Ekišang Tumelo ya Bona

O Ile a Lebelela Gomme a Leta

ELIYA o be a nyaka go ba noši gomme a rapele Tatagwe wa legodimong. Eupša mašaba a batho ao a bego a mo dikologile a be a sa tšwa go bona moporofeta yo wa therešo a bitša mollo o tšwago legodimong gomme ga go pelaelo gore bontši bja bona bo be bo nyaka gore a bo amogele. Pele Eliya a ka rotogela tlhoreng ya Thaba ya Karamele yeo e sego ya šireletšega diphefong gotee le go batamela Jehofa Modimo ka thapelo ka sephiring, o ile a lebeletšana le modiro o sa thabišego. O ile a swanelwa ke go yo bolela le Kgoši Ahaba.

Banna ba ba babedi ba be ba fapane kudu. Ahaba, yo a bego a apere seaparo se sebotse sa bogoši, e be e le mohlanogi yo a nago le megabaru e bile a le boi. Eliya o be a apere seaparo sa semmušo sa boporofeta—seo mohlomongwe se dirilwego ka letlalo la phoofolo goba boya bjo bo logilwego bja kamela goba bja pudi le seo se sego sa kgabišwa eupša e le se tiilego. E be e le monna yo sebete kudu, yo a botegago le yo a nago le tumelo. Letšatši le leo le bego le e-ya bofelong le be le utolotše mo gontši ka dimelo tša banna ba ba babedi. *

Ahaba le barapedi ba bangwe ba Baali ba be ba pepentšhitšwe letšatšing leo. Bodumedi bja boheitene bjoo Ahaba le mosadi wa gagwe, Kgošigadi Isabele, ba bego ba bo thekga mmušong wa meloko e lesome wa Isiraele bo be bo hlatsetšwe e le bja maaka. Baali o be a pepentšhitšwe bjalo ka modimo wa maaka. Modimo yoo yo a sa phelego o be a paletšwe ke go gotša mollo e le gore a arabele baporofeta ba gagwe ge ba be ba ba mo lopa ka go hlaba mašata le go bina e bile ba itshega ka dithipa. Baali o be a paletšwe ke go šireletša banna bao ba 450 gore ba se ke ba bolawa, e lego seo se bego se ba swanetše. Eupša modimo yo wa maaka o be a paletšwe go selo se sengwe gape gomme go palelwa moo go be go le kgaufsi le go phethwa. Mo e ka bago ka godimo ga nywaga e meraro, baporofeta ba Baali ba be ba ile ba lopa modimo wa bona go fediša komelelo nageng, eupša Baali o ile a palelwa ke go dira bjalo. Kgaufsinyane Jehofa o be a tla bonagatša matla a gagwe ka go fediša komelelo.—1 Dikxoši 16:30–17:1; 18:1-40.

Lega go le bjalo, ke neng moo Jehofa a bego a tla gata mogato? Eliya o be a tla itshwara bjang go fihla nakong yeo? Le gona, re ka ithuta’ng go monna yo wa tumelo? Anke re boneng ge re hlahloba pego yeo e ngwadilwego go 1 Dikxoši 18:41-46.

Monna yo a Bego a Rata go Rapela

Eliya o ile a batamela Ahaba gomme a re: “Rotoxa, O jê O nwê; xo kwala modumô wa pula.” (Temana 41) Na kgoši ye e kgopo e be e ithutile selo le ge e le sefe ditiragalong tša letšatšing leo? Pego ga e bolele ka go lebanya ka seo, lega go le bjalo ga e re botše gore o ile a itshola le go kgopela moporofeta gore a mo thuše go batamela go Jehofa le go kgopela tebalelo. Aowa, Ahaba o ile a fo “rotoga go yo ja le go nwa.” (Temana 42, PK) Go thwe’ng ka Eliya?

“Eliya a namelela ntlheng ya thaba ya Karamele, a inamela fase, a bea sefahlogo sa gagwe makgatheng a matolo a gagwe.” Ge Ahaba a ile go ja, Eliya o ile a hwetša sebaka sa go rapela Tatagwe. Ela hloko boemo bja boikokobetšo bjo bo hlalositšwego mo—Eliya o khuname gomme o inamišitše hlogo kudu moo e lego gore sefahlego sa gagwe se kgaufsi le matolo a gagwe. Eliya o be a dira’ng? Ga se ra swanela go phopholetša. Beibele go Jakobo 5:18 e re botša gore Eliya o ile a rapelela  gore komelelo e fele. Ga go pelaelo gore o ile a dira thapelo e bjalo a le tlhoreng ya thaba ya Karamele.

Pejana, Jehofa o itše: “Ke rata xo neša pula lefaseng.” (1 Dikxoši 18:1) Ka gona, Eliya o ile a rapela gore Tatagwe a phethagatše thato ya gagwe yeo a e boletšego, go swana le ge Jesu a rutile barutiwa ba gagwe gore ba rapele bjalo nywageng e ka bago e sekete ka morago.—Mateo 6:9, 10.

Mohlala wa Eliya o re ruta mo gontši ka thapelo. Selo se segolo seo Eliya a bego a nagana ka sona e be e le go phethagatšwa ga thato ya Tatagwe. Ge re rapela, ke mo gobotse go gopola gore: “Go sa šetšwe seo re se kgopelago go ya ka thato ya [Modimo], o a re kwa.” (1 Johane 5:14) Go molaleng gore re swanetše go tseba seo thato ya Modimo e lego sona e le gore re rapele ka tsela e amogelegago, e lego lebaka le lebotse la go dira thuto ya Beibele karolo ya bophelo bja rena bja letšatši le letšatši. Ka kgonthe Eliya le yena o be a nyaka gore komelelo e fele ka baka la tlaišego yeo e bego e le gona gare ga batho ba naga ya gabo. Ka mo go swanago, le yena pelo ya gagwe e be e tletše ka ditebogo, ka morago ga go bona mohlolo woo Jehofa a o dirilego letšatšing leo. Ka mo go swanago, dithapelo tša rena di swanetše go bontšha gore re tshwenyega ka ba bangwe gotee le go ba le tebogo e tšwago pelong.—2 Bakorinthe 1:11; Bafilipi 4:6.

Go Bontšha Kgodišego le go Phakgama

Eliya o be a kgodišegile gore Jehofa o be a tla gata mogato wa go fediša komelelo, eupša o be a sa kgodišega gore Jehofa o tla gata mogato woo neng. Ka gona, moporofeta o ile a dira’ng ge a sa letetše seo? Ela hloko seo temana 43 e se bolelago: “A roma lesoxana la xaxwe a re: Rotoxa O lebêlêlê thokô ya lewatlê. Lesoxana la rotoxa la lebêlêla, la re: Xa xo selô! Eliya a re: Boêlêla, O dirê xa-šupa.” Mohlala wa Eliya o re ruta bonyenyane dithuto tše pedi. Sa pele, ela hloko kgodišego ya moporofeta. Ke moka, o ele hloko go phakgama ga gagwe.

Eliya o ile a fagahlela go bona bohlatse le ge e le bofe bja gore Jehofa o be a le kgaufsi le go gata mogato, ka gona o ile a roma mohlanka wa gagwe gore a ye ntlheng e phagamego ya thaba gore a lebeledišiše go bona pontšho le ge e le efe ya gore pula e kgaufsi le go na. Ge a boile, mohlanka o ile a mo nea pego ye yeo e sa kgahlišego: “Xa xo selô!” Go be go sa bonale pula yeo e tlago gomme mohlomongwe leratadima le be le se na maru. Bjale, na o lemogile selo se sengwe se se sa tlwaelegago? Gopola, Eliya o be a sa tšwa go botša Kgoši Ahaba gore: “Xo kwala modumô wa pula.” Ke bjang moporofeta a bego a ka bolela selo se bjalo mola go be go sa bonagale maru a pula?

Eliya o be a tseba kholofetšo ya Jehofa. Bjalo ka moporofeta wa Jehofa le moemedi wa gagwe, o be a kgodišegile gore Modimo wa gagwe o be a tla phethagatša lentšu la Gagwe. Eliya o be a kgodišegile—moo go bego go le bjalo ka ge eka o be a šetše a e-kwa modumo wa pula e ntši. Re ka gopotšwa ka tsela yeo Beibele e hlalosago Moše ka gona ge e re: “O ile a tšwela pele a tiile go etša ge eka o bona Yo a sa bonagalego.” Na Modimo ke wa kgonthe go wena? O re nea mabaka a mantši a go ba le tumelo e swanago go yena le dikholofetšong tša gagwe.—Baheberu 11:1, 27.

Se se latelago, ela hloko kamoo Eliya a bego a phakgame ka gona. O ile a roma mohlanka wa  gagwe gape, e sego gatee goba gabedi, eupša gašupa! Re ka akanya mohlanka yoo a lapišwa ke go boelela gantši-ntši, eupša Eliya o ile a dula a fagahletše go bona pontšho gomme ga se a ka a langwa. Mafelelong, ka morago ga go boelela gašupa, mohlanka o ile a bega gore: “Lerunyana še-lelee, le le lekanaxo le seatla sa motho; le rotoxa lè e-tšwa lewatleng.” (Temana 44) Na o ka kgona go bona mohlanka yoo, a otlolotše letsogo la gagwe gomme a diriša seatla sa gagwe go lekanya bogolo bja leru le tee le lenyenyane leo le rotogago Lewatleng le Legolo? * Go ka direga gore leru leo e be e se la bohlokwa go mohlanka. Lega go le bjalo, go Eliya, leru leo le be le le bohlokwa kudu. Ke moka o ile a nea mohlanka wa gagwe ditaelo tše akgofilego: “Sepela O botšê Ahaba O re: Bofa koloi, pula e se tlo Xo swara.”

Eliya o re beetše mohlala o matla gape. Le rena re phela nakong yeo ka yona Modimo a tlago go gata mogato kgaufsinyane go phethagatša morero wa gagwe wo a o boletšego. Eliya o be a letetše gore komelelo e fele, bahlanka ba Modimo lehono ba letetše go fela ga tshepedišo ye ya dilo ya lefase e kgopo. (1 Johane 2:17) Go ba go fihla ge Jehofa Modimo a gata mogato, re swanetše go dula re phakgame, go etša ge Eliya a be a le bjalo. Morwa wa Modimo ka noši, Jesu, o eleditše balatedi ba gagwe ka gore: “Ka baka leo, dulang le phakgame gobane ga le tsebe letšatši leo Morena wa lena a tlago ka lona.” (Mateo 24:42) Na Jesu o be a bolela gore balatedi ba gagwe ba be ba ka se tsebe ka mo go feletšego gore bofelo bo be bo tla tla neng?  Aowa, ka gobane o boletše kudu ka tsela yeo lefase le bego le tla ba ka yona pele bofelo bo fihla. Yo mongwe le yo mongwe wa rena a ka ithuta ka pontšho ye e feletšego ya “bofelo bja tshepedišo ya dilo.”—Mateo 24:3-7. *

Sebopego se sengwe le se sengwe sa pontšho yeo se nea bohlatse bjo matla le bjo bo kgodišago. Na bohlatse bjo bo bjalo ke bjo bo lekanego go re tutueletša go gata mogato ka go akgofa? Leru le tee le lenyenyane leo le rotogago lewatleng le be le lekane go ka kgodiša Eliya gore Jehofa o be a le kgaufsi le go gata mogato. Na moporofeta yo a botegago o be a nyamišitšwe ke seo?

Jehofa o Tliša Kimollo le Ditšhegofatšo

Pego e tšwela pele ka gore: “Ké xe lexodimo le šetše le fifala ka maru le ka ledimo; xwa tla pula e kxolo. Ahaba yêna ó be a tloxile ka koloi à leba Jeseriele.” (Temana 45) Ditiragalo di ile tša thoma go direga ka lebelo le le makatšago. Ge mohlanka wa Eliya a sa begela Ahaba molaetša o tšwago go moporofeta, lerunyana lela le ile la gola, la tlatša le go fsifatša legodimo. Gwa tsoga ledimo le legolo. Mafelelong, ka morago ga nywaga e meraro le seripa, pula e ile ya na nageng ya Isiraele. * Mobu o omeletšego o ile wa monya marothi a pula. Ge pula e e-ba e kgolo, noka ya Kisoni e ile ya tlala gomme ga go pelaelo gore e ile ya hlatswa madi a baporofeta ba Baali bao ba bego ba bolailwe. Baisiraele bao ba sa kwego le bona ba ile ba newa sebaka sa go hlatswa sepatso se se šiišago sa borapedi bja Baali nageng.

Ka ntle le pelaelo Eliya o ile a holofela gore go tla ba bjalo! Na Ahaba o be a tla fetoga gomme a furalela Borapedi bjo bo šilafatšago bja Baali? Ditiragalo tša letšatšing leo di be di neile mabaka a matla a go dira diphetogo tše bjalo. Ke therešo gore re ka se tsebe seo Ahaba a bego a se nagana ka nako yeo. Pego e re botša feela gore kgoši ‘e ile ya tloga ka koloi ya leba Jeseriele.’ Na o be a ithutile selo se sengwe? Na o be a ikemišeditše go fetoša ditsela tša gagwe? Ditiragalo tša ka morago di bontšha gore karabo ke aowa. Lega go le bjalo, letšatši le be le sešo la fela bakeng sa Ahaba—goba bakeng sa Eliya.

Moporofeta wa Jehofa o ile a sepela ka yona tsela yeo Ahaba a sepetšego ka yona. O be a letetšwe ke leeto le letelele la lefsifsi, tseleng e kolobilego. Ke moka, selo se sengwe se se sa tlwaelegago se ile sa direga.

“Xe e le Eliya, yêna seatla sa Morêna se be se le xodimo xa xaxwe, a itlêma mathêka, a kitima à le pele xa Ahaba, a bá a fihla Jeseriele.” (Temana 46) Go molaleng gore “seatla sa Morêna” se be se thuša Eliya ka tsela ya mohlolo. Jeseriele e be e le bokgole bja dikhilomithara tše 30, le gona Eliya e be e se mofsa. * Nagana feela ka moporofeta yoo a tlema seaparo sa gagwe se setelele lethekeng e le gore a kgone go kitima ka bolokologi tseleng yeo e kolobilego—a kitima ka lebelo kudu mo e lego gore o ile a hwetša koloi ya ntwa ya bogoši le go e feta!

Ruri se e swanetše go ba e be e le tšhegofatšo e kgolo go Eliya! E swanetše go ba e be e le mo go thabišago go kwa matla a bjalo—go ikwa a le matla e bile a e-na le matšato—mohlomongwe gaešita le go feta ge e be e sa le yo mofsa. Re ka gopotšwa ka boporofeta bjo bo kgonthišetšago bophelo bjo bo phethagetšego bja mmele le matla bathong ba botegago lefaseng la Paradeise leo le sa tlago. (Jesaya 35:6; Luka 23:43) Ge Eliya a be a kitima tseleng yeo e bego e kolobile, ruri o be a tseba gore o be a amogelwa ke Tatagwe, Modimo a nnoši wa therešo, Jehofa!

Jehofa o fagahlela go re nea ditšhegofatšo tša gagwe. E le gore re di hwetše, go nyakega gore re dire maiteko ka moka. Ka go swana le Eliya, re swanetše go dula re phakgame, re lekole ka kelohloko bohlatse bjo matla bjo bo bontšhago gore Jehofa o kgaufsi le go gata mogato dinakong tše tše kotsi le tše akgofilego. Ka go swana le Eliya, re na le mabaka ka moka a go ba le kgodišego e feletšego dikholofetšong tša Jehofa, “Modimo-mmotexi.”—Psalme 31:5.

[Mengwalo ya tlase]

[Lepokisi/Seswantšho go letlakala 19]

Komelelo ya Mehleng ya Eliya e Tšere Nako e Kaaka’ng?

Moporofeta wa Jehofa e lego Eliya o tsebišitše Kgoši Ahaba gore komelelo yeo e bego e tla tšea nako e telele e be e tla fela kgaufsinyane. Seo se diragetše ‘ngwageng wa boraro’—mohlomongwe go tloga letšatšing leo Eliya a tsebaditšego komelelo ka lona. (1 Dikxoši 18:1) Jehofa o ile a neša pula kapejana ka morago ga gore Eliya a bolele gore Jehofa o tla dira bjalo. Ka gona, ba bangwe ba ka phetha ka gore komelelo e ile ya fela ngwageng wa yona wa boraro le gore ka go realo ga se ya tšea nywaga e meraro. Lega go le bjalo, Jesu le Jakobo ba re botša gore komelelo e tšere “nywaga e meraro le dikgwedi tše tshela.” (Luka 4:25; Jakobo 5:17) Na Beibele e a ikganetša tabeng ye?

Le gatee. Taba ke gore sehla sa komelelo Isiraeleng ya bogologolo se be se tšea nako e telele kudu, mo e ka bago dikgwedi tše tshela. Ga go pelaelo gore Eliya o tlile go Ahaba go mo tsebiša ka komelelo ge sehla sa komelelo se šetše se e-ba se setelele ka mo go sa tlwaelegago e bile e le se šoro. Ge e le gabotse, komelelo e be e thomile mo e ka bago dikgweding tše tshela tše di fetilego. Ka gona, ge Eliya a tsebatša go fela ga komelelo ‘ka ngwaga wa boraro,’ go tloga tsebišong ya gagwe ya mathomo, komelelo e be e šetše e tšere mo e ka bago nywaga e meraro le seripa. Go be go fetile ‘nywaga e meraro e feletšego le dikgwedi tše tshela’ ge batho ka moka ba be ba bokane bakeng sa go bona teko e kgolo Thabeng ya Karamele.

Ka gona, ela hloko nako yeo Eliya a etetšego Ahaba ka yona. Batho ba be ba dumela gore Baali o be a “nametše maru,” gore ke modimo yo a bego a tla neša pula e le gore a fediše sehla sa komelelo. Ge e ba sehla sa komelelo e be e le se setelele ka mo go sa tlwaelegago, mohlomongwe batho ba be ba ipotšiša gore: ‘Baali o kae? O tla neša pula neng?’ Tsebišo ya Eliya ya gore ga go pula goba phoka yeo e tlago go na go fihlela ge a bolela gore e tla na, e swanetše go ba e ile ya nyamiša barapedi bao ba Baali.—1 Dikxoši 17:1.

[Tlhaloso ya Mothopo]

Pictorial Archive (Near Eastern History) Est.

[Seswantšho go letlakala 18]

Dithapelo tša Eliya di bonagaditše kganyogo ya gagwe e tseneletšego ya go bona thato ya Jehofa e dirwa