Dipotšišo tše Tšwago go Babadi

Ka ge ka molao puno e be e thoma ge batho ba batona ka moka ba Isiraele ba le Monyanyeng wa Dinkgwa tše di sa Omelwago, ke mang yo a bego a buna dithakangwaga tša garase tšeo di bego di tlišwa sekgethweng?

Molao wa Moše o laetše Baisiraele gore: “Ka moka ba e lexo banna mo xo lena ba bônalê pele xa Morêna xa-raro ka ngwaxa felô moo a tl’o xo xo kxêtha xôna; ba tlê ka monyanya wa maxôbê a sa omêlwaxo, le ka monyanya wa dibeke, le ka monyanya wa mešaša.” (Doiteronomio 16:16) Go tloga mehleng ya Kgoši Salomo go ya pele, lefelo leo Modimo a ilego a le kgetha e be e le tempele ya Jerusalema.

Monyanya wa pele wa menyanya e meraro o be o swarwa mathomong a seruthwane. O bitšwa Monyanya wa Dinkgwa tše di sa Omelwago, o be o thoma letšatši ka morago ga monyanya wa Paseka wo o bilego gona ka Nisani 14 gomme o be o tšwela pele matšatši a šupa go fihla ka Nisani 21. Letšatši la bobedi la monyanya, Nisani 16, le be le swaya go thoma ga puno ya ngwaga go ya ka tšhupamabaka e kgethwa. Ka letšatši leo, moperisita yo a phagamego o be a swanetše go tšea “ngata ya thakangwaxa” ya garase yeo e bunwago gomme a e “ekara pele xa Morêna,” lefelong le lekgethwa. (Lefitiko 23:5-12) Ka ge batho ba batona ka moka ba be ba swanetše go ba gona Monyanyeng wa Dinkgwa tše di sa Omelwago, go be go buna mang?

Taelo ya gore Jehofa a tlišetšwe dithakangwaga tša puno nakong ya Monyanya wa Dinkgwa tše di sa Omelwago e be e neilwe setšhaba ka moka. Ga go na motho yo a bego a dumeletšwe go thoma go buna le go itlišetša dithakangwaga sekgethweng. Go e na le moo, setšhaba se be se laetšwe gore baemedi ba sona ba dire bjalo. Ka baka leo, go kga ngata ya garase bakeng sa Monyanya wa Dinkgwa tše di sa Omelwago go be go tla dirwa ke baemedi bao ba bego ba romelwa mašemong a kgaufsi a garase. Ge e bolela ka taba ye, Encyclopaedia Judaica e re: “Ge garase e be e budule e be e tlišwa e e-tšwa motseng wa Jerusalema; go sego bjalo e be e ka tlišwa e e-tšwa kae goba kae Isiraeleng. E be e bunwa ke banna ba bararo, yo mongwe le yo mongwe o be a swara sekele le seroto sa gagwe.” Ke moka ngata ya garase e be e tlišwa go moperisita yo a phagamego, yo a bego a e neela Jehofa.

Taelo ya gore go neelwe ka dithakangwaga tša puno e be e nea Baisiraele sebaka se sebotse kudu sa go bontšha go leboga ga bona tšhegofatšo yeo Modimo a e tlišitšego nageng ya bona le punong ya bona. (Doiteronomio 8:6-10) Lega go le bjalo, se bohlokwa kudu ke gore sehlabelo seo se bego se neelwa monyanyeng e be e le “moriti wa dilo tše dibotse tše di tlago go tla.” (Baheberu 10:1) Jesu Kriste le yena o ile a tsošwa ka Nisani 16 ya 33 C.E., e lego letšatši leo dithakangwaga tša puno di bego di neelwa Jehofa. Moapostola Paulo o ngwadile mabapi le Jesu gore: “Kriste o tsošitšwe bahung, yena thakangwaga ya bao ba robetšego lehung. . . . Eupša yo mongwe le yo mongwe boemong bja gagwe: thakangwaga ke Kriste, ka morago ga moo ya ba bao e lego ba Kriste nakong ya go ba gona ga gagwe.” (1 Bakorinthe 15:20-23) Ngata ya dithakangwaga yeo moperisita yo a phagamego a bego a e ekara pele ga Jehofa e be e swantšhetša Jesu Kriste yo a tsošitšwego—wa mathomo-thomo wa go tsošetšwa bophelong bjo bo sa felego. Ka go rialo Jesu o ile a bula tsela ya go lokolla batho sebeng le lehung.

[Mothopo wa Seswantšho go letlakala 26]

© 2003 BiblePlaces.com