabw’enki Abakristaayo nibashemererwa baaba nibagyezibwa?

⁶ Abantu nibabaasa kuteekateeka ngu nibashemererwa baaba baine amagara marungi, esente nyingi, n’okukwatanisa omu ka. Kwonka okushemererwa oku Yakobo yaahandiikireho n’omutwarize gw’ekyana ky’omwoyo gurikwera kandi tikurikurugiirira aha mbeera ezi turimu. (Gal. 5:22) Omukristaayo naatunga okushemererwa nari obunanukye bw’omu mutima ahabw’okumanya ngu naashemeza Yehova, kandi naakuratira eky’okureeberaho kya Yesu. (Shoma Luka 6:22, 23; Kol. 1:10, 11) Okushemererwa kw’Omukristaayo ni nk’omuriro ogurikwakira omu taara y’ekirahuri. Tikurikuhwaho n’obu yaakurwara nari esente zaatuuba. Kandi okujumwa nari okuhiiganisibwa abanyabuzaare tikurikumaraho okushemererwa oku. Kureka, nikweyongyera abantu baateeraho kuturemesa kukugira. Ebigyezo ebi turikurabamu ahabw’okwikiriza kwaitu n’obuhame ngu turi abeegi ba Kristo abaabuzima. (Mat. 10:22; 24:9; Yoh. 15:20) Niyo nshonga ahabw’enki, Yakobo yaahandiikire ati: “B’eishe-emwe, ku muraagume mwahikwaho okugyezibwa kw’emiringo etari emwe, mukutware nk’okushemererwa buzima.”​—Yak. 1:2.

7-8. Niki ekirikuhika aha kwikiriza kwaitu kwagyezibwa?

⁷ Yakobo naayoreka enshonga endiijo ahabw’enki Abakristaayo nibaba beeteekateekire kuraba omu kugyezibwa kw’emiringo mingi. Naagira ati: ‘Okugyezibwa omu kwikiriza kwanyu nikurugamu okugumisiriza.’ (Yak. 1:3) Okugyezibwa ni nk’omuriro ogurikukoresibwa omu kuheesha ekyoma. Ekyoma kyayokibwa omu muriro reero bakakihoza n’amaizi, nikyongyera kuguma. Nikyo kimwe, twagumisiriza omu kugyezibwa, okwikiriza kwaitu nikwongyera kuhama. Niyo nshonga ahabw’enki Yakobo yaahandiikire ati: “Murekye okugumisiriza kuhitsye omurimo gwako, naimwe mubone kuba abahikire omuri byona.” (Yak. 1:4) Twamanya ngu ebigyezo nibihamya okwikiriza kwaitu, nitubaasa kugumisiriza tushemereirwe.

⁸ Yakobo omu baruha ye, akooreka n’ebirikubaasa kutuubya okushemererwa kwaitu. Ni biiha ebi, kandi nitubaasa kubisingura tuta?

9. Ahabw’enki twine kugira obwengye?

⁹ Oburemeezi: Okutamanya eky’okukora. Omu kugyezibwa, twine kushaba Yehova kutuhwera kucwamu ebirikumushemeza, ebirikuhwera ab’eishe-emwe, n’ebirikutuhwera kuguma  turi abeesigwa ahariwe. (Yer. 10:23) Twine kugira obwengye oburaatuhwere kumanya eky’okukora n’oku turagarukyemu abarikutuhakanisa. Twaba tutarikumanya eky’okukora, nitubaasa kwereeba nk’abataine kihwera, kandi okushemererwa kwaitu nikubaasa kuhwaho.

10. Ebiri omu Yakobo 1:5, nibituhiga kukora ki kubaasa kutunga obwengye?

¹⁰ Eky’okukora: Shaba Yehova obwengye. Kubaasa kuguma tushemererwe twaba nitugyezibwa, twine kubanza kushaba Yehova kutuha obwengye bw’okucwamu gye. (Shoma Yakobo 1:5.) Twine kukora ki twaba nituteekateeka ngu Yehova tarikugarukamu okushaba kwaitu ahonaaho? Yakobo naagira ngu twine kugumizamu ‘nitushaba.’ Yehova tarikuguubwa kubi twaguma nitumushaba obwengye. Tataitwe ow’omu iguru n’efura omu kuha abantu, twamushaba naatuha obwengye bw’okwemera okugyezibwa. (Zab. 25:12, 13) Naamanya oburemeezi bwaitu, aine esaasi, kandi naayenda kutuhwera. Ekyo buzima, ka nikitureetera okushemererwa kwingi! Yehova naatuha ata obwengye?

11. Twine kukora ki ekindi kubaasa kugira obwengye?

¹¹ Yehova naatuha obwengye kurabira omu Kigambo kye. (Enf. 2:6) Kubaasa kutunga obwengye obwo, twine kwega Baibuli n’ebitabo ebirikugishoboorora. Kwonka twine kukora ekirikukira aha kutunga okumanya kwingi. Twine kuta omu nkora obuhabuzi obu Ruhanga arikutuha. Yakobo akahandiika ati: “Mube abarikworobera Ekigambo, beitu ti kukihurira kwonka.” (Yak. 1:22) Twagyendera aha buhabuzi bwa Ruhanga, nitwongyera kuba ab’obusingye, ab’oburyo, n’abanyambabazi. (Yak. 3:17) Emitwarize egyo neetuhwera kwemera okugyezibwa n’okuguma tushemereirwe.

12. Ahabw’enki ni kikuru kumanya gye Baibuli?

¹² Ekigambo kya Ruhanga nikikora nk’endeeberwamu, nikituhwera kumanya ahu  twine kukora empinduka. (Yak. 1:23-25) Nk’eky’okureeberaho, twaheza kukyega, nitubaasa kwetegyereza ngu twine kutegyeka ekiniga kyaitu. Turikuhwerwa Yehova, nitwega oku turikubaasa kuguma tucureire twaba nitukoragana n’abantu nari twatunga oburemeezi. Twaba tucureire, nitwemera okugyemeserezibwa kwona. Eki nikituhwera kuteekateeka gye n’okucwamu gye. (Yak. 3:13) Ka ni kikuru ngu tumanye gye Baibuli!

13. Ahabw’enki twine kwetegyereza abo abarikugambwaho omu Baibuli?

¹³ Obumwe nitwega kwetantara oburemeezi bwanyima y’okukora enshobe. Kwonka okwo n’okwega omu muringo gugumire. Omuringo murungi gw’okutunga obwengye n’okwegyera aha businguzi bw’abandi n’enshobe zaabo. Niyo nshonga ahabw’enki Yakobo naatuhiga kwetegyereza abarikugambwaho omu Baibuli nk’Abrahamu, Rahabu, Yobu, na Eliya. (Yak. 2:21-26; 5:10, 11, 17, 18) Abaheereza ba Yehova aba abeesigwa bakeemera oburemeezi obwabaire nibubaasa kubaremesa kushemererwa. Okugumisiriza kwabo nikworeka ngu naitwe nitubaasa kukikora turikuhwerwa Yehova.

14-15. Ahabw’enki tutashemereire kwehuzya okubangaanisa?

¹⁴ Oburemeezi: Waaba noobangaanisa. Obumwe, nitubaasa kugumirwa kwetegyereza ebintu ebimwe ebiri omu Baibuli. Nari Yehova naabaasa kutagarukamu okushaba kwaitu nk’oku turikwenda. Eki nikibaasa kureetaho okubangaanisa. Twaguma nitubangaanisa, okwikiriza kwaitu nikwija kutuuba kandi omukago gwaitu na Yehova gusiisikare. (Yak. 1:7, 8) Kandi okubangaanisa nikubaasa kutureetera kutagira amatsiko aha by’omumaisho.

¹⁵ Entumwa Paulo akagyeragyeranisa amatsiko gaitu n’ekitsibo. (Heb. 6:19) Ekitsibo nikihamya emeeri omu bwire bw’eihunga kutahaba ekatomera enkiri. Kwonka ekitsibo nikihwera, orujegyere orurikukikwatanisa n’emeeri rwaba rutacwekire. Nk’oku omukyereenyo gurikumara orujegyere amaani, nikwo n’okubangaanisa kurikutuubya okwikiriza kwaitu. Orikubangaanisa yaahiiganisibwa, naabaasa kutaguma naikiriza ngu Yehova naija kuhikiiriza ebi arikuraganisa. Okwikiriza kwaitu kwatuuba, n’amatsiko gaitu nigatuuba. Nk’oku Yakobo yaagambire, orikubangaanisa “naashusha nk’ekingonzi ky’enyanja ekirikutwarwa omuyaga oku n’oku.” (Yak. 1:6) Ori omu mbeera nk’egyo naaba ataine kushemererwa na kakye!

16. Twine kukora ki twaba nitubangaanisa?

¹⁶ Eky’okukora: Yeihemu okubangaanisa, hamya okwikiriza kwawe. Rahuka kucwamu. Obu Eliya yaabaire ari nabi, abaheereza ba Yehova bakaba nibabangaanisa aha bi barikwikiriza. Eliya akabagira ati: ‘Nimwija kuhitsya hi n’okugira emitima ebiri? [Yehova] ku araabe ari Ruhanga, mumukuratire, nari Baali ku araabe ari Ruhanga, mube niwe mwakuratira!’ (1 Bag. 18:21) N’obunaku obu nikwo kiri. Twine kucoondoza kubaasa kwetungira obuhame ngu Yehova ni Ruhanga, Baibuli n’Ekigambo kye, kandi ngu Abajurizi ba Yehova nibo baheereza be. (1 Tes. 5:21) Okukora ebyo byona nikiija kutuhwera kweihamu okubangaanisa, reero okwikiriza kwaitu kuhame. Twaba nitwenda obuhwezi bw’okusingura okubangaanisa, nitubaasa kubushaba abareeberezi. Titwine kweziringa kucwamu twaba nitwenda kuguma nituheereza Yehova tushemereirwe!

17. Nihabaho ki omuhimbo gwaitu gwatuuba?

¹⁷ Oburemeezi: Okutamwa. Baibuli neegira eti: “Ku orikugwa enshazi [waatamwa] aha izooba ry’okuhikiirirwa,” amaani gaawe nigaija kuba makye. (Enf. 24:10) ‘Okugwa enshazi’ nari okutamwa n’ekigambo ky’Oruheburaayo ekirikumanyisa “okutagira muhimbo gw’okukora  ekintu.” Omuhimbo gwawe gwatuuba, n’okushemererwa kwawe nikwija kutuuba.

18. Okugumisiriza nikimanyisa ki?

¹⁸ Eky’okukora: Yesigye Yehova kukuha obumanzi bw’okugumisiriza. Twine kugira obumanzi kubaasa kwemera okugyezibwa. (Yak. 5:11) Ekigambo ‘okugumisiriza’ eki Yakobo yaakoreise nikimanyisa omuntu kuguma omu mwanya gwe ahami. Nitubaasa kuteekateeka aha muserukare orikuguma ahami otarikuhunga omuzigu we.

19. Nitubaasa kwegyera ki ahari Paulo?

¹⁹ Entumwa Paulo akataho eky’okureeberaho ky’omutaano eky’okugumisiriza n’okugira obumanzi. Obumwe, akaba areeba ngu aine amaani makye. Kwonka akabaasa kugumisiriza ahabw’okwesiga Yehova kumuha amaani agarikwetengyesa. (2 Kor. 12:8-10; Fil. 4:13) Nitubaasa kutunga amaani n’obumanzi nk’obwo twaba abacureezi tukaikiriza obuhwezi bwa Yehova.​—Yak. 4:10.

20-21. Nitubaasa kugira bwesigye ki?

²⁰ Nitubaasa kugira obwesigye ngu twaba nitugyezibwa nikiba kitari kifubiro kuruga ahari Yehova. Yakobo naatuhamiza ngu omuntu weena ku araagyezibwe, arekye kugira ngu yaagyezibwa Ruhanga, ahakuba Ruhanga tarikubaasa kugyezibwa bibi, kandi nawe tarikubigyeresa muntu weena. (Yak. 1:13) Twaba twine obuhame nk’obwo, nitwija kwirira haihi Tataitwe ow’omu iguru orikutukunda.​—Yak. 4:8.

²¹ Yehova ‘tarikuhindahinduka na kakye.’ (Yak. 1:17) Ira akahwera Abakristaayo omu kugyezibwa kwabo, kandi naitwe naija kutuhwera. Yeshengyereze Yehova omu kushaba kukuhwera kugira obwengye, okwikiriza, n’obumanzi. Naija kugarukamu okushaba kwawe. Reero noobaasa kuhamya ngu naija kukuhwera kuguma oshemereirwe omu kugyezibwa!