Ízrel dineʼé tʼahdii honoojíidi naakaigo, Kórah, Déíthan, Abáíram dóó 250 diné ánéelą́ą́ʼ Mózes yikʼijįʼ danilı̨́. Kódaháłní: ‘Tʼóó báhádzigo ádíhwíínółnííh! Haʼátʼíí biniyé nihinanitʼaʼí nilı̨́į doo, dóó Éran aláahgo nááʼiiłniihii jílı̨́? Díí Jiihóvah éí tʼáá áníiltso nihił hólǫ́, doo tʼáá ní dóó Éran tʼéiyá da.’ Jiihóvah doo bił yáʼátʼéeh da. God yee bichʼįʼ nijílteeʼ!

Mózes éí Kórah índa yił dah yikahígíí ííłní: ‘Yiską́ągo níbaal biiʼ hodílzingi nihidookah, dilidgo łikání halchinii bee naakáhí nídahididoohnił. Jiihóvah háí jidiyingo ííshjání áhodoolííł.’

Kórah dóó 250 diné ánéelą́ą́ʼ Mózes níbaal biiʼ sohodizinii bidáahgi nídahidiikai. Nááʼiiłniihii nahalingo dilidgo łikání halchinii deidiłid. Áádóó Jiihóvah éí Mózes dóó Éran ííłní: ‘Díí dah oonéłígíí bitsʼánóhʼaash.’

Níbaal biiʼ sohodizindi, Kórah éí Mózes baazhníyá ndi Déíthan dóó Abáíram índa dabiyeʼké índa baʼáłchíní doo akǫ́ǫ́ naaskai da. Jiihóvah éí Ízrel dineʼé ííłní: Kórah, Déíthan índa Abáíram dabiníbaalídóó bitsʼánóhjeeh. Áko Ízrel dineʼé tʼáadoo hodiinaʼí yitsʼákai. Déíthan, Abáíram dóó bighan hazʼánígíí chʼíníʼáazhgo  biníbaal bichʼéédą́ą́ʼdóó yił deizįʼ. Áádóó tʼáá nijizı̨́ı̨́dóó niʼ ałtsʼáádláád dóó niʼ ahoołnaʼ! Kin biiʼ sohodizindi, kǫʼ bidadíínáadgo Kórah dóó 250 diné ánéelą́ą́ʼ íísdįįd.

Jiihóvah éí Mózes ííłní: ‘Aląąjįʼ naazíinii gish naakitsʼáadahgo bízhiʼ bikááʼ ádadííliił. Ndi Líívai dineʼé bigish bikáaʼgi éí Éran bízhiʼ ádíílííł. Níbaal biiʼ sohodizingi biih doohníł, dóó diné bigish nídideeshtı̨́łígíí éí chʼilátah hózhóón bąąh hodooleeł.’

Łaʼ biiskání, Mózes éí tʼáá átʼé gish chʼíiníjaaʼ dóó aląąjįʼ naazíinii yichʼįʼ ííshjání áyiilaa. Éran bigish éí chʼilátah hózhóón bąąh haníísą́, dóó álman ałdóʼ neestʼą́ągo bąąh hazlı̨́ı̨́ʼ. Kótʼéego Jiihóvah éí Éran aláahgo nááʼiiłniihii jílı̨́įgo néidiiłtı̨́.