Go Aga re le Batee Bakeng sa go Tumiša Modimo

GO SE sengwe sa Dihlakahlaka tša Solomon, batho ba be ba ela hloko Holo e mpsha ya Mmušo ya Dihlatse tša Jehofa. Mosadi yo mongwe o itše: “Kerekeng ya rena, re na le dikoleke tše dintši. Re kgopela ditho tša kereke ya rena gore di neele, eupša re sa dutše re se na tšhelete e lekanego ya go aga kereke e mpsha. Lena Dihlatse le hwetša tšhelete bjang?” Hlatse yeo mosadi yo a bego a boledišana le yona e arabile ka gore: “Re rapela Jehofa re le lapa la lefaseng ka bophara. Phuthego ya gabo rena le bana babo rena lefaseng ka moka ba ile ba neela ka seo se bego se nyakega bakeng sa go aga Holo ya Mmušo ye e mpsha. Jehofa o re rutile gore re be batee dilong ka moka.”

Botee bja Dihlatse tša Jehofa bo bonagala medirong ya tšona ka moka, go akaretša le wa go aga Diholo tša Mmušo tše dikete. Botee bjo di dirago mediro ye ka bjona ga bo thome lehono. Bo bile gona gare ga batho ba Jehofa ka nywaga-kete e mentši. Ke ka baka la’ng re rialo?

Go Aga Tabarenakele le Tempele

Nywageng e fetago 3 500 e fetilego, Jehofa o be a naganne ka setšhaba sa Isiraele ge a be a botša Moše gore: “Ba tlo nkaxêla Ntlo-kxêthwa.” (Ekisodo 25:8) Mabapi le tsela yeo modiro wo wa go aga o swanetšego go dirwa ka yona, Jehofa o tšwetše pele ka gore: “Ke tlo Xo bonthša tšohle ka xo swanthšetša moaxô, ka Xo swanthšetša dithoto ka moka tša wôna, la tlo kxôna xo dira ka mokxwa woo.” (Ekisodo 25:9) Jehofa o ile a lokeletša dipolane tša moago, dithoto le dilo tše dingwe. (Ekisodo 25:10–27:19) “Moaxô” wo, goba tente, e be e tla ba lefelo la borapedi bja therešo Isiraeleng ka moka.

Ga re tsebe gore ke batho ba bakae bao ba bego ba aga, eupša Baisiraele ka moka ba be ba laleditšwe go o thekga. Moše o ba boditše gore: “Nthšetšang Morêna mothšêlô wa dilô, tša lena. Mang le mang a tlišê mothšêlô wa Morêna ka mo pelo ya xaxwe e ithapaxo ka xôna.” (Ekisodo 35:4-9) Baisiraele ba ile ba arabela bjang? Ekisodo 36:3 e re: “Bôná-bao Mošê ó ba xafetše dilô ka moka tše Ba-Isiraele ba di thšetšexo, xore e bê tša xo dira medirô ya sekxêthwa. Xomme batho ba be ba fêla ba sa tliša dineô ka xo ithapa.”

Go se go ye kae, go be go e-na le mokgobo o montši wa dilo, gomme batho ba be ba tšwela pele ba tliša tše di oketšegilego. Mafelelong, ditsebi tša modiro wo tšeo di bego di šoma di ile tša botša Moše gore: “Sethšaba se tliša xo fetiša tše di lekanexo modirô o laetšwexo ke Morêna.” Ke moka Moše o ile a tsebatša gore: “Xo se kê xwa hlwa xò e-ba le monna le xe e le mosadi e a  diraxo se se tl’o xo ba mothšelô wa sekxêthwa.” Mafelelo e bile afe? “Xo be xo kxobilwe tša xo phêtha medirô ka moka, le tše di tl’o xo ba tša šala.”—Ekisodo 36:4-7.

Ka baka la go nea ga Baisiraele ka seatla se se bulegilego, tabarenakele e ile ya fetšwa ka ngwaga o tee. (Ekisodo 19:1; 40:1, 2) Ka go thekga borapedi bja therešo, batho ba Jehofa ba be ba Mo godiša. (Diema 3:9) Ka morago, ba be ba tla thoma modiro o mogolo kudu wa go aga. Go oketša moo, bohle bao ba bego ba rata ba be ba ka tšea karolo, go sa šetšwe gore ba kgona go aga goba go se bjalo. Ka nywaga-kgolo e ka bago e mehlano ka morago ga go agwa ga tabarenakele, Baisiraele ba ile ba thoma go aga tempele kua Jerusalema. (1 Dikxoši 6:1) Wo e be e tla ba moago o mobotse kudu o swarelelago wo o agilwego ka mafsika le dikota. (1 Dikxoši 5:17, 18) Jehofa o ile a nea Dafida dipolane tša go aga tempele “ka pudulelo.” (1 Koronika 28:11-19, NW) Eupša o ile a kgetha morwa wa Dafida e lego Salomo gore a etelele pele modiro wa go aga. (1 Koronika 22:6-10) Dafida o thekgile modiro wo ka pelo ka moka. O ile a reka mafsika, dikota le dilo tše dingwe gomme a neela ka gauta le silifera tša gagwe ka tekanyo e kgolo. Le gona o ile a kgothaletša Baisiraele-gotee le yena gore ba nee ka seatla se se bulegilego, ka go ba botšiša gore: “Xomme byale ké mang e a ithapaxo a nthšetša Morêna ka seatla sa xaxwe lehono?” Batho ba ile ba arabela bjang?—1 Koronika 29:1-5.

Nakong ya ge Salomo a be a thoma go aga tempele, o be a e-na le ditoni tše dikete tša gauta le silifera. Go be go e-na le koporo le tšhipi e ntši kudu mo e lego gore ba be ba sa kgone go di kala. (1 Koronika 22:14-16) Ka thekgo ya Jehofa le ya Baisiraele ka moka, modiro o ile wa fetšwa ka nywaga e šupa le seripa feela.—1 Dikxoši 6:1, 37, 38.

“Ngwakô wa Modimo”

Tabarenakele le tempele di be di bitšwa “Ngwakô wa Modimo.” (Baahlodi 18:31; 2 Koronika 24:7) Le ka mohla Jehofa ga se a ka a nyaka go dula ka ngwakong. (Jesaya 66:1) O dirile gore meago yeo e be gona bakeng sa go hola batho. Ka kgonthe, nakong ya ge go kgakolwa tempele, Salomo o botšišitše gore: “Afa Modimo a ka kxôna xo tla a dula ruri mono lefaseng? Hleng maxodimo, le maxodimo a xodimodimo  à sa kxone xo Xo lekana! Byale Ngwakô wó ke o axilexo o tlo Xo lekana bya’ng?”—1 Dikxoši 8:27.

Jehofa o boletše ka moporofeta wa gagwe Jesaya gore: “Ntlo ya-ka e tlo ba lé: Ngwakô wa thapêlô wa dithšaba tšohle.” (Jesaya 56:7) Dihlabelo le dithapelo tšeo di bego di dirwa tempeleng, gotee le ditirelo tšeo di bego di swarelwa moo, di be di dumelela batho bao ba boifago Modimo—Bajuda le bao e sego Bajuda—go batamela kgaufsi le Modimo wa therešo. Ba be ba e-ba bagwera ba Jehofa gomme a ba šireletše ge ba mo rapela ntlong ya gagwe. Thapelo yeo Salomo a e dirilego nakong ya ge go kgakolwa tempele e gatelela therešo ye. O ka bala ka dipolelo tše tše di kgomago pelo tše di yago go Modimo go 1 Dikxoši 8:22-53 le 2 Koronika 6:12-42.

Ke kgale ntlo ya bogologolo ya Modimo wa therešo e sentšwe, eupša Lentšu la Modimo le boletše ka nako yeo ka yona batho ba ditšhaba ka moka ba bego ba tla bokana e le gore ba rapele Jehofa tempeleng e kgolo kudu ya moya. (Jesaya 2:2) Sehlabelo se nnoši se se phethagetšego sa Morwa wa Modimo yo a tswetšwego a nnoši, seo pele se bego se swantšhetšwa ke dihlabelo tša diphoofolo tšeo di bego di neelwa tempeleng, e be e tla ba tsela ya go batamela Jehofa. (Johane 14:6; Baheberu 7:27; 9:12) Dihlatse tša Jehofa ga bjale di rapela Modimo ka tsela yeo e di phalago tšohle, gomme di thuša ba bangwe go dira ka mo go swanago.

Mediro ya go Aga ya Mehleng Yeno

Lefaseng ka moka, Dihlatse tša Jehofa di hlankela Modimo wa therešo. Di bopa “’thšaba se matla,” seo se tšwelago pele se oketšega ka palo. (Jesaya 60:22) Lefelo la bohlokwa leo Dihlatse tša Jehofa di kopanago go lona ke Holo ya Mmušo. * Meago ye e dikete e a dirišwa, gomme go sa dutše go nyakega e mengwe e dikete.

Dihlatse tša Jehofa ‘di ithapela’ go aga Diholo tša Mmušo tše di nyakegago. (Psalme 110:3) Lega go le bjalo, gantši Dihlatse tša lefelong le itšego ga di be le bokgoni bja go aga, gomme dikarolong tše dingwe mo go nago le koketšego e kgolo kudu go diilwa kudu. Ka 1999 Sehlopha se Bušago sa Dihlatse tša Jehofa se ile sa hloma lenaneo la go aga Diholo tša Mmušo bakeng sa go thuša go fenya mapheko ao. Ka lenaneo le, Dihlatse tše di nago le bokgoni bja go aga di tšere maeto a go ya mafelong a kgole bakeng sa go ruta bana babo tšona le dikgaetšedi go aga Diholo tša Mmušo. Ke moka bašomi ba bao ba tlwaeditšwego ba ile ba tšwela pele ka modiro wa go aga tikologong yeo ya bona. Mafelelo a maiteko a a kgethegilego e bile afe?

Ka February 2006, Dihlatse tša Jehofa dinageng tšeo di diilago di be di šetše di agile Diholo tše difsa tša Mmušo tše di fetago 13 000. Bala mantšu ao a boletšwego ke ba bangwe bao ba dirišago Diholo tše tše difsa tša Mmušo.

“Phuthego e be e e-ba le palo-gare ya bao ba bago gona dibokeng ba 160. Sebokeng sa mathomo ka morago ga go agwa ga Holo e mpsha ya Mmušo, palo ya bao ba bilego gona e ile ya fihla go 200. Ga bjale, dikgweding tše tshela ka morago, ba ba le palo ya bao ba bago gona dibokeng ba 230. Tšhegofatšo ya Jehofa e a bonala tabeng ya go agwa ga meago ye e mebotse le e šomišegago gabotse.”—Molebeledi wa tikologo kua Ecuador.

“Batho ba re botšišitše ka nywaga e mentši gore, ‘Le tla aga neng Holo ya Mmušo e swanago le tšeo re di bonago dikgatišong tša lena?’ Mafelelong, ka thušo ya Jehofa, re na le lefelo le  lebotse la borapedi. Re be re swarela diboka lebenkeleng la ngwanabo rena, re e-ba le palo-gare ya bao ba bago gona ba 30. Sebokeng sa mathomo Holong e mpsha ya Mmušo, batho ba 110 ba bile gona.”—Phuthego ya kua Uganda.

“Dikgaetšedi tše pedi tšeo e lego babulamadibogo di bega gore go thabiša kudu go ya tšhemong ga e sa le go tloga mola Holo ya Mmušo e agwago. Batho ba ikemišeditše kudu go theetša bodireding bja ntlo le ntlo gaešita le modirong wo o sa rulaganyetšwago. Ga bjale dikgaetšedi tše di swara dithuto tša Beibele tše 17, gomme bontši bja barutwana ba ba Beibele ba ba gona dibokeng.”—Ofisi ya lekala ya Solomon Islands.

“Moruti yo a dulago kgaufsi le Holo e mpsha ya Mmušo o bolela gore e godiša seriti lefelong leo le gore batho ba ikgantšha ka yona. Bontši bja bao ba fetago moo ba bolela ka bobotse bja holo ye. Se se nea bana babo rena dibaka tše dibotse tša go nea bohlatse. Batho ba oketšegilego ba nyaka go tseba ka borwarre bja rena bja lefase ka bophara. Bontši bja bao ba sa kago ba ya dibokeng ka nywaga e mentši ba ile ba tutueletšega go thomološa go kopanela ka mehla.”—Ofisi ya lekala ya Myanmar.

“Kgaetšedi e nngwe e kile ya laletša monna yo a thabelago gore a tle a bone ge go dutše go agwa lefelong la kgaufsi le moo a dulago gona. Monna yoo o ile a bolela ka morago gore: ‘Ke be ke nagana gore bašomi bao ba ka se ntumelele go tsena. Se se ilego sa mmakatša e bile ge Dihlatse di ntumediša ka botho. Banna le basadi ba be ba šoma ka thata, ba sa senye nako. Go be go e-na le tirišano le moya wa lethabo.’ Monna yoo o ile a amogela thuto ya Beibele gomme a thoma go ba gona dibokeng. O boletše ka morago gore: ‘Ke fetošitše kgopolo. Ka ge ke hweditše  Modimo, nka se ke ka mo tlogela.’”—Ofisi ya lekala ya Colombia.

Thekgo ya Rena e Bohlokwa

Go aga Diholo tša Mmušo ke karolo ya bohlokwa ya tirelo ya rena e kgethwa. Tsela yeo ka yona Dihlatse tša Jehofa lefaseng ka bophara di thekgilego modiro woo—ka ditšhelete le ka ditsela tše dingwe—e a retwa e le ruri. Lega go le bjalo, re swanetše go gopola gore dibopego tše dingwe tša tirelo e kgethwa le tšona di bohlokwa. Nako le nako, Bakriste ba hlaselwa ke dikotsi tša tlhago gomme ba nyaka thušo ya rena. Go tšweletšwa ga dipuku tše di theilwego Beibeleng go bapala karolo e kgolo tabeng ya go thekga tirelo e kgethwa. Bontši bja rena re ile ra lemoga matla a makasine goba puku e theilwego Beibeleng ge e sepedišetšwa motho yo a nago le pelo e botse. Go oketša moo, thekgo ya baromiwa le ba bangwe tirelong e kgethegilego ya nako e tletšego e bohlokwa kudu. Bakriste ba bjalo bao ba ikgafago ba bapala karolo e kgolo tabeng ya go katološa modiro wa boboledi mehleng ye ya bofelo.

Bao ba ilego ba thuša tabeng ya go aga tempele ba ile ba thaba kudu. (1 Koronika 29:9) Go thekga borapedi bja therešo ka meneelo ya rena go a re thabiša ka tsela e swanago lehono. (Ditiro 20:35) Re thaba ka tsela e bjalo ge re tsenya meneelo ya rena ka lepokising leo le beetšwego bakeng sa Sekhwama sa Diholo tša Mmušo le ge re neela modirong wa lefase ka bophara, gomme ka go rialo re thekga mediro e mengwe yeo e tswalanago le go bolelwa ga ditaba tše dibotse tša Mmušo. Dihlatse tša Jehofa lehono di boteeng borapeding bja therešo ka tsela e botse. Eka ka moka ga rena re ka tlala lethabo leo le tlišwago ke go thekga borapedi bjoo!

[Mongwalo wa ka tlase]

[Seswantšho go letlakala 18]

Maiteko a rena a kopantšwego a dira gore go kgonege go aga Diholo tše dibotse tša Mmušo lefaseng ka bophara

[Seswantšho go letlakala 18]

Holo e mpsha ya Mmušo kua Ghana

[Lepokisi go letlakala 20, 21]

Ditsela Tšeo Ka Tšona Ba Bangwe Ba Kgethago Go Nea

MENEELO BAKENG SA MODIRO WA LEFASE KA BOPHARA

Ba bantši ba beela ka thoko tekanyo ya tšhelete yeo ba e tsenyago ka mapokising ao a ngwadilwego “Meneelo Bakeng sa Modiro wa Lefase ka Bophara—Mateo 24:14.”

Kgweding e nngwe le e nngwe, diphuthego di romela ditšhelete tše ofising ya Dihlatse tša Jehofa yeo e hlankelago naga ya gabo tšona. Meneelo ya boithatelo ya ditšhelete le yona e ka romelwa ka go lebanya go Watch Tower Bible and Tract Society of Pennsylvania, Attention: Accounting Office, Private Bag X2067, Krugersdorp, 1740, South Africa, goba ofising ya lekala yeo e hlankelago naga ya geno. Ditšheke tšeo di romelwago atereseng yeo e lego ka mo godimo di swanetše go dirwa gore di lefelelwe go “Watch Tower.” Mabenyabje le dilo tše dingwe tše bohlokwa le tšona di ka neelwa. Lengwalo le lekopana leo le bolelago gore selo se se bjalo ke mpho e neelwago ka go lebanya le swanetše go sepela le meneelo ye.

GO NEA MO GO RULAGANYEDITŠWEGO

Go tlaleletša go dimpho tša ditšhelete tše di newago ka go lebanya, go na le mekgwa e mengwe ya go nea bakeng sa go hola tirelo ya Mmušo ya lefase ka bophara. Ye e akaretša:

Phemelo (Inšuranse): Mokgatlo wa Watch Tower o ka ngwadišwa e le moja-bohwa wa thulaganyo ya tša phemelo ya bophelo goba thulaganyo ya go rola modiro/phenšene.

Di-Stock le di-Bond: Di-Stock le di-bond di ka neelwa go Mokgatlo wa Watch Tower e le mpho e neelwago ka go lebanya.

Mafelo ao e Lego Dithoto: Mafelo ao e lego dithoto tšeo di ka rekišwago a ka neelwa e le mpho e neelwago ka go lebanya goba ge e ba e le lefelo la bodulo, ka go boloka thoto e le go monei, yo a ka tšwelago pele a dula go yona ge a sa dutše a phela. Ikgokaganye le ofisi ya lekala ya nageng ya geno pele o fetiša lefelo le ge e le lefe leo e lego thoto.

Dikeno: Dithoto goba tšhelete di ka tlogelelwa Mokgatlo wa Watch Tower e le bohwa ka go dirišwa ga keno e dirilwego ka molao.

Bakeng sa tsebišo e oketšegilego, o ka ikgokaganya le Accounting Office, e ka ba ka go ngwala goba ka mogala atereseng yeo e lokeleditšwego ka mo tlase goba o ka ikgokaganya le ofisi ya lekala ya Dihlatse tša Jehofa yeo e hlankelago naga ya geno.

Accounting Office

Watch Tower Bible and Tract Society of South Africa

Private Bag X2067

Krugersdorp

1740

South Africa

Mogala: (011) 761-1000