Lengwalo le le Tšwago Mexico

“Na Jehofa o a re Rata le ge re le Maindia?”

MELESIO, monna yo a bolelago se-O’dam, o be a fela a theoga dithabeng a tlo nyaka mošomo. O be a eba gona dibokeng tša Bokriste gomme a boela gae le dikgatišo tša Beibele gore a yo di abelana le magagabo. O ile a kgopela gore go be le motho yo a tla ba etelago le go ba ruta ka mo go oketšegilego ka Beibele.

Ma-O’dam, e lego morafo wo o lego lekatana, a dula ka godimo ga dithaba tša Sierra ka leboabogare bja Mexico, mo e ka bago bokgole bja dikhilomithara tše 240 go tloga phuthegong ya kgauswiuswi ya Dihlatse tša Jehofa. Ba mmalwa ba rena ba ile ba dira phetho ya go a etela.

Re ile ra tloga motseng wa Durango ge re hweditše lori e nyenyane, ditente le mekotla ya go robala gomme re tšere dijo tše di lekanego le peterole bakeng sa matšatši a mararo. Re ile ra tloga ka iri ya bone mesong gomme ra otlela lebaka la diiri tše seswai re namelela tseleng ya lerole ya dithabeng go fihla moo e felelago gona. Mo e be e le moo go tsenwago gona ge go iwa tikologong ya ma-O’dam. Pele ga rena e be e le sefata se se išago le thaba e nngwe.

Re ile ra tlogela lori e nyenyane motsaneng wo o lego lekatana (ranchito) gomme ra sepela ka maoto leeto la diiri tše tharo tše latelago, re rwele merwalo ya rena re theogela botlaseng bja sefata. Re ile ra hloma tente moo, ra rwalela dikgong tše di lekanego tša go gotša mollo gore re rake diphoofolo tša lešoka, ke moka ra robala lebaka la diiri tše tharo re šiedišana gore re dule re kgohletša mollo.

Re ile ra thoma go namela thaba e sa le ka pela mesong ya letšatši le le latelago. Go be go na le ditsejana tše dintši gomme re ile ra timela ga mmalwa. Ka ge go be go na le yo mongwe sehlopheng sa rena yo a bego a bolela se-O’dam ganyenyane, re ile ra bolela molaetša o mokopana wa Beibele metsaneng yeo e lego tseleng. Re ile ra makatšwa ke gore batho ba ile ba re botša gore moo re bego re eya gona kua Los Arenales, go be go na le bao ba ipitšago Dihlatse tša Jehofa le gore ba be ba swara diboka tša Beibele moo. Tše e be e le ditaba tše di makatšago eupša e le tše di kgothatšago.

Re ile ra fihla Los Arenales dinao tša rena di tšwile maphone. Motse wa gona o be o na le dintlo tšeo di lego lekatana tše di agilwego ka ditena tša letsopa e bile di ruletšwe ka dikhatepokisi—go se na sekolo e  bile go se na mohlagase. Ka ge batho ba ba phela kgole kudu le ba bangwe, ba phela bodiiding bjo bo feteletšego gomme ba phela ka senkgwa se se dirilwego ka lefela se se bitšwago tortilla gotee le dilwana tše dingwe. Re ile ra hwetša Melesio, lesogana le lesesane leo le bego le thabile kudu ge le re bona. O ile a re laletša gore re ye lapeng la gagwe la bobotlana gomme a re botša gore o be a dutše a rapela Jehofa letšatši le lengwe le le lengwe gore a romele Dihlatse tša Gagwe gore di tlo ruta lapa la gagwe le magagabo a ma-O’dam Beibele. O be a ikwa a sa kgone go araba dipotšišo tša bona ka moka.

Ma-O’dam e be e le a bodumedi bja shaman. Ba diriša dipheko tše bjalo ka mafofa le marapo a manong, ba rapela matla a tlhago gomme ba phelela go boifa bo-shaman goba baetapele ba moya bao ba ba hlakišago. Melesio o ile a hlalosa gore nakong ya ge a be a etela motseng gomme a ithuta gore Jehofa ke Modimo wa therešo, o ile a senya dilo tša gagwe ka moka tšeo a bego a di diriša borapeding bja diswantšho. Setšhaba se be se letetše go bona medimo ya sona e mo otla ka lehu. Ge ba bona go se na seo se diregago, ba ile ba lemoga gore Jehofa o be a feta medimo ya bona ka matla. Ka gona ba ile ba thoma go ba gona thutong ya Beibele yeo Melesio a bego a e swara le lapa la gagwe, ba diriša dikgatišo tša rena.

Melesio o itše: “Ke ile ka ba botša gore ba be ba swanetše gore pele ba fiše dipheko tša bona ka moka gotee le medingwana ya bona.” Ba bantši ba ile ba fenya dipoifo tša bona tša ditumelakhwele gomme palo ya bao ba bago gona sebokeng ya oketšega ya ba ba 80. Ka ge re be re makaditšwe ke go kwa se, re ile ra phetha ka gore re sware seboka thapameng yona yeo. Re ile ra romela molaetša ka batseta bao ba bego ba nametše dipere go bao ba bego ba bokana ka mehla lapeng la Melesio. Gaešita le ge e be e le gare ga beke gomme ba se ba tsebišwa nako e sa le gona, go ile gwa tla ba 25 ba sepela ka maoto gomme ba bangwe ba nametše dipokolwana.

Re ile ra swara lenaneo la Beibele la dipotšitšo le dikarabo gomme Melesio a fetolela. Ba be ba botšiša dipotšišo tše bjalo ka tše: “Na Modimo o a re rata le ge re le Maindia?” “Na o kwa dithapelo tšeo di rapelwago ka se-O’dam?” “Ge Haramagedone e etla, na Jehofa o tla ba le taba le rena gaešita le ge re dula kgole kudu gakaakaa le metse e megolo?” Re ile ra thabela go kgonthišetša baikokobetši ba re diriša Beibele gore Jehofa o na le taba le baikokobetši, go sa šetšwe gore ba bolela leleme lefe goba gore ba dutše lekatana le ba bangwe gakaakang. Ba ile ba re lopa gore re romele motho gore a tlo ba ruta ka mo go oketšegilego.

Ka morago ga seboka, re ile ra ngwathelana dijo tša rena le bagwera ba bao re sa tšwago go ba le bona. E be e šetše e le bošego, gomme go be go tonya kudu lefelong leo le le phagamego, ka gona re ile ra leboga ge ba be ba re nea phapoši yeo e bego e sa dutše e agwa gore re robale ka go yona. Mesong e latelago ba ile ba re felegetša loring ya rena e nyenyane re sepela ka tsela ya go kgaoletša, ke moka ra boela Durango re lapile fela re kgotsofetše.

E bile tokelo e kgolo kudu gakaakang go kopana le batho ba bao ba botegago, bao bontši bja bona bo sa kgonego go bala Sepaniši, go se ngwala goba go se bolela eupša ba nyaka go ithuta ka Modimo wa therešo le go mo rapela! Go tloga mola re ba etelago, Dihlatse tše tshela di šetše di ile bathong bao gomme tša dula lebaka la dibeke tše tharo. Di thušitše batho ba ka bago ba 45 moyeng bao ba tlogago ba nyaka go hlankela Jehofa. Ka moka ga bona ba ba gona ka mehla dibokeng.

Taba e nngwe še. Lebenkele le nnoši le lenyenyane la kua Los Arenales ga le sa rekiša disekerete. Se ke ka gobane batho ba bantši kudu ba ithuta Beibele gomme ga ba sa kgoga. Le gona ba ngwadišitše manyalo a bona ka molao.

[Seswantšho go letlakala 24]

Melesio le mosadi wa gagwe, barwedi ba gagwe ba bane le mmatswala’gwe

[Diswantšho go letlakala 25]

Thuto ya Beibele le seboka sa Bokriste kua Los Arenales

[Mothopo wa Seswantšho go letlakala 25]

Servicio Postal Mexicano, Correos de Mexico