Aláahgo náádaʼiiłniihii éí naatʼáanii bighangóó Jesus deizlóóz. Páílat éí náádaʼiiłniihii ííłní: ‘Haʼátʼíísh bee bikʼídahohʼááh?’ Ádaaní: ‘Naatʼáanii nishłı̨́ jidííniid!’ Páílat éí Jesus nabízhdééłkid: ‘Daʼ niísh Jew dineʼé biNaatʼáanii nílı̨́?’ Jesus ání: “Bee shóhólníihii éí doo díí nahasdzáán bitsʼą́ą́dóo da.”

Jesus bee bikʼíhátʼááh ádin, áko Páílat éí Hérad yichʼįʼ hoʼníłniiʼ. Hérad ałdóʼ Jesus bee bikʼíhátʼááh ádingo yaa ákoniizı̨́ı̨́ʼ, áko Páílat yichʼįʼ hwééʼníłniiʼ. Páílat éí diné áłah nilínígíí ííłní: ‘Shí dóó Hérad éí díí diné doo asihgóó baa ákoniidzı̨́ı̨́ʼ, éí biniinaa béédíshchííd.’ Áłah silı̨́ʼígíí dadilwoshgo ádaaní: ‘Dasołhé! Dasołhé!’ Siláo éí Jesus nideiniłtsxis, nídahoniłtsʼin dóó hakʼídahidizheeh. Há nidahałtʼiʼgo chʼah hosh bee ályaii hąąh nideizʼą́ągo ádaaní: ‘Yáʼátʼééh, Jew dineʼé biNaatʼáanii!’ Páílat ánáádooʼniid: ‘Díí diné bee bikʼíhótʼahí ádin.’ Dadilwoshgo ádaaní: “[Tsin bąąh] bił oʼołkaał!” Páílat éí Jesus bidiʼyoolyééł yá hoołʼaʼ.

Jesus éí Gálgathadi tsin bąąhjįʼ hoł oʼoolkaal áádóó éí dayiisįʼ. Jesus sodoolzin: ‘Shizhéʼé, díí baa náhidiʼaah, doo bił béédahózingóó ádaatʼı̨́.’ Jesus yá nidahałtʼiʼgo ádaaní: ‘God biYeʼ nílı̨́įgo tsin bąąhdę́ę́ʼ yisdáʼádílteeh.’

Aniʼįįhii łaʼ hwíighahgi dah hidétı̨́. Éí áháłní: “Bee nóhólníihii [biih] yíníyáago shéénílniih doo.” Jesus áháłní: “Kéyah Hózhǫ́ǫdi shił honílǫ́ǫ doo.” Ałníʼníʼą́ą́dóó bikʼijįʼ, tááʼ ahééʼílkidjįʼ tʼáá ałtsogóó chahóółhéélʼ. Jesus bimá Mary dóó ídahoołʼaahii łaʼ tsin bąąh dahizhdétínígíí yíighahgi naazı̨́. Jesus éí John ábijiní: ‘Mary tʼáá ni nimá nahalingo baa áhólyą́ą doo.’

Áadi índa Jesus ání: ‘Kʼad lą́ą łaʼ yidzaa!’ Hatsiitsʼiin yaa kódzaago dajiztsą́. Ákwii oolkiłgo ayóó átʼéego niʼ hideesʼnááʼ. Kin biiʼ sohodizin góneʼ, aláahdi hodiyin bichʼą́ą́h níbaal yę́ę  wódahdę́ę́ʼ ałtsánídláád. Siláo łaʼ ání: ‘Díí tʼáá aaníí Diyin God biYeʼ nílı̨́ı̨́ ńtʼééʼ lá.’