Dula o na le Maikwelo a go Akgofa ga Nako
Dula o na le Maikwelo a go Akgofa ga Nako
“O bolele lentšu la Modimo, o be go lona ka go se dikadike.”—2 TIM. 4:2.
NA O KA HLALOSA?
․․․․․
Ke ka baka la’ng Bakriste ba lekgolong la pele la nywaga ba ile ba dira boboledi ka go akgofa?
․․․․․
Re ka dula bjang re na le maikwelo a go akgofa ga nako?
․․․․․
Ke ka baka la’ng go bolela ka Mmušo go akgofile kudu gona bjale go feta le ge e le neng pele?
1, 2. Ke dipotšišo dife tšeo di rotogago mabapi le taelo ya gore re ‘bolele lentšu la Modimo ka go se dikadike’?
GANTŠI batho bao mošomo wa bona e lego go phološa maphelo a batho ba o dira ba na le maikwelo a go akgofa. Ka mohlala, boraditimamollo ba kitimela moo go nago le boemo bja tšhoganyetšo; ba a tseba gore maphelo a batho a kotsing.
2 Ka ge re le Dihlatse tša Jehofa, re nyaka go thuša batho gore ba phologe. Ka baka leo, re tšeela godimo taelo ya gore re bolele ditaba tše dibotse tša Mmušo. Go ba gona, ga re dire modiro wo okare re tlaletšwe. Ka gona, moapostola Paulo o be a e ra go reng ge a be a nea keletšo e rego: “O bolele lentšu la Modimo, o be go lona ka go se dikadike”? (2 Tim. 4:2) Re ka bolela bjang lentšu la Modimo ka go se dikadike? Le gona ke ka baka la’ng modiro wa rena o akgofile ka tsela ye?
KE KA BAKA LA’NG MODIRO WA RENA WA BOBOLEDI O AKGOFILE?
3. Batho bao ba amogelago goba bao ba ganago molaetša wa Mmušo ba ka feleletša ka’ng?
3 Ge o ela hloko batho bao ba ka phologago goba bao ba ka fedišwago ka baka la modiro wa rena wa boboledi, go ka direga gore o bona bohlokwa bja go botša ba bangwe ditaba tše dibotse ka go akgofa. (Baroma 10:13, 14) Lentšu la Modimo le re: “Ge ke botša motho yo kgopo ke re: ‘O tlo hwa lehu,’ gomme yena a boa a furalela sebe sa gagwe a tšwela pele a dira toka le toko, . . . ruri o tla tšwela pele a phela. A ka se hwe. Ga go le setee sa dibe tša gagwe tšeo a di dirilego seo se tlago go gopolwa.” (Hesek. 33:14-16) Ee, Beibele e botša bao ba rutago molaetša wa Mmušo gore: ‘Le tla iphološa la ba la phološa bao ba le theetšago.’—1 Tim. 4:16; Hesek. 3:17-21.
4. Ke ka baka la’ng bohlanogi bo ile bja dira gore modiro wa boboledi wa lekgolong la pele la nywaga o akgofe?
4 Gore re kwešiše lebaka leo Paulo a kgothaditšego Timotheo go dira boboledi ka maikwelo a go akgofa, anke re eleng hloko taba yeo e dikologilego lengwalo la rena la sehlogo. Re bala gore: “O bolele lentšu la Modimo, o be go lona ka go se dikadike ka dinako tše di loketšego le ka dinako tša mathata, o sole, o kgaleme, o kgothatše ka go se fele pelo ka moka le bokgoni bja go ruta. Gobane go tla ba le nako yeo ka yona ba ka se kego ba kgotlelela thuto e phelago, eupša ba tla ba gare ga barutiši ka go dumelelana le dikganyogo tša bona gore ba kweše ditsebe tša bona bose. Ba tla kgaotša go theetša therešo.” (2 Tim. 4:2-4) Jesu o boletše e sa le pele gore go be go tla tšwelela bohlanogi. (Mat. 13:24, 25, 38) Ge bohlanogi bjoo bo be bo le kgauswi le go tšwelela, e be e le mo go akgofilego gore Timotheo a “bolele lentšu” gaešita le ka gare ga phuthego e le gore Bakriste ba se timetšwe ke maaka ao a goketšago a dithuto tša maaka. Maphelo a batho a be a le kotsing. Go thwe’ng ka lehono?
5, 6. Ke dikgopolo dife tšeo di tlwaelegilego tše re ka kopanago le tšona ge re le bodireding?
5 Go hlanogela borapedi bja therešo go gotše kudu le go ata lehono. (2 Bathes. 2:3, 8) Ke dithuto dife tšeo di kwešago ditsebe tša batho bose lehono? Mafelong a mantši, thuto ya tlhagelelo e hlohleletšwa ke bodumedi. Gaešita le ge tlhagelelo gantši e rutwa bjalo ka ge e ka ke karolo ya thutamahlale, e nyakile e fetoga bodumedi bjo bo atilego bjoo bo kgomago tsela yeo batho ba lebelelago Modimo le batho ba bangwe ka yona. Thuto e nngwe e atilego ke ya gore Modimo ga a na taba le rena; ka go re’alo, ga go nyakege gore re kgahlegele go mo tseba. Ke ka baka la’ng dithuto tše tšeo di robatšago batho ba dimilione boroko bja moya e le tše ipiletšago ka tsela ye? Bobedi bja tšona di na le molaetša o swanago wa gore: ‘O ka dira selo seo o se ratago ka gobane ga go yo a tlago go go ahlola.’ Ruri wo ke molaetša woo o kwešitšego ditsebe tša batho ba bantši bose.—Bala Psalme 10:4.
6 Eupša go na le ditsela tše dingwe gape tšeo ditsebe tša batho di kwešwago bose. Ba bangwe bao ba yago kerekeng ba rata go ba le baruti bao ba ba botšago gore: ‘Go sa šetšwe seo o se dirago, Modimo o a go rata.’ Baruti ba kweša ditsebe tša batho bose ka go ba kgodiša gore Modimo o thekga ditirelo tša bodumedi, Mmisa, menyanya yeo e dirwago matšatšing a maikhutšo a bodumedi le diswantšho. Ruri batho ba bao ba yago dikerekeng ga ba lemoge kotsi ya boemo bjo ba lego go bjona. (Ps. 115:4-8) Lega go le bjalo, ge e ba re ka ba tsoša borokong bja moya e le gore ba kwešiše molaetša wa therešo wa Beibele, ba ka holwa ke Mmušo wa Modimo.
KE’NG SEO SE BOLELWAGO KE GO DIRA BOBOLEDI KA GO AKGOFA?
7. Re ka bontšha bjang maikwelo a go akgofa ga nako?
7 Ngaka ya go bua yeo e lego šedi e swanetše go tsepamiša kgopolo mošomong wa yona ka gobane bophelo bja motho yo e mmuago bo kotsing. Ge re le bodireding bja rena bja Bokriste, re ka kgona go bonagatša maikwelo a go akgofa ga nako ka go tsepamiša kgopolo modirong wa rena, ka go nagana ka ditaba, dipotšišo goba tsebišo yeo e ka kgahlago batho bao re kopanago le bona. Maikwelo a go akgofa ga nako a ka ba a re šušumeletša go beakanya lenaneo la rena e le gore re etele batho ka nako yeo ba tlogago ba ka re amogela ka yona.—Baroma 1:15, 16; 1 Tim. 4:16.
8. Gantši go dira dilo ka go akgofa go akaretša’ng?
8 Go ba le maikwelo a go akgofa ga nako go akaretša le go etiša pele dilo tše bohlokwa bophelong. (Bala Genesi 19:15.) Ka mohlala, inagane ka morago ga go hwetša dipoelo tša gago tša diteko, ngaka ya gago e go biletša ka ofising ya yona gomme e go botša ka go lebanya gore: “Bona mo! Boemo bja gago ke bja tšhoganetšo. O šaletšwe ke mo e ka bago kgwedi feela gore o dire se sengwe ka bolwetši bja gago.” Go molaleng gore o be o ka se tšwe ka ofising ya gagwe bjalo ka raditimamollo yo a kitimetšego boemong bja tšhoganetšo. Eupša o be o tla theetša ditšhišinyo tša gagwe, wa ya gae gomme wa naganišiša ka mo go tseneletšego ka dilo tšeo di tlago pele bophelong bja gago.
9. Ke ka baka la’ng re ka bolela gore Paulo o dirile boboledi ka go akgofa ge a be a le Efeso?
9 Re ka kwešiša maikwelo a Paulo a go akgofa ga nako ka go lemoga seo a se boditšego bagolo ba kua Efeso mabapi le go bolela ga gagwe ditaba tše dibotse seleteng sa Asia. (Bala Ditiro 20:18-21.) Go bonagala eka go tloga letšatšing la pele ge a fihla moo, o ile a swarega kudu ka go etela batho ka ntlo le ntlo a ba botša ditaba tše dibotse. Go oketša moo, ka nywaga e mebedi o ile a latela thulaganyo ya ka mehla ya go “nea dipolelo letšatši le letšatši holong ya sekolo ya Tiranno.” (Dit. 19:1, 8-10) Go molaleng gore maikwelo a Paulo a go akgofa ga nako a tutueditše bophelo bja gagwe bja letšatši le letšatši. Taletšo ya gore re ‘dire boboledi bja rena ka go se dikadike’ ga se ya bolelwa ka maikemišetšo a go re imetša ge re dira modiro woo re o laetšwego. Lega go le bjalo, modiro wa boboledi o swanetše go tla pele maphelong a rena.
10. Ke ka baka la’ng re ka thabišwa ke gore Bakriste ba ile ba ba le maikwelo a go akgofa ga nako nywageng e ka bago e 100 e fetilego?
10 Mohlala wa sehlopha se senyenyane sa Barutwana ba Beibele seo pele ga 1914 se ilego sa thoma go bolela ditaba tše dibotse o bontšha seo se bolelwago ke go ba le maikwelo a go akgofa ga nako. Gaešita le ge e be e le ba dikete tše mmalwa, ba ile ba kwešiša go akgofa ga nako yeo ba bego ba phela go yona gomme ka phišego ba ile ba dira modiro wa go bolela ka Mmušo. Ba ile ba gatiša dithero dikuranteng tše makgolo gomme ba diriša lenaneo la di-slide tša mmala le diswantšho tšeo di sepelago go dira filimi e bitšwago “Photo-Drama of Creation.” Ka tsela ye, ba ile ba fihlelela batho ba dimilione ka ditaba tše dibotse. Ge nkabe ba be ba se na maikwelo a go akgofa ga nako, ke ba bakae ba rena bao nkabego ba ile ba kwa molaetša wa Mmušo?—Bala Psalme 119:60.
ŠETŠANG GORE LE SE LAHLEGELWE KE MAIKWELO A GO AKGOFA GA NAKO
11. Ke’ng seo se dirilego gore ba bangwe ba lahlegelwe ke maikwelo a go akgofa ga nako?
11 Ditšhitišo di ka dira gore motho a se nagane kamoo modiro wa rena wa boboledi o lego bohlokwa ka gona. Tshepedišo ya Sathane ya dilo e reretšwe go re dira gore re swarege kudu ka dilo tša motho ka noši le ditaba tše dingwe tša ka thoko. (1 Pet. 5:8; 1 Joh. 2:15-17) Ba bangwe bao ba kilego ba etiša pele tirelo ya Jehofa ba ile ba lahlegelwa ke maikwelo a bona a go akgofa ga nako. Ka mohlala, Mokriste yo mongwe wa lekgolong la pele la nywaga yo a bitšwago Dema o ile a ba ‘modirišanigotee’ le Paulo, eupša Dema o ile a šitišwa ke tshepedišo ya dilo yeo batho ba yona ba bego ba sa boife Modimo. Go e na le gore a tšwele pele a matlafatša Paulo ngwanabo dinakong tša mathata, Dema o ile a mo hlanogela.—Fil. 23, 24; 2 Tim. 4:10.
12. Go bulegile sebaka sefe gona bjale, gomme ke dibaka dife tšeo di tlago go re bulegela ka mo go sa felego?
12 Ge eba re nyaka go dula re na le maikwelo a go akgofa ga nako, re swanetše go lwantšha bofokodi bja go thabela dilo tšeo bophelo bjo bo ka re neago tšona. Re swanetše go lwela gore re “swarelele ka go tia bophelong bja kgonthe.” (1 Tim. 6:18, 19) Mohlomongwe ga o belaele gore bophelo bjo bo sa felego mo lefaseng ka tlase ga Mmušo wa Modimo bo tla re nea dibaka tše dintši tša go thabela dilo tše di kgahlišago. Eupša ga bjale, sebaka sa go thuša ba bangwe go phologa Haramagedone ke sa moswananoši mehleng ya rena.
13. Ka ge bjale re le Bakriste, re ka dula bjang re na le maikwelo a go akgofa ga nako?
13 Ka ge re tseba gore ba bantši lefaseng leo le re dikologilego ba robetše boroko bja moya ka baka la go se šetše, ke’ng seo se ka re thušago go phema go lahlegelwa ke maikwelo a go akgofa ga nako? Re ka gopola gore le rena ka nako e nngwe re be re robetše leswiswing ka tsela ya seswantšhetšo. Eupša re phafošitšwe, gomme Kriste o re edišeditše, go etša ge Paulo a ile a bolela seo. Ga bjale re na le tokelo ya go ba barwadi ba seetša. (Bala Baefeso 5:14.) Ka morago ga go bolela ka seo, Paulo o ngwadile gore: “Dulang le phakgametše gore kamoo le sepelago ka gona ga se bjalo ka batho ba ba sa hlalefago eupša ke bjalo ka ba bohlale, le diriše nako ya lena ka bohlale gobane mehla ke e mebe.” (Baef. 5:15, 16) Ge re dutše re phela mehleng ye e mebe, anke re ‘dirišeng nako ka bohlale’ ka go dira dilo tšeo di ka re thušago go dula re phafogile moyeng.
RE PHELA MEHLENG YA MATHATA
14-16. Ke’ng seo se dirago gore go bolela ka Mmušo e be mo go akgofilego kudu gona bjale go feta le ge e le neng pele?
14 Bodiredi bja Bokriste bo be bo dutše bo akgofile, eupša ga bjale bo akgofile go feta le ge e le neng pele. Go tloga ka 1914, pontšho yeo e nago le dikarolo tše mmalwa yeo e hlalositšwego Lentšung la Modimo e bile molaleng. (Mat. 24:3-51) Maphelo a batho a kotsing go feta le ge e le neng pele. Go sa šetšwe ditumelelano tša morago bjale, mebušo e megolo e sa dutše e na le dithuthupi tša nuclear tše e ka bago tše 2 000 tšeo di ka dirišwago motsotsong le ge e le ofe. Balaodi ba bega gore go na le didirišwa tše makgolo tša nuclear tšeo go thwego di timetše. Na batšhošetši ba na le tše dingwe tša didirišwa tšeo? Ditsebi tše dingwe di bolela gore batho ba ka fedišwa gabonolo ke ntwa yeo e ka thongwago ke batšhošetši. Lega go le bjalo, ntwa ga se yona feela e beilego bophelo bja batho kotsing.
15 Pego ya 2009 ya makasine wa The Lancet le University College London e bolela gore: “Go fetoga ga boemo bja leratadima ke kotsi e kgolo kudu ya tša maphelo lefaseng ka bophara lekgolong la bo-21 la nywaga. Ditlamorago tša go fetoga ga boemo bja leratadima ditabeng tša maphelo di tla kgoma batho ba bantši nywagasomeng e latelago gomme tša bea maphelo a batho ba dibilione kotsing e kgolo.” Mafelelo e ka ba go oketšega ga go phagama ga tekanyo ya lewatle, komelelo, mafula, mauba a malwetši, madimo a matla le go lwelwa ga dilo tšeo di fokotšegilego tšeo di tšweletšwago ke lefase. Ee, dintwa gotee le ditiragalo tša masetlapelo di beile maphelo a batho kotsing.
16 Batho ba bangwe ba ka nagana gore tšhošetšo ya ntwa ya nuclear e ka lebiša ditiragalong tšeo di tlago go phethagatša “pontšho” yeo Jesu a boletšego ka yona. Lega go le bjalo, batho ba bantši ga ba kwešiše seo se tlogago se bolelwa ke pontšho yeo. Pontšho ye e na le nywagasome e bonagala, e lego seo se bontšhago gore go ba gona ga Kriste ke ga kgonthe le gore bofelo bja tshepedišo ye ya dilo bo batamela ka lebelo. (Mat. 24:3) Le ka mohla ga se gwa ka gwa ba le nako yeo dika tša pontšho ye di bilego molaleng ka tsela ye. Ke nako ya gore batho ba phafoge borokong bja moya. Bodiredi bja rena bo ka ba thuša gore ba phafoge.
17, 18. (a) “Nako” yeo Paulo a boletšego ka yona e re kgoma bjang? (b) Ke’ng seo se ka šušumeletšago batho go fetoša pono ya bona ka molaetša wa Mmušo?
17 Go šetše nako e kopana gore re bontšhe gore re rata Jehofa le go fetša modiro wa boboledi woo re o abetšwego mehleng ye ya bofelo. Seo Paulo a se boditšego Bakriste ba lekgolong la pele la nywaga kua Roma se kwagala kudu lehono. O itše: “Le tseba gore nako ye e šetše e le iri ya gore le phafoge borokong, gobane bjale phološo ya rena e batametše go feta nakong ya ge re be re eba badumedi.”—Baroma 13:11.
18 Ditiragalo tšeo di boleletšwego pele mabapi le mehla ya bofelo di ka dira gore batho ba lemoge gore ba nyaka dilo tša moya. Ba bangwe ba ile ba lemoga gore batho ba nyaka thušo ge ba bona go palelwa ga mebušo ya batho tabeng ya go lebeletšana le go phuhlama ga maemo a boiphedišo, ditšhošetšo tša nuclear, bosenyi bjo sehlogo goba go senywa ga tikologo. Le gona, ditiragalo tša ka malapeng, tše bjalo ka malwetši, tlhalo goba go hwelwa ke motho yo a ratwago, di dirile gore ba bangwe ba lemoge gore ba nyaka dilo tša moya. Ge re dutše re tšea karolo bodireding, re ikemišetša go thuša batho ba bjalo.
GO TUTUETŠWA KE MAIKWELO A GO AKGOFA GA NAKO
19, 20. Maikwelo a go akgofa ga nako a ile a tutuetša Bakriste ba bantši go fetoša maphelo a bona bjang?
19 Maikwelo a go akgofa ga nako a tutueditše Bakriste ba bantši go oketša karolo ya bona bodireding. Ka mohlala, banyalani bao ba sa tšwago go nyalana ba kua Ecuador ba ile ba phetha ka go nolofatša bophelo bja bona ka morago ga go kwa lenaneo la kopano ya letšatši le le kgethegilego ya 2006, yeo e bego e na le sehlogo se se rego: “Boloka Leihlo la Gago le Lokile.” Ba ile ba dira lelokelelo la dilo tšeo ba bego ba sa di nyake, gomme pele ga ge dikgwedi tše tharo di fela ke ge ba tlogile ntlong yeo e nago le diphapoši tše tharo tša go robala gomme ba hudugetše lefelong leo le nago le phapoši e tee ya go robala, ba rekišitše tše dingwe tša dilo tša bona e bile ba se sa na le dikoloto. Go se go ye kae ba ile ba tsenela tirelo ya bobulamadibogo bja go thuša gomme ba diriša tšhišinyo ya molebeledi wa mosepedi ya gore ba hlankele phuthegong yeo go bego go nyakega bagoeledi ba oketšegilego ba Mmušo.
20 Ngwanabo rena yo mongwe wa Amerika Leboa o ngwala gore: “Ge nna le mosadi wa ka re be re le kopanong ka 2006, re be re šetše re na le nywaga e 30 re kolobeditšwe. Ge re be re le ka koloing re boela gae ka morago ga lenaneo, re ile ra boledišana kamoo re ka dirišago keletšo yeo e neilwego ya go nolofatša maphelo a rena. (Mat. 6:19-22) Re be re na le dintlo tše tharo, polasa, dikoloi tša mabaibai, seketswana le kharabane e kgolokgolo. Ka ge re be re ikwa gore re be re lebelega bjalo ka Bakriste ba mašilo, re ile ra phetha ka gore pakane ya rena e be go tsenela tirelo ya nako e tletšego. Ka 2008 re ile ra tlatša morwedi wa rena tirelong ya nako e tletšego. Ruri e bile tokelo e kgolo go šoma kgauswiuswi le bana babo rena! Re ile ra kgona go hlankela moo go bego go nyakega bagoeledi ba oketšegilego ba Mmušo. Le gona, phihlelo ya go hlankela Jehofa ka mo go oketšegilego e re thušitše go mmatamela kgauswi. Seo se putsago ka mo go kgethegilego ke tokelo ya go bona mahlo a batho a bulega ge ba ekwa le go kwešiša therešo ya Lentšu la Modimo.”
21. Ke tsebo efe yeo e re tutueletšago go tšea kgato?
21 Re a tseba gore kgauswinyane tshepedišo ye e kgopo ya dilo e tla welwa ke “letšatši la kahlolo le la tshenyego ya batho ba sa boifego Modimo.” (2 Pet. 3:7) Tsebo ya rena ka Lentšu la Modimo e re tutueletša go tsebatša ka phišego masetlapelo a magolo ao a tlago le lefase le lefsa leo le tlago go latela. Re tšwela pele re lemoga bohlokwa bjo bogolo bja go akgofela go tlišetša batho khutšo ya kgonthe. Ka go tšea karolo ka mo go feletšego modirong wo o akgofilego, re bontšha gore re rata Modimo le moagišani e le ka kgonthe.
[Dipotšišo tša Thuto]
