Bohloko bjo bo Tseneletšego le bjo bo Tšeago Nako e Telele

MONYAKIŠIŠI yo mongwe o be a nyaka go tseba kamoo batho bao ba hwetšwego ke baratiwa ba bona ba kgomegago ka gona maikwelong ge nako e dutše e feta. O ile a romela letlakala la dipotšišo go batswadi ba mmalwa bao bana ba bona ba hwilego nywageng e mmalwa pele ga moo. Ga se batswadi ka moka bao ba ilego ba mo araba. Tate yo a bitšwago Vladimir, yoo morwa wa gagwe a hwilego nywaga e mehlano pejana, o hlalositše gore o sa dutše a thatafalelwa kudu ke go bolela ka morwa wa gagwe. *

Manyami a bjalo ao a tšeago nako e telele ke selo seo se tlwaelegilego go batswadi bao ba hwetšwego. Morwa wa William wa nywaga e 18 o ile a kgangwa ke meetse nywaga e lesome e fetilego. William o ngwala gore, “Ke sa dutše ke e-kwa bohloko bja go lahlegelwa, le gona ke tla bo kwa go fihlela ke e-hwa.” Nywaga e mehlano ka morago ga ge morwa wa gagwe a bolailwe ke bolwetši go se gwa letelwa, Lucy o ngwadile gore: “Matšatšing a mmalwa a mathomo, ke be ke dula ke ipotša gore, ‘Ga go bjalo.’ Ke be ke ikwa eka ke a lora le gore ke kgaufsi le go phafoga borokong. Ka morago ga nako ke ile ka thoma go lemoga gore e be e le therešo, a ka se ke a boa ka gae. Morwa wa-ka o hwile nywaga e mehlano e fetilego, eupša ka dinako tše dingwe ge ke nnoši ke sa mo llela.”

Ke ka baka la’ng batswadi bao ba hwetšwego, ba bjalo ka Vladimir, William le Lucy, ba e-kwa bohloko bjo bo tseneletšego le bjo bo tšeago nako e telele ka tsela ye? A re hlahlobe a mangwe a mabaka.

Ke ka Baka La’ng go E-na le Manyami a Mantši Gakaakaa?

Ge ngwana a belegwa ka lapeng, batswadi ba ba le maikwelo a tseneletšego ka yena go feta ao a lego gona tswalanong le ge e le efe ya batho. Go fo kuka leseanyana la bona, go le bona le robetše goba go le bona ge le myemyela go ba tlišetša lethabo le legolo gotee le kgotsofalo. Batswadi ba lerato ba rata bana ba bona. Ba ba ruta go itshwara gabotse le go ba botho. (1 Bathesalonika 2:7, 11) Batswadi ba a thaba ge bana ba arabela thutong ya bona ge ba dutše ba gola, e bile ba thoma go ba le dikholofelo tše dikgolo ka bona.

Batswadi ba lerato ba šoma ka thata bakeng sa go hlokomela bana ba bona. Ka mehla ba ka beela tšhelete goba dilo tše di bonagalago ka thoko gore ba tle ba kgone go thuša bana ba bona go thoma malapa nakong e tlago. (2 Bakorinthe 12:14) Modiro wo o mogolo woo o akaretšago maikwelo, nako, boiteko le tšhelete o šupa selong setee—batswadi ba godiša bana ba  bona gore ba phele, e sego gore ba hwe. Ge ngwana e-hwa, batswadi ga se ba fetša go mo godiša gomme dikholofelo tšeo batswadi ba bego ba e-na le tšona ka yena di a hwelela. Lerato gotee le tswalano e borutho tšeo di elelago go tloga go batswadi go ya go ngwana di thibelwa ke lepheko leo go bonalago le ka se ke la tlošwa, lehu. Sekgoba sa morwa goba morwedi wa bona ka dipelong tša bona ga bjale ga se na selo. Batswadi ba ba le manyami a magolo ao go sego bonolo go a tloša.

Beibele e bontšha gore batswadi bao ba hwetšwego ba kgotlelela bohloko bjo bo tseneletšego le bjoo bo tšeago nako e telele. Ge Beibele e hlalosa seo se diregilego ge mopatriareka Jakobo a be a e-kwa gore morwa wa gagwe Josefa o bolailwe, e re: “Jakobo a xaxoxanya diaparo tša xaxwe, a tšwara lenkxeretla, a fetša matšatši a mantši à llêla morwa wa xaxwe. Barwa ba xaxwe ka moka le barwedi ba xaxwe ka moka ba leka xo mo homotša; yêna a xana xo homotšwa a re: Aowa, ke tlo foloxêla kwa bo-dula-bahu [goba lebitleng] xo morwa wa-ka kè lla!” Nywaga ka morago, Jakobo o be a sa dutše a llela morwa wa gagwe yoo a bego a dumela gore o hwile. (Genesi 37:34, 35; 42:36-38) Pego e nngwe ya Beibele e akaretša mosadi wa mmotegi yo a bitšwago Naomi, yoo a ilego a hwelwa ke barwa ba babedi. A nyamišitšwe ke seo, o ile a nyaka go fetola leina la gagwe gore e se sa ba Naomi, yeo e bolelago “Go thaba ga-ka,” eupša e be Mara, yeo e bolelago “Kgalako.”—Ruthe 1:3-5, 20, 21.

Lega go le bjalo, Beibele ga e bolele feela ka bohloko bjoo batswadi ba bo kwago. E bontšha le kamoo Jehofa a matlafatšago bao ba hwetšwego. Sehlogong se se latelago, re tla ahla-ahla tše dingwe tša ditsela tšeo Modimo a di dirišago go homotša bao ba llago.

[Mongwalo wa ka tlase]