Nako ya go Kgetha

“Modimo a [bopa] motho, a mmopa ka xo ithswanthša, a mmopa ka xo swanthša ka Yêna Modimo; a ba bopa monna le mosadi.”—Genesi 1:27.

MANTŠU ao a tlwaelegilego a lego kgaolong ya mathomo ya Beibele a hlalosa se sengwe sa dilo tše di kgahlišago tšeo Modimo a “di [dirilego] xore di kxahlê ka mohla wa tšôna”—go bopa banyalani ba phethagetšego e lego Adama le Efa. (Mmoledi 3:11) Bjalo ka Mmopi wa bona, Jehofa Modimo o ba boditše gore: “Tswalang Le atê, tlalang lefase, Le le fenyê. Le bušê ’hlapi tša lewatlê le ’nonyana tša xodimo, le nyabanyaba yohle ya diphedi mó ’faseng.”—Genesi 1:28.

Mantšung a ao a yago go banyalani ba pele, Modimo o ba boditše morero wa gagwe. Ba be ba swanetše go ata le go hlokomela lefase gomme ba le fetoše legae la paradeise bakeng sa bona le bana ba bona. Go be go se na nako e rerilwego e sa le pele ya gore ba phele gomme ba hwe. Go e na le moo, Modimo o ile a ba nea tebelelo e kgahlišago. Ka go dira dikgetho tše di nepagetšego le go dira dilo ka go dumelelana le Modimo, ba be ba ka phela khutšong e phethagetšego le lethabong ka mo go sa felego.

Ba ile ba dira kgetho e fošagetšego gomme ka  baka leo batho ka moka ba thoma go tšofala le go hwa. Ge e le gabotse, mopatriareka Jobo o dumetše ka gore: “Motho e a belexwexo ke mosadi, matšatši a xaxwe xa se a makae, ’me ó hoše tapišexo.” (Jobo 14:1) Go senyegile kae?

Beibele e hlalosa gore: “Ka motho o tee sebe se tsene lefaseng, gomme lehu la tsena ka sebe, ka baka leo lehu le aparetše batho bohle gobane bohle ba dirile sebe.” (Baroma 5:12) Ke therešo gore “motho o tee” yo e be e le Adama, yoo ka boomo a ilego a kgetha go se kwe taelo ya Modimo e bonolo le e kwagalago. (Genesi 2:17) Ka go dira kgetho yeo, Adama o ile a lahla sebaka sa go phela ka mo sa felego lefaseng la paradeise. O dirile gape gore ditlogolwana tša gagwe di lahlegelwe ke bohwa bjo bobotse gomme a di nea thogako ya sebe le lehu. Go be go bonala eka ba lahlegetšwe ke dilo ka moka. Na go be go le bjalo?

Nako ya Tsošološo

Nywaga e dikete ka morago, mopsalme o ile a budulelwa go ngwala gore: “Baloki e ba beng ba naxa, ba dula mo xo yôna ka mehla le ka mehla.” (Psalme 37:29) E le kgonthišetšo ya gore kholofetšo ya gagwe ya tšhemong ya Edene e tla phethagala, Lentšu la Modimo le hlalosa seo a tlago go se dira kgaufsinyane ka tsela e kgahlišago ka gore: “O tla phumola megokgo ka moka mahlong a bona, gomme lehu le ka se hlwe le sa ba gona, le ge e le manyami goba sello goba bohloko di ka se hlwe di sa ba gona. Dilo tša pele di fetile.” Ke moka, Modimo ka boyena o re: “Bonang! dilo ka moka ke di dira tše mpsha.”—Kutollo 21:4, 5.

Ka ge selo se sengwe le se sengwe se e-na le nako ya sona, potšišo yeo e rotogago ke ya gore, Nako yeo ya tsošološo e tla tla neng e le gore dikholofetšo tše di kgahlišago tša Modimo di phethagale? Bagatiši ba makasine wo, e lego Dihlatse tša Jehofa, ba be ba dutše ba katanela go tsebiša batho gore re phela nakong yeo Beibele e e bitšago ‘mehla ya bofelo’ le gore nako ya gore Modimo a tšee kgato ya go ‘dira dilo ka moka tše mpsha’ e batametše. (2 Timotheo 3:1) Re go kgothaletša gore o hlahlobe Beibele gomme o ithute ka ditebelelo tše di kgahlišago tšeo o ka bago le tšona. Re go kgothaletša gape gore o amogele taletšo e rego: “Nyakang Morêna è sa le lebaka la xo ka mmôna, Le mmitšeng à sa le kxaufsi.” (Jesaya 55:6) Go e na le go rerwa e sa le pele, bophelo le ditebelelo tša gago tša ka mo go sa felego di laolwa ke wena.

[Ntlhakgolo go letlakala 8]

“Bonang! dilo ka moka ke di dira tše mpsha”