JESU o ile a kwa gore mogwera wa gagwe wa paale Latsaro o lwala kudu. Motseta yo a romilwego ke Maria le Mareta, e lego dikgaetšedi tša Latsaro, o ile a tlišetša Jesu molaetša. Motseta o be a e-tšwa Bethani, moo Latsaro le dikgaetšedi tša gagwe ba bego ba dula gona. Dikgaetšedi tšeo di be di dumela gore Jesu a ka fodiša kgaetšedi ya tšona, gaešita le ge ba be ba dula kgole ka kua ga Noka ya Jorodane. Di be di tseba gore o kile a fodiša batho a le kgole le bona.—Mateo 8:5-13; Johane 11:1-3.

Ge motseta a hwetša Jesu gomme a mmotša ditaba tše di nyamišago, Jesu ga a gate mogato mabapi le taba yeo. Beibele e re: “Ke moka a dula matšatši a mabedi lefelong leo a bego a le go lona.” (Johane 11:6) Na o a tseba gore ke ka baka la’ng Jesu a se a ka a akgofela go thuša Latsaro?— * A re boledišane ka taba ye.

Jesu o be a tseba gore Latsaro o bolailwe ke bolwetši bja gagwe. Ka baka leo, o botša baapostola ba gagwe gore: “A re boeleng Judea.” Ba ile ba gana ka gore: “E sego kgale mo Bajuda ba be ba nyaka go go kgatla ka mafsika, gomme na o boela moo gape?” Jesu o hlalosa gore: “Latsaro mogwera wa rena o ile go khutša, eupša ke ya moo go yo mo tsoša borokong.”

Baapostola ba araba ka gore: “Morena, ge e ba a ile go khutša, o tla fola.” Ga bjale Jesu o hlalosa ka gore: “Latsaro o hwile.” Ke moka o bolela selo se sengwe seo se ka bago se ile sa ba makatša, o re: “Ke thabile ka lebaka la lena gore ke be ke se gona moo . . . Eupša a re yeng go yena.”

Thomase o bolela ka sebete gore: ‘A re yeng re yo hwa le Jesu.’ Thomase o a tseba gore manaba a tla leka go bolaya Jesu gape, gomme baapostola le bona ba be ba ka bolawa. Eupša ka moka ga bona ba fo sepela le yena. Ka morago ga matšatši a mabedi goba go feta ba fihla Bethani, motseng wa gabo Latsaro. O dikhilomithara tše ka bago tše tharo go tloga Jerusalema.—Johane 11:7-18.

Na o tseba gore ke ka baka la’ng Jesu a se a ka a fihla pejana?— Go ba gona, Jesu o be a kile a tsoša batho ba bangwe, eupša batho bao ba be ba hwile diiri tše mmalwa feela pele Jesu a ba tsoša. (Luka 7:11-17, 22; 8:49-56) Lega go le bjalo, setopo sa Latsaro se be se na le matšatši se le ka lebitleng. Ga go na motho yo a bego a ka belaela gore o hwile e le ka kgonthe!

Ge Mareta kgaetšedi ya Latsaro a e-kwa gore Jesu o kgaufsi le Bethani, o a mo kitimela. O re: “Morena, ge nkabe o be o le mo, kgaetšedi ya-ka nkabe a se a hwa.” Jesu o mo kgonthišetša ka gore: “Kgaetšedi ya gago o tla tsoga.” Mareta o boela ka gae gomme ka thopeng o botša moratho’agwe Maria, gore: “Morutiši o gona gomme o a go bitša.”

Maria o tloga ka yona nako yeo go ya go  Jesu. Lega go le bjalo, lešaba le nagana gore o ya lebitleng, ka gona le mo šala morago. Ge Jesu a bona Maria a e-na le lešaba a lla, le yena o ile a “ntšha megokgo.” Kapejana ka moka ba fihla lebitleng, leo le tswaletšwego ka lefsika le legolo. Jesu o laela gore: “Tlošang lefsika.” Eupša Mareta o gana ka gore: “Morena ga bjale o swanetše go ba a nkga, gobane ke matšatši a mane.”

Batho ba latela taelo ya Jesu gomme ba tloša lefsika. Ke moka o a rapela, a leboga Modimo e sa le pele bakeng sa matla ao a tsebago gore Modimo o tla mo nea wona gore a tsoše Latsaro. Jesu a goeletša “ka lentšu le le hlabošago, a re: ‘Latsaro, tšwaa!’” Ke moka Latsaro a tšwa, a “tateditšwe ka mašela.” Ke moka Jesu a laela gore: “Mo tatolleng, le mo lese a sepele.”—Johane 11:19-44.

Na o kwešiša gore ke ka baka la’ng Jesu a se a ka a akgofa?— O be a tseba gore ge a ka leta o tla nea bohlatse bjo bokaone ka Tatagwe, Jehofa. Le gona, ka ge a kgethile nako e swanetšego, ba bantši ba ile ba dumela go Modimo. (Johane 11:45) Na o bona seo re ithutago sona mohlaleng wa Jesu?—

Le wena o ka kgona go kgetha nako e swanetšego go nea bohlatse mabapi le dilo tše dibotse tšeo Modimo a di dirilego le tšeo a sa tlago go di dira. Mohlomongwe o ka botša morutwana-gotee goba morutiši wa gago ka tšona. Gaešita le ge ba le ka phaphošing sekolong, bafsa ba bangwe ba ile ba diriša sebaka seo go bolela ka ditšhegofatšo tše di kgahlišago tšeo Mmušo wa Modimo o tla di tlišetšago batho. Ke therešo gore o ka se ke wa tsoša bahu, eupša o ka thuša ba bangwe go tseba Modimo yo a ka tsošago batho bao re ba ratago e bile a tlago go ba tsoša.