Na o a Gopola?
Na o a Gopola?
Na o badile ka kelohloko ditokollo tša morago bjale tša Morokami? Bona ge e ba o ka kgona go araba dipotšišo tše di latelago:
• Olivétan e be e le mang, gomme ke ka baka la’ng re swanetše go kgahlegela mošomo wa gagwe?
Pierre Robert wa Mofora o be a tsebja ka leina leo. Nakong ya Mpshafatšo lekgolong la bo-16 la nywaga, o ile a fetolela Beibele ka Sefora. O ile a kgetha go diriša lentšu “molebeledi” go ena le “mopišopo” gotee le lentšu “phuthego” go ena le “kereke.” Mafelong a mangwe, o ile a fetolela leina la Modimo la “Jehofa.”—9/1, matlakala 18-20.
• Modimo o be a e ra go re’ng ge a be a botša Balefi gore: “Nna ke kabelo ya lena”?
Moloko o mongwe le o mongwe wa Isiraele o ile wa abelwa bohwa bja naga, eupša “kabelo” ya Balefi e be e le Jehofa. (Num. 18:20) Ba be ba ka se hwetše bohwa bja naga, eupša ba ile ba ba le tokelo e kgethegilego ya tirelo. Go sa dutše go le bjalo, Jehofa o ile a ba hlokomela ka dinyakwa tša bona tša motheo. Lehono, bao ba nago le tokelo ya go tšwetša pele dikgahlego tša Mmušo ba ka kgodišega gore ba tla hwetša dinyakwa tša bona tša bophelo.—9/15, matlakala 7-8, 13.
• Re tseba bjang nako yeo Jerusalema ya bogologolo e wetšego diatleng tša Babilona?
Boradihistori ba bantši ba nea ditlhaloso tše di sa swanego mabapi le dikgoši tša Babilona le nako ya tšona ya go buša. Eupša diithuti di dumela gore Korese II o thopile Babilona ka 539 B.C.E., e lego nako e bohlokwa kudu. Bajuda ba ile ba lokollwa, gomme ba ile ba fihla nageng ya gabo bona ka ngwaga wa 537 B.C.E. Beibele e re ba bile bothopša ka nywaga e 70. Ka gona Jerusalema e swanetše go ba e wele ka 607 B.C.E. (2 Dikor. 36:21, 22; Jer. 29:10; Dan. 9:1, 2)—10/1, matlakala 26-31.
• Ke eng seo se ka thušago Mokriste go bona ge e ba mohuta o itšego wa boitapološo o hola goba o sa hole?
Ge motho a dira phetho ya ge e ba mohuta o itšego wa boitapološo o tla mo hola e bile ya ba o thabišago mahlong a Modimo, ke gabohlokwa gore a ipotšiše gore: Bo akaretša eng? Ke tla bo thabela neng? Ke tla bo thabela le bomang?—10/15, matlakala 9-12.
• Ke ka baka la’ng e tla ba phošo gore motho a ntšhe mpa?
Modimo o lebelela bophelo e le bjo bokgethwa e bile o lebelela gaešita le ngwana yo a sa thomago go bopega e le motho yo a ikemetšego yo a phelago. (Ps. 139:16) Go bolaya ngwana yo a sego a tšwa a belegwa ke sebe, go etša ge go bontšhitšwe ka tlase ga Molao wa Moshe gore motho o be a ka bewa molato ge a ka gobatša ngwana yo a sego a tšwa a belegwa. (Ek. 21:22, 23)—11/1, letlakala 6.
• Pego ya Diema 7:6-23 e ka re thuša bjang go phema go bogela diswantšho tšeo di kgothaletšago bootswa?
Karolo yeo e re botša ka lesogana leo le bego le sepela lefelong leo go bego go tsebja gore go dula mosadi yo a gobogilego. Mosadi yoo o ile a le goketša. Lehono, re dira gabotse ka gore re pheme mekero ya Inthanete yeo e nago le diswantšho tšeo di tsošago dikganyogo, le gona ke gabohlokwa go kgopela Modimo ka thapelo gore a re thuše gaešita le pele ga ge re ka kopana le diswantšho tše bjalo Inthaneteng.—11/15, matlakala 9-10.
• Re tseba bjang gore lefase le tla phologa ngwaga wa 2012?
Ka baka la medikologo yeo e hwetšwago almanakeng ya bogologolo ya Maya, ba bangwe ba nagana gore lefase le tla fela ka ngwaga wa 2012. Eupša seo se ka se kgonege, ka gobane Jehofa o bopetše lefase gore le dulwe ke batho. Beibele e bolela gore lefase le tla ba gona ka mo go sa felego. (Mmo. 1:4; Jes. 45:18)—12/1, letlakala 10.
• Ke bangwadi bafe ba Beibele bao ba bego ba le gona ka Pentekoste ya 33 C.E.?
Go bonagala eka go be go na le bangwadi ba tshelelago ba Mangwalo a Bakriste a Segerika. Baapostola ba bararo ba be ba le moo—Mateo, Johane le Petro. Bana ba babedi babo Jesu ka motswadi o tee ba be ba le gona—Jakobo le Juda. Le gona go bonagala Mareka wa lesogana le yena a be a le gona.—12/1, letlakala 22.
