Aláahdi Nááʼiiłniihii Íílai biyeʼké naakigo tabernaclegi nááʼiiłniihii nilı̨́. Éí Háfnai dóó Fíniyas wolyé. Tʼáá áłah Jiihóvah bibee hazʼáanii doo yikʼeh hółʼı̨́į da. Áádóó diné doo yaa joobaʼ da. Atsįʼ nááhániih biniyé nidayiijáahgo, díí ashiiké éí atsįʼ yáʼátʼéehgo daneeskʼahii tʼáá bí ádá náyiilááh. Íílai díí baa ákozhnízin ndi, doo baa níjítʼı̨́į da. Daʼ ákoósh Jiihóvah díí tʼóó yá hasʼą́?

Sámuel éí Háfnai dóó Fíniyas ląʼí nááhai bikéédę́ę́ʼ nijigháh. Éí baaʼihgo yaa naaʼaashígíí doo bikʼehgóó ájooníił da. Kójítʼéhígíí Jiihóvah yaa bił hózhǫ́. Sámuel łah ajiłhoshgo, háíshı̨́ı̨́ hózhíigo jidiiztsʼą́ą́ʼ. Nízhdiiʼnaʼgo Íílai bichʼįʼ jílwodgo ájíní: ‘Kǫ́ǫ́ sézı̨́.ʼ Ndi Íílai áháłní: ‘Doo níízhiʼ da, nílááh náníteeh.ʼ Sámuel názneeztı̨́. Ńtʼééʼ tááʼ azlı̨́ı̨́ʼ góneʼ Sámuel Jiihóvah nááhóózhiʼgo, Íílai éí Jiihóvah Sámuel yózhíigo baa ákozhniizı̨́ı̨́ʼ. Áko Sámuel ábijiní: ‘Náá níízhiʼgo kódidííniił: “Jiihóvah, hanidziih, ná naalʼaʼí nishłíinii níísístsʼą́ą́ʼ.”ʼ

Sámuel názneeztı̨́ ńtʼééʼ: ‘Sámuel!, Sámuel!ʼ hodiʼníigo jidiiztsʼą́ą́ʼ. Áko ájíní: ‘Hanidziih, ná naalʼaʼí nishłíinii níísístsʼą́ą́ʼ.ʼ  Áko Jiihóvah áháłní: ‘Íílai kóbididííniił: “Nighan hazʼą́ą́dóó doo yáʼátʼéhígi ádahodeeshłííł.” Hayeʼ tʼáá áłah shighan biiʼ sohodizin góneʼ baaʼihígi áánííł ndi, doo bá baa níjítʼı̨́į da.ʼ Ahbínígo Sámuel tabernacle bidáádílkał ąą ájiilaa. Jiihóvah hachʼįʼ yee haadzííʼ yę́ę nááʼiiłniihii Íílai bee bił hozhdoolnihgi bééjíldzid. Ákondi Íílai hágo hodííniidgo áháłní: ‘Shiyeʼ, Jiihóvah yee nichʼįʼ haadzííʼ yę́ę tʼáá ałtso bee shił hólneʼ.ʼ Áko Íílai tʼáá ałtso bee bił hojoolneʼ.

Sámuel neeyą́ągo Jiihóvah nábidiiłtı̨́įgi, Jiihóvah yá halneʼii áádóó ánahwiiʼaahii ábiilaaígíí Ízrel dineʼé tʼáá ałtso bił béédahoozin. Áko Sámuel éí Jiihóvah bił hólǫ́ǫgo abíyííłką́.