Ge Jesu a tloga Jerusalema thapameng ya Mošupologo, o boela motseng wa Bethania wo o lego thitong ya ka bohlabela ya Thaba ya Mehlware. Mohlomongwe o lala gabo bagwera ba gagwe e lego Latsaro, Maria le Mareta.

Bjale ke mesong ya Nisani 11. Jesu le barutiwa ba gagwe ba boetše ba tseleng, ba boela Jerusalema moo a tlago go ba tempeleng la mafelelo. E bile ke letšatši la gagwe la mafelelo a nea bohlatse phatlalatša pele a keteka Paseka, a hloma Segopotšo sa lehu la gagwe ke moka a sekišwa le go bolawa.

Ge ba le tseleng ya go boa Bethania ba fetile Thaba ya Mehlware ba lebile Jerusalema, Petro o bona sehlare seo Jesu a se rogakilego mesong e fetilego. O re: “Rabi, bona mogo wola o o rogakilego o omile.”—Mareka 11:21.

Eupša ke ka baka la’ng Jesu a ile a omiša sehlare se? O utolla lebaka ge a araba a re: “Ruri ke re go lena, ge e ba le na le tumelo gomme le sa belaele, ga se feela gore le tla dira seo ke se dirilego mogo, eupša gape ge e ba le ka re go thaba ye: ‘Tloga o wele ka lewatleng,’ go tla direga bjalo. Dilo tšohle tšeo le di kgopelago ka thapelo le na le tumelo le tla di hwetša.” (Mateo 21:21, 22) Ka go re’alo o bušeletša ntlha yeo a e boletšego pejana ya mabapi le gore tumelo e ka kgona go šuthiša thaba.—Mateo 17:20.

Ka gona ge Jesu a omiša sehlare, o ruta ka taba ya go nyakega ga go dumela go Modimo. O re: “Dilo tšohle tše le di rapelelago le go di kgopela, ebang le tumelo ya gore go bjalo ka ge eka le šetše le di hweditše gomme le tla ba le tšona.” (Mareka 11:24) Ruri yeo ke thuto e bohlokwa go balatedi ka moka ba Jesu! E bohlokwa kudukudu go baapostola ka baka la diteko tše thata tšeo ba tlago go lebeletšana le tšona kgauswinyane. Go sa na le tsela e nngwe yeo ka yona go oma ga mogo go sepedišanago le seka sa tumelo.

Setšhaba sa Isiraele se na le ponagalo ya bofora go swana le mogo wo. Ka ge Modimo a dirile kgwerano le batho ba setšhaba se, ba ka bonagala ba latela Molao wa gagwe. Lega go le bjalo, setšhaba ka moka se ipontšhitše se se na tumelo gomme se sa enywe dienywa tše dibotse. Se bile se gana Morwa wa Modimo! Lega go le bjalo, Jesu ka go omiša mogo wo o sa enywego, o bontšha kamoo setšhaba se seo se sa enywego le seo se se nago tumelo se tlago go feleletša ka gona.

Go se go ye kae, Jesu le barutiwa ba gagwe ba tsena Jerusalema. Ka ge a tlwaetše, Jesu o ya tempeleng gomme o thoma go ruta. Baperisita ba bagolo le bagolo setšhabeng, bao mohlomongwe ba nagannego ka seo Jesu a se dirilego baananyi ba ditšhelete letšatšing le le fetilego, ba mmotšiša ba re: “Dilo tše o di dira ka matla afe? Goba ke mang yo a go neilego matla a a go dira dilo tše?”—Mareka 11:28.

Jesu o a araba o re: “Ke tla le botšiša potšišo e tee. Le nkarabeng gomme le nna ke tla le botša gore ke dira dilo tše ka matla afe. Na kolobetšo ya Johane e be e etšwa legodimong goba bathong? Nkarabeng.” Bjale baganetši ba gagwe ke bona ba botšišwago. Baperisita le bagolo ba boledišana seng sa bona gore ba ka araba bjang, ba re: “Ge re ka re: ‘E be e etšwa legodimong,’ o tla re: ‘Ka gona, ke ka baka la’ng le sa ka la mo dumela?’ Eupša re se ke ra leka ra re: ‘E be e etšwa bathong.’” Ba nagana ka tsela ye ka ge ba boifa lešaba, “gobane ba ka moka ba be ba dumela gore Johane e be e le moporofeta e le ka kgonthe.”—Mareka 11:29-32.

Baganetši ba Jesu ga ba kgone go hwetša karabo ya maleba. Ka gona ba a araba ba re: “Ga re tsebe.” Jesu le yena o re: “Le nna ga ke le botše gore dilo tše ke di dira ka matla afe.”—Mareka 11:33.