Monna le Mosadi—Ba Bopetšwe go ba Gotee

KA MEHLA monna le mosadi ba be ba kganyoga go ba gotee. Kganyogo ye e thomilwe ke Modimo. Jehofa o ile a bona go se botse ge monna wa pele Adama, a phela a nnoši. Ka gona, Modimo o ile a mo direla “modiriši e a mo lebanexo.”

Jehofa o ile a dira gore Adama a robale boroko bjo bogolo, ke moka a ntšha legopo la gagwe gomme “ka lôna lexopô leo . . . Modimo ó dirile mosadi, a mo tliša xó motho.” Adama o ile a thabišwa kudu ke go bona sebopiwa se se sebotse sa Jehofa, moo a ilego a bolela gore: “Byalo xomme šó, e lexo lešapô la mašapô a-ka, le nama ya nama ya-ka.” Ka dika tša gagwe tša bosadi, mosadi yo a phethagetšego Efa, o be a ratega e le ka kgonthe. Le Adama yo a phethagetšego, ka seriti sa gagwe sa bonna o be a swanelwa ke tlhompho. Ba be ba bopetšwe go ba gotee. Beibele e re: “Ka baka leo monna ó tlo tloxêla tata’xwê le mma’xwê, a xomarêla mosadi wa xaxwe; xomme ba tlo ba nama e tee.”—Genesi 2:18-24.

Lega go le bjalo, lehono malapa a mantši a a arogana, gomme tswalano ya monna le mosadi gantši e laolwa ke kgobošo goba boithati. Moya wa phadišano magareng ga banna le basadi o okeditše diphapano le dikarogano. Dilo tše ka moka di fapana le morero wa Modimo ka banna le basadi. Monna o be a bopetšwe go phetha boikarabelo bjo bo kgahlišago lefaseng. Mosadi o be a tla phetha karolo ya moswana-noši le e bohlokwa, ya go thuša monna wa gagwe. Ba be ba swanetše go šoma gotee ka kwano. Go tloga mathomong a go ba gona ga batho, banna le basadi ba boifago Modimo ba lekile ka potego go phetha boikarabelo bja bona bjoo Jehofa a ba neilego bjona gomme se se ile sa tlaleletša lethabong le kgotsofalong tša bona. Boikarabelo bjoo ke bofe, gomme re ka bo phetha bjang?

[Seswantšho go letlakala 3]

Monna le mosadi ba bopetšwe go phetha boikarabelo bjo bo hlomphegago thulaganyong ya Modimo