Mózes dóó Éran éí Féro yichʼįʼ, God haneʼ yá neizʼą́. ‘Shidineʼé doo bééʼníłnííhgóó éí Ííjip kéyahjįʼ tséʼédǫ́ʼii daʼ diłhashígíí biʼdeeshʼnih.’ Díí tséʼédǫ́ʼii tsʼídá tʼóó ahayóí Ííjip dineʼé dabighangóó dahazlı̨́ı̨́ʼ. Kéyahdi hadéébįįd. Ndi Ízrel dineʼé kéédahatʼı̨́įgi Góshendi éí tséʼédǫ́ʼii ádin. Díí dı̨́ı̨́ʼ góneʼ bee atíʼályaaígíí éí Ííjip dineʼé tʼéiyá bee atílyaa. Féro ání: ‘Díí tséʼédǫ́ʼii nahjįʼ kónílééh bidiiʼníigo Jiihóvah shá néinikąąh. Áko nidineʼé bééʼdeeshnih.’ Jiihóvah éí tséʼédǫ́ʼii nahjįʼ kóyiilaago, Féro łahgo átʼéego tsízdeezkééz. Tʼáásh baa ákozhdínóozįįł?

Jiihóvah ání: ‘Féro éí shidineʼé doo bééʼjíłnííhgóó éí Ííjip dineʼé bilı̨́ı̨́ʼ ałtso naałniih bąąh ádadeeshłíiłgo dadinóonééł.’ Biiskání, alı̨́ı̨́ʼ yę́ę ałtso daneezná. Ndi Ízrel dineʼé dabilı̨́ı̨́ʼ éí tʼáadoo łaʼ daaztsą́ą da. Ákótʼée ndi, Féro tʼahdii tʼą́ą́ʼ átʼé.

Áádóó Jiihóvah éí Mózes ííłní, Féro bichʼįʼ nínáádíídááł áádóó łeeshchʼiih yéidííghas. Łeeshchʼiih yááyiighazgo łeezh dibahí silı̨́įʼgo Ííjip dineʼé ałtso bąąh daazlı̨́ı̨́ʼ. Díí łeezh dibahí éí Ííjip dineʼé dóó dabilı̨́ı̨́ʼ łóód ayóó átʼéego neezgaigo bąąh daazlı̨́ı̨́ʼ. Ákótʼée ndi, Féro éí Ízrel dineʼé tʼáadoo yééʼníłniiʼ da.

Jiihóvah éí Mózes, Féro yichʼįʼ anááyííłʼaʼ, kóbidiní yiłníigo:  ‘Shidineʼé bééʼdííłnihgi tʼahdiísh tʼą́ą́ʼ sínítı̨́? Yiską́ągo kéyah bikááʼ nílótsoh bee nahodoołtı̨́ı̨́ł.’ Biiskání Jiihóvah éí nílótsoh, adiʼníigo, dóó kǫʼ yee nayííłtą́. Ííjipgi kótʼéego tsʼídá tʼah doo nahałtin da ńtʼééʼ. Tʼiis dóó ndaniseʼ ałtso dááchxǫʼ, ndi Góshendi éí tʼáadoo da. Féro ání: ‘Jiihóvah néinikąąhgo díí niʼ ánílééh bidiʼní! Áádóó níwohjįʼ wohnéeł doo.’ Ákondi ńiló bił nahałtin tʼáá ákǫ́ǫ́ niʼ ádzaago, Féro łahgo átʼéego tsínáádeezkééz.

Mózes ání: ‘Nílótsoh nááłtánę́ę bitsʼą́ą́dóó ndaniseʼ chʼínééłnaʼígíí éí nahachagiitsoh ałtso deidooyı̨́ı̨́ł.’ Áko tʼóó ahayóí nahachagiitsoh ákódaadzaa. Féro ání: ‘Jiihóvah shá néinikąąhgo díí nahachagiitsoh nahjįʼ kónílééh bidiʼní.’ Azhą́ Jiihóvah éí nahachagiitsoh ałtso íísdįįd ndi, Féro tʼahdii tʼą́ą́ʼ sitı̨́.

Jiihóvah éí Mózes kwííłní: ‘Yadiilnííh.’ Tágí jı̨́ tʼáá íiyisí chahałheeł, áko Ííjip dineʼé doo daʼahijootʼı̨́į da. Ndi Ízrel dineʼé dabighan góneʼ tʼéí daʼdinídíín.

Féro éí Mózes ííłní: ‘Nihílááh, wohnééł. Nihilı̨́ı̨́ʼ éí tʼáá ákǫ́ǫgo ádaałeʼ.’ Mózes ání: ‘Danihilı̨́ı̨́ʼ tʼáá bił yiiʼnéeł doo, áko God bichʼįʼ náádahidiilnih.’ Féro báhóóchįįdgo hadoolghaazh, ‘Níwohjįʼ shitsʼánínááh! Háálá nááshiiniłtsą́ągo nidiyeeshxééł.’