Go Thabela Go Dira Thato Ya Modimo Bophelong Bja-ka Ka Moka

Ka ge go Anega Bill Yaremchuk

Ka March 1947, dikgwedi tše sego kae feela ka morago ga go aloga bjalo ka moromiwa sehlopheng sa bo-seswai Sekolong sa Beibele sa Watchtower sa Gilead, seo ka nako yeo se bego se le South Lansing, New York kua U.S.A., ke be ke le tseleng ya go ya kabelong ya-ka nageng e šele—kgole kua Singapore.

DAVE FARMER, yo a bego a e-tšwa Canada gotee le nna le yo a bego a alogile sehlopheng sa bošupa sa Gilead, o be a tlo šoma gotee le nna. Re ile ra namela Marine Adder, e lego sekepe seo e kilego ya ba sa mašole seo se bego se tloga San Francisco, California.

Boema-kepe bja pele ka Bohlabela e bile Hong Kong. Seo re se bonego moo se be se tšhoša kudu. Tshenyo yeo e bakilwego ke Ntwa ya II ya Lefase e be e bonagala gohle—batho ba be ba rapaletše ditsejaneng, ba swerwe ke tlala e bile ba bonala ba e-hwa. Kapejana re ile ra boela sekepeng ra leba Manila, e lego motse-mošate wa Philippines.

Moo le gona re bone mafelelo a boifišago a ntwa. Boema-kepe bo be bo tletše dikota tša dikepe tšeo di bego di nweletše ka baka la go thuthupišwa ke difofane tša ntwa tša ditšhaba tšeo ba bego ba gwerane le tšona gomme batho bao ba bego ba re dikologile ba be ba diila. Re ile ra kopana le Dihlatse tša Jehofa tše mmalwa, tšeo di ilego tša re iša Holong ya tšona ya Mmušo. Di be di thabile go sa šetšwe mathata ao di bego di lebeletšane le ona.

Boema-kepe bjo bo latelago e be e le Batavia (yeo ga bjale e lego Jakarta) kua Indonesia. Ntwa ya selegae e be e kgatlampana gomme go be go lwewa kgaufsi, ka gona re be re sa dumelelwa go tšwa ka sekepeng. Ge se be se lebile Singapore, ke ile ka thoma go ipotšiša seo se bego se re letetše moo. Na se ke sohle se se šaletšego ka Bohlabela bjo bo kgahlišago ka mo go sa tlwaelegago bjo re badilego ka bjona diporoutšheng tša tša bosepedi?

Ka matšatši a sego kae, dipelaelo tšeo ke bego ke e-na le tšona di ile tša fela. Re be re le kgaufsi le go bona selo seo se bego se tla fediša dipelaelo le ge e le dife go bontšha gore nna le Dave re be re le lesolong leo le bego le dumeletšwe ke Modimo.

Kamoo re Ilego ra Dumelelwa go Dula

Mo e ka bago ka morago ga kgwedi re tlogile San Francisco, mafelelong sekepe sa rena se ile sa ema Sehlakahlakeng sa St. John, moo e bego e le lefelo la Singapore leo go lona sekepe se bego se emišwa go fihlela se dumelelwa go tsena ka boema-kepeng. Bahlankedi ba tša bofaladi ba ile ba namela ka sekepeng go tlo hlahloba dipampiri tša banamedi gomme dipaseporoto tša rena di ile tša tempiwa ka mantšu a rego “O Dumeletšwe go Dula.” Mesong e latelago, sekepe se ile sa ema boema-kepe. Ka morago ga ge dipampiri tša rena di hlahlobilwe ke mohlankedi wa sekepe, re ile ra fologa.

Letšatšing le le latelago re ile ra boela boema-kepe go yo laela baromiwa-gotee le rena bao re bego re dutše re sepela le bona. Ba be ba sa tšwela  pele ka leeto la bona la go ya India le Ceylon (yeo ga bjale e lego Sri Lanka). Ge molaodi wa sekepe a re bona, o ile a fologela boema-kepe gomme a re kgadimola. O be a galefile e bile a bolelela godimo a re botša gore re be re sa swanela go ba re fologile sekepe. Pejana, ge re be re sa le lewatleng, molaodi wa bafaladi e lego Mna. Haxworth o be a mo laetše gore a se ke a re dumelela go tšwa ka sekepeng ge se fihla boema-kepe. Re be re sa tsebe ka taelo yeo, go etša ge mohlankedi yo a re dumeletšego go fologa sekepe le yena a be a sa tsebe.

Ge re be re išwa go Mna. Haxworth, o ile a re galefela kudu. O ile a re hlabela mašata, a re botša gore re be re sa dumelelwa go tsena Singapore. Ka ge re be re sa tsebe ka thibelo le ge e le efe ya go tsena ka nageng, re ile ra mmontšha dipaseporoto tša rena tšeo di bego di e-na le setempe sa semmušo seo se bego se re “O Dumeletšwe go Dula.” O ile a ubula dipaseporoto ka bogale ka diatleng tša rena gomme a phumola mantšu ao. Eupša ka bomadimabe sekepe se be se šetše se tlogile! Mna. Haxworth o ile a swara dipaseporoto tša rena ngwaga ka moka gomme mafelelong o ile a re nea tšona di tempilwe “O Dumeletšwe go Dula.”

Tirelo e Atlegago Kua Singapore

Ge re fihla ka April 1947, monna yo a bitšwago Joshua e be e le yena feela Hlatse Singapore. O hlanketše bjalo ka modiredi wa nako e tletšego goba mmulamadibogo go fihlela a e-hwa mathomong a bo-1970. Go se go ye kae, ba bangwe bao ba bego ba dutše ba ithuta ditherešo tša Beibele ba ile ba thoma go boledišana le ba bangwe ka tšona. Dithapelo tša rena tša go kgopela badiri ba ba oketšegilego punong ya moya di ile tša thoma go arabja.—Mateo 9:37, 38.

Ka 1949, ge Mna. Haxworth a be a ile maikhutšong a matelele kua Engelane, baromiwa ba tshelelago bao ba bego ba alogile sehlopheng sa bo-11 sa Gilead ba ile ba fihla Singapore. Ka nako yeo, Dave yo e bego e dutše e le moromiwa-gotee le nna ka nywaga e mmalwa, o ile a bona e le mo go swanetšego gore a tloge Singapore ka baka la go  babja. O ile a hudugela Australia, moo a ilego a hlankela ka potego go fihlela a e-hwa ka 1973. Gare ga ba tshela bao ba bego ba sa tšwa go fihla go be go e-na le Aileen Franks, yoo ke ilego ka mo nyala ka 1956.

Go theoša le nywaga, re ile ra ithuta Beibele le batho ba bantši bao e ilego ya ba Dihlatse gotee le bana ba bona. Gaešita le lehono, ba bangwe ba bona ba tirelong ya nako e tletšego nageng e šele. Taba e nngwe e kgahlišago ke ya mabapi le Lester le Joanie Haynes, e lego banyalani ba ma-Amerika bao ba bego ba dula Singapore. Re ile ra thoma go ithuta Beibele le bona ka bo-1950. Banyalani ba ba ile ba dira tšwelopele ya ka pela ya moya gomme ba kolobetšwa ka morago ga gore ba boele United States. Ka morago, Lester le Joanie ba ile ba thabela bodiredi bjo bo atlegago. Ba ile ba thuša ba bantši go ba Dihlatse, go akaretša le bana ba bona ba bararo.

Joanie o ngwadile gore: “Ge ke gopola morago ngwageng woo kua Singapore, ruri o fetotše tsela yeo re bego re phela ka yona. Ge nkabe le sa ka la re ‘amogela,’ mohlomongwe re ka be re sa ralala le lefase ka moka. Ke a thaba gore ke lena le rutilego Les therešo ka gobane go tloga mathomong o be a e-na le morutiši yoo a ilego a nweletša ka go yena lerato bakeng sa Jehofa le bakeng sa bana babo rena ba Bakriste. Ga se a ka a tlogela seo.”

Go Hlankela Bjalo ka Lapa Kua Singapore

Ka 1962, go ile gwa ba le tiragalo yeo re bego re sa e letela yeo e bego e tla tliša phetogo e kgolo kabelong ya rena. Ngaka ya rena ya lapa e ile ya botša Aileen gore o imile. Re be re nyaka go tšwela pele ka modiro wa boromiwa, eupša re be re ka dira seo bjang mola ka nako e swanago re godiša ngwana? Nathan H. Knorr, yoo ka nako yeo a bego a okamela modiro wa Dihlatse tša Jehofa lefaseng ka bophara, o ile a re ngwalela, a nkgothaletša gore ke nyake mošomo e le gore re ka dula Singapore. Se se ile sa tliša tlhohlo e kgolo.

Bontši bja batho ba tšwago dinageng dišele ba be ba hweditše mešomo ya maemo a godimo dikhamphaning tša dinaga dišele. Ke be ke se na maitemogelo go tša kgwebo ka ge ke ile ka tsenela tirelo ya nako e tletšego ka morago ga go fetša sekolo nywageng e 23 e fetilego. Ka gona ke ile ka lefa khamphani e nyakelago batho mešomo kua London gore e ntirele lengwalo la ditshwanelego tša mošomo (résumé) go ithekgile ka mošomo wa-ka bjalo ka modiredi wa bodumedi nageng e šele gomme e ile ya le romela dikhamphaning tše dintši tša ditšhaba-tšhaba tšeo di lego mo Singapore.

Ke be ke dula ke amogela diphetolo tšeo di rego, “Re maswabi gore ga re na mošomo bakeng sa motho le ge e le ofe yo a nago le ditshwanelego tše di swanago le tša gago.” Ba be ba nagana gore ke na le maitemogelo a magolo kudu gore ba ka nthwala! Dikgwedi di ile tša feta gomme ngwana wa rena Judy o ile a belegwa. Ka nako yeo ngwanabo rena Knorr o be a etetše Singapore gomme o ile a ya go bona Judy le mmagwe sepetlele. O ile a re kgonthišetša ka gore: “Le ka tšwela pele le dula legaeng la baromiwa go fihlela Bill a hwetša mošomo.”

Dikgwedi tše mmalwa ka morago, ke ile ka hwetša mošomo wa go bapatša khamphaning ya ditšhaba-tšhaba ya difofane. Tšhelete yeo ke bego ke e hwetša e be e sa lekana gore re ka iphediša ka yona. Nywaga e mebedi ka morago, khamphani ya difofane ya Amerika e ile ya nthwala gomme ya ntefa tšhelete e fetago yeo ke bego ke e gola pele ka makga a mabedi. Mafelelong, ke ile ka tsebja kudu go tša boeti gomme ke be ke e-na le nako e ntši bakeng sa lapa la-ka le bodiredi bja Bokriste.

Re ile ra thea bophelo bja rena tirelong ya Jehofa gomme ra etiša borapedi bja rena pele. Se se ile sa dira gore ke kgone go hwetša dibaka tše dintši tša go hlankela ka gare ga mokgatlo. Aileen o ile a tsenela tirelo ya nako e tletšego gape. Ka nako yeo, modiro wa go bolela ka Mmušo o be o gola mo Singapore. Bogareng bja bo-1960, re ile ra reka moago o mobotse wa mabato a mabedi toropong woo re ilego ra o diriša e le Holo ya Mmušo. Diphuthego tše nne di be di kopanela go ona.

Modiro wa Rena o Thibetšwe!

Ge nako e dutše e e-ya, go ile gwa bonala gore re tla aparelwa ke leru le leso la kganetšo. Ka January 14, 1972, re ile ra ya dibokeng tša rena Holong ya Mmušo bjalo ka ge re be re tlwaetše go dira bjalo. Eupša kgoro e be e tlemilwe ka ketane yeo e bego e notletšwe. Go be go ngwadilwe tsebišo yeo e rego Phuthego ya Dihlatse tša Jehofa ya Singapore e phumotšwe semmušo. Re be re thibetšwe! *

 Go tswalelwa ga Holo ya Mmušo ga se gwa ka gwa re thibela go rapela Jehofa, eupša potšišo yeo ke bego ke ipotšiša yona ke e rego, ‘Thato ya Modimo ke efe ka lapa la-ka?’ Ke ile ka ipotša gore ge e ba go ka direga gore ba re huduše, re be re ka se sa kgona go boa re tlo etela bagwera ba rena mo Singapore. Ka gona ke ile ka kgopela molaodi wa khamphani ge e ba nka šoma Kuala Lumpur kua Malaysia. Ka go realo, lapa la rena le be le ka kgona go ya Singapore le go boela Malaysia ka ntle le bothata. Se se makatšago ke gore o ile a nnea mošomo bjalo ka molaodi wa ofisi ya Kuala Lumpur, woo o bego o tla oketša mogolo wa-ka ka makga a mabedi go feta wa pele le go nnea mehola e mengwe.

Ka gona, ke ile ka ipotšiša gore, ‘Na ke thato ya Modimo gore re tloge Singapore le go tlogela bana babo rena?’ Re ile ra botša Jehofa taba ye ka thapelo re le lapa. Re ile ra phetha ka gore ke Jehofa Modimo yo a bego a re tlišitše mo. Ka gona ke ile ka dira phetho ya mafelelo—re a dula. Molaodi wa khamphani o be a maketše gore ke ganne mošomo wo a bego a nnea wona wo o bego o lefa kudu.

Go phela le go šoma ka tlase ga thibelo go be go gateletša, ka ge ka mehla re be re tšhošetšwa ka go swarwa le go golegwa. Go be go e-na le dinako tše dingwe tšeo di bego di dira gore re tloge re leboga mantšu ao a lego go Psalme 34:7 ao a rego: “Morongwa wa Morêna ó xoraxorêla ba ba mmoifaxo; ó a ba namolêla.”

Kabelo e Mpsha

Mafelelong ka 1993, ka morago ga go hlankela kua Singapore ka nywaga ya ka godimo ga e 46, re ile ra kgopelwa go hudugela New Zealand, moo re bego re ka hlankela ntle le kgateletšo le dipelaelo tše dintši. Go sa šetšwe seo, re be re nyamišitšwe ke go tlogela bagwera ba rena ba rategago kua Singapore, bao re bego re ba rata kudu. Lega go le bjalo, re be re kgothaditšwe ke go tseba gore tumelo ya bona e be e agilwe motheong o tiilego ka dikago tše di palelago mollo. Se se ile sa dira gore ba kgone go ema ba tiile kgahlanong le diteko tšeo ba ilego ba tšwela pele ba di kgotlelela.—1 Bakorinthe 3:12-14.

Ga bjale, ka morago ga nywaga ya ka godimo ga e 14 re le New Zealand, nna le Aileen re sa dutše re thabela bodiredi bja rena bjalo ka babulamadibogo ba ba kgethegilego gaešita le ge re tšofetše. Bo-mogol’aka ba babedi—Mike yo a nago le nywaga e 94 le Peter yo a nago le e 90—ba sa phela e bile ba hlankela Jehofa ka potego kua Canada.

Ka 1998 morwedi wa rena Judy o ile a boela Bohlabela gomme a hlankela moo ka nywaga e mmalwa. Ka go le lengwe la mangwalo ao a re ngwaletšego ona, o ngwadile gore: “Ke leboga Jehofa gakaakang letšatši le lengwe le le lengwe bakeng sa sebaka se sebotse seo ke nago le sona sa go hlankela mo! Le gona ke le leboga bobedi bja lena bakeng sa tlwaetšo e lerato le boikgafo bjo le bo dirilego le bjoo le tšwelago pele go bo dira e le gore ke kgone go tšwela pele ka bodiredi bja-ka.” Ka 2003 o ile a boa New Zealand e le gore a tlo hlokomela nna le Aileen. *

Re leboga Jehofa kudu gore maemo a rena a ile a re dumelela go arabela taletšong ya Mong wa puno ya badiri ba ba oketšegilego bakeng sa puno. Go dira ga rena bjalo go re tlišeditše lethabo le le sa hlalosegego. Le gona, ge ‘lefase le feta’ ka ge Beibele e bolela gore go tla ba bjalo, re tla thabela go phethagala ga kholofetšo ya Modimo e kgahlišago e rego: “Yo a dirago thato ya Modimo o dula a le gona ka mo go sa felego.”—1 Johane 2:17.

[Mengwalo ya tlase]

[Seswantšho go letlakala 29]

Joshua e be e le yena feela Hlatse Singapore ge re be re fihla ka 1947

[Seswantšho go letlakala 29]

Ke e-na le Dave Farmer kua Hong Kong, ge re be re le tseleng re lebile Singapore ka 1947

[Seswantšho go letlakala 29]

Ke e-na le Aileen ka 1958

[Seswantšho go letlakala 31]

Re e-na le morwedi wa rena Judy

[Mothopo]

Kimroy Photography

[Mothopo wa Seswantšho go letlakala 28]

Kimroy Photography