“O tla Dirišana le Yena ka Potego”
Batamela Kgaufsi le Modimo
“O tla Dirišana le Yena ka Potego”
2 SAMUELE 22:26, NW
KE DILO tše mmalwa tšeo di ka re nyamišago go feta go nyamišwa goba go ekwa ke motho yo re mmotago. Manyami a bjalo a tlwaelegile lefaseng le leo le sa botegego. (2 Timotheo 3:1-5) Na go na le motho yo re ka botago gore o tla re botegela ka mo go feletšego? A re hlahlobeng bohlatse bja Kgoši Dafida wa Isiraele ya bogologolo.
Bophelong bja gagwe, Dafida o kile a se botegelwe e le ruri. Ka go hloka toka o ile a gapeletšega go phela bjalo ka motšhabi gomme a hlomarwa ke Saulo wa lehufa, kgoši ya mathomo ya Isiraele. Ka lapeng la gagwe, Mikala, mosadi wa Dafida, ga se a ka a dula a botegela monna wa gagwe eupša, go e na le moo, o ile “a mo nyatša pelong ya xaxwe.” (2 Samuele 6:16) Ahithofele, moeletši yo a botegago wa Dafida, o ile a fetoga moeki gomme a tlatša bao ba bego ba rabela kgahlanong le Dafida. Moetapele wa borabele bjo e be e le mang? E be e ka ba mang ge e se Abesalomo, morwa wa Dafida! A lebeletšane le go ekwa leboelela, na Dafida o ile a tlogela go bota batho ba bangwe gomme a phetha ka gore ga go na motho yo a ka dulago a botega?
Re hwetša karabo mantšung a Dafida a begilwego go 2 Samuele 22:26, NW. Dafida monna wa tumelo e sa šišinyegego, seretong sa gagwe o bolela ka Jehofa Modimo gore: “Yo a botegago o tla dirišana le yena ka potego.” Dafida o be a kgodišegile gore go sa šetšwe gore batho ba bangwe ba mo nyamiša gakaaka’ng, Jehofa o be a tla dula a mmotegela.
Anke re lebelele mantšu a Dafida ka kelohloko. Polelwana ya Seheberu yeo e fetoletšwego e le “o tla dirišana le yena ka potego” gape e ka fetolelwa e le “Yo a botegago o tla dirišana le yena ka botho bjo lerato.” Potego ya kgonthe e theilwe leratong. Jehofa ka lerato o ikgomaretša go bao ba mmotegelago. *
Le gona, ela hloko gore potego ga se feela maikwelo; e bonagala ka mediro. Jehofa o dira ka potego, bjalo ka ge Dafida a bone phihlelong ya gagwe. Nakong ya ge Dafida a be a le mathateng, Jehofa o ile a gata mogato wa go mo thuša, ka potego a šireletša le go hlahla kgoši e botegago. Dafida yo a botegago o ile a lemoga gore ke Jehofa yo a ‘mo namoletšego diatleng tša manaba a gagwe.’—2 Samuele 22:1.
Mantšu a Dafida a bolela’ng go rena? Jehofa ga a šišinyege goba go fetoga. (Jakobo 1:17) O dula a botegela ditekanyetšo tša gagwe le gona o dula a botegela mantšu a gagwe a kholofetšo. Go e nngwe ya Dipsalme tša gagwe, Dafida o ngwadile gore: “Jehofa . . . a ka se tlogele bao ba mmotegelago.”—Psalme 37:28, NW.
Jehofa o tšeela godimo potego ya rena. O tšeela godimo go mo kwa ga rena ka potego, gomme o re kgothaletša gore re mo ekiše ka go bontšha potego ge re dirišana le ba bangwe. (Baefeso 4:24; 5:1) Ge re bontšha potego ka ditsela tše, re ka kgodišega gore a ka se ke a re lahla le ka mohla. Go sa šetšwe gore batho ba ka re nyamiša gakaaka’ng, re ka lebelela gore Jehofa o tla dirišana le rena ka potego, a re thuša go lebeletšana ka katlego le diteko le ge e le dife tšeo re ka lebeletšanago le tšona. Na o tutueletšega go batamela Jehofa, “Mmotegi”?—Kutollo 16:5.
[Mongwalo wa tlase]
^ ser. 7 Samuele wa bobedi 22:26 e sepedišana le Psalme 18:25. Phetolelo e nngwe ya Beibele e fetolela psalme yeo ka tsela ye: “Go yo a botegago O Ipontšha o tletše lerato.”—The Psalms for Today.