Bafsa—Le Kgoma Dipelo tša Batswadi ba Lena

MOAPOSTOLA yo a tšofetšego, Johane, o ngwadile gore: “Ga ke na lebaka le legolo la go leboga go feta dilo tše, gore ke kwe gore bana ba-ka ba tšwela pele ba sepela therešong.” (3 Johane 4) Gaešita le ge bana bao go bolelwago ka bona mo temaneng ye ya Beibele e le barutiwa ba Bakriste, motswadi yo a boifago Modimo o kwešiša gabotse maikwelo ao a boletšwego ke Johane. Go fo swana le ge batswadi ba dira phapano e kgolo maphelong a bana ba bona, le bana ba dira phapano e kgolo maphelong a batswadi ba bona.

Kgoši Salomo wa Isiraele o boletše kamoo bana ba ka kgomago batswadi ba bona ka mo go tseneletšego. O ngwadile gore: “Ngwana yo bohlale ó kxahla tat’axwe; ’me ngwana wa lešilo ó nyamiša mm’axwe.” (Diema 10:1) Ka baka leo, bana ka moka—gaešita le bao ba godilego—ba swanetše go ela hloko mafelelo ao ditiro tša bona di tla bago le ona go bo-tatago bona le bo-mmago bona. Ke ka baka la’ng se e le se se swanetšego?

Nagana feela ka tlhokomelo ka moka yeo batswadi ba gago bao ba boifago Modimo ba go filego yona ge ba be ba go godiša! Go tshwenyega ga bona ka wena le go go rapelela go thomile kgale pele ga ge o ka belegwa. Ka morago ga ge o belegwe, batswadi ba gago ba ile ba thabela go ba le tswalano ya kgaufsi kudu le wena gomme mohlomongwe ba ile ba leboga Modimo bakeng sa tokelo e botse—eupša e le e kgolo—le boikarabelo bja go ba batswadi. Motho yo monyenyane le yo a hlokago thušo ga bjale o be a hlokomelwa ke bona, gomme ka ge e le barapedi ba Jehofa, ba ile ba tšeela se godimo kudu.

Ka ge batswadi ba gago e le Bakriste ba therešo, ba ile ba tsoma tlhahlo e ka botwago ka Beibeleng le dipukung tše di theilwego Beibeleng, e bile ba kgopetše keletšo go bao ba godišitšego bana. Le gona ba ile ba tšwela pele ba rapela Modimo ba mmotša dilo tšeo di ba tshwenyago. (Baahlodi 13:8) Ge o dutše o gola, batswadi ba gago ba ile ba tseba mo o nago le bokgoni gona eupša gape ba be ba bona le mafokodi a gago. (Jobo 1:5) Ditlhohlo tše dingwe di ile tša tšwelela ge o be o le mahlalagading. Ka dinako tše dingwe, o ka ba o ile wa itshwara bjalo ka lerabele, gomme batswadi ba gago ba be ba rapela kudu, ba bala kudu le go nagana kudu mabapi le kamoo ba ka go thušago go tšwela pele o rapela Tatago wa legodimong, Jehofa.

Tatago le mmago e tla dula e le batswadi ba gago. Go tshwenyega ga bona ka go phela ga gago gabotse mmeleng, monaganong, maikwelong le moyeng go tšwela pele gaešita le ge o šetše o gotše.  Lega go le bjalo, nakong yeo ka moka, batswadi ba a gopola gore o motho yo a nago le tshwanelo ya go ikgethela le gore ga go na kgonthišetšo ya gore o tla phela bophelo bja mohuta mang. Mafelelong, ke wena o tla dirago phetho ya gore o latela tsela efe.

Ka gona, na e ka se be mo go kwagalago go bolela gore ge e-ba batswadi ba se “na lebaka le legolo la go leboga” go feta go kwa gore bana ba bona “ba tšwela pele ba sepela therešong,” go molaleng gore ba ka se thabe ge bana ba bona ba dira se se fapanego? Ka kgonthe, bana bao ba itshwarago ga bošilo ba nyamiša batswadi ba bona. Salomo o itše: “Ngwana wa setlatla, mo-nyamiša-tat’axwe, motswadi wa xaxwe ó babya ke pelo.” (Diema 17:25) Ruri batswadi ba ba manyaming a magolo ge ngwana a kgaotša go rapela Modimo wa therešo!

Go molaleng gore le tutuetša malapa a bo lena kudu le go feta. Boitshwaro bja lena bo kgoma dipelo tša batswadi ba lena kudu. Ge le tlogela Modimo le melao ya gagwe ya motheo, batswadi ba lena ba tla kwa bohloko. Lega go le bjalo, boemo e ka ba bjo bo fapanego ge le dira dilo ka tsela e fapanego. Ge le dula le botegela Jehofa le go mo kwa, batswadi ba lena ba tla thaba. Ikemišetšeng go thabiša dipelo tša batswadi ba lena! Ke mpho efe e bohlokwa yeo o ka tsogago o e neile bao ba go godišago, ba go šireletšago le go go rata?