Jehofa le ka Mohla a ka se ke a go Tlogela

BAKRISTE kua Judea ba be ba lebeletšane le kganetšo e šoro, le gona ba be ba swanetše go lwantšha pono ya go rata dilo tše di bonagalago ya batho bao ba bego ba phela le bona. E le gore a ba kgothatše, moapostola Paulo o ile a tsopola mantšu a Jehofa a bego a lebišitšwe go ba-Isiraele bao ba bego ba tsena Nageng ya Kholofetšo. Paulo o ngwadile gore: “Nka se kê ka Xo lahla; nka se kê ka Xo tloxêla.” (Ba-Hebere 13:5; Doiteronomio 31:6) Ka ntle le pelaelo kholofetšo ye e matlafaditše Bakriste ba ba-Hebere ba lekgolong la pele la nywaga.

Yona kholofetšo ye e swanetše go re matlafaletša go lwantšha dipelaelo tšeo di bakwago ke go phela ‘mabakeng a mathata.’ (2 Timotheo 3:1) Ge e ba re bota Jehofa gomme re gata megato e swanetšego, o tla re tiiša gaešita le maemong a lego thata kudu. Go bona kamoo Jehofa a ka phethagatšago kholofetšo ye ka gona, anke re eleng hloko mohlala wa go lahlegelwa ga motho ke mošomo go sa letelwa.

Go Lebeletšana le Maemo a sa Letelwago

Palo ya batho ba hlokago mošomo e a oketšega lefaseng ka bophara. Go ya ka makasine wa kua Poland, go hloka mošomo go lebelelwa e le “bjo bongwe bja mathata a magolo a tša leago le a tša boiphedišo.” Dinaga tše di hlabologilego le tšona di kgongwa ke se. Ka mohlala, gaešita le gare ga ditho tša Organization for Economic Cooperation and Development, palo ya batho ba ba hlokago mošomo ka 2004 e be e “oketšegile go ya go batho ba ka godimo ga dimilione tše 32, ya fihlelela palo e phagamego go feta ya bao ba bego ba hloka mošomo ka bo-1930 nakong ya Tšhaparego e Kgolo. Mokgatlo wa Central Statistical Office wa kua Poland o ile wa lokeletša batho ba dimilione tše tharo ba hlokago mošomo go tloga ka December 2003, “e lego ba akaretšago 18 lekgolong ya badudi ba lego nywageng ya go šoma.” Mothopo o mongwe o begile gore tekanyo ya baagi ba batho-baso bao ba hlokago mošomo mono Afrika Borwa e ile ya fihla go 47, 8 lekgolong ka 2002!

Go lahlegelwa ke mošomo go sa letelwa ke tlhoba-boroko go ba bantši, go akaretša le go bahlanka ba Jehofa. “Nako le ditiragalo tše di sa letelwago” di wela motho le ge e le ofe. (Mmoledi 9:11, NW) Re ka ikhwetša re bolela mantšu a mopsalme Dafida a rego: “Ditlalêlô di xoletše pelo ya-ka.” (Psalme 25:17) Na o tla kgona go lebeletšana ka katlego le maemo a bjalo a sa thabišego? A ka kgoma maikwelo a gago, boemo bja moya le bja nama. Ge e ba o lahlegetšwe ke mošomo, na o  ka kgona go boela wa phela ka tsela yeo o bego o phela ka yona pele?

Go Lebeletšana ka Katlego le Maikwelo a Gateletšago

Janusz Wietrzyński yo e lego setsebi sa tša monagano o hlalositše gore: “Go lahlegelwa ke mošomo go kweša banna bohloko kudu” ka ge ka tlwaelo ba lebelelwa e le bafepi ba malapa. O boletše gore go ka dira gore monna “a be le phetogo e kgolo ya maikwelo,” go tloga go a pefelo go ya go a go felelwa ke kholofelo. Tate yo a lahlegetšwego ke mošomo a ka felelwa ke boitlhompho gomme a thoma “go lwantšha lapa la gagwe.”

Adam yo e lego Mokriste yo a nago le bana ba babedi o hlalosa kamoo a ilego a ikwa ka gona ge a be a lahlegelwa ke mošomo, o re: “Ke be ke ferekana gabonolo; dilo tšohle di be di ntena. Gaešita le bošego ditoro tša-ka ka moka di be di le mabapi le mošomo le gore ke tla hlokomela bjang bana ba-ka le mosadi wa-ka yoo le yena a lahlegetšwego ke mošomo go sa letelwa.” Ge Ryszard le Mariola e lego banyalani bao ba nago le ngwana ba be ba lahlegelwa ke tsela ya bona ya go hwetša moputso, ba be ba adimile tšhelete e ntši pankeng yeo ba bego ba sa fetša go e lefelela. Mosadi o hlalosa gore: “Ke be ke dula ke tlaletšwe, letswalo la-ka le mpotša gore e be e le phošo go adima tšhelete yeo. Ka mehla ke be ke nagana gore ke molato wa-ka.” Le rena ge re lebeletšane le maemo a bjalo re ka galefa gabonolo, ra belaela goba ra kwa bohloko gomme maikwelo a rena a ka re gatelela. Ka gona, re ka kgona bjang go laola maikwelo a fošagetšego ao a ka thomago go tšwelela ka go rena?

Beibele e nea keletšo e šomago mabapi le go boloka boemo bjo bo nepagetšego bja kgopolo. Moapostola Paulo o lemošitše gore: “A Le se kê la belaêla selô. Mo xo kaxo ba le tše Le di nyakaxo, Le di tlišê pele xa Modimo ka kxopêlô le ka thapêlô e naxo le teboxô. Xomme khutšô ya Modimo, ye e fetaxo thlaoloxanyô yohle, a e bolokê dipelo tša lena le ’kxopolô tša lena xo Kriste Jesu.” (Ba-Filipi 4:6, 7) Go batamela Jehofa ka thapelo go tla re nea “khutšô ya Modimo,” e lego boemo bja go ba yo a fodilego monaganong bjo bo theilwego tumelong ya rena go yena. Mosadi wa Adam e lego Irena o bolela gore: “Dithapelong tša rena, re boditše Jehofa ka boemo bja rena le kamoo re tlago go nolofatša maphelo a rena ka mo go oketšegilego. Monna wa-ka, yoo ka mehla a bego a hwetša mabaka a go belaela, o ile a thoma go ba le pono ya gore tharollo e tla itšweletša.”

Ge e ba o lebeletšane le boemo bja go lahlegelwa ke mošomo go sa letelwa, o boemong bjo bobotse bja go diriša keletšo ya Jesu Kriste ya Thutong ya Thabeng e rego: “Le se kê la belaêlêla bophelô bya lena la re: Re tlo ja’ng? Re tlo nwa’ng? Le mmele Le se kê la o belaêlêla la re: Re tlo apara’ng? . . . Sa pele Le tsomê mmušô wa Modimo le tokô ya wôna; ké mo Le tl’o xo ekeletšwa ka tšeo ka moka.” (Mateo 6:25, 33) Ryszard le Mariola ba dirišitše keletšo ye ka katlego go lebeletšaneng le maikwelo a bona. Mariola o gopola ka gore: “Monna wa-ka ka mehla o be a nkhomotša gomme a gatelela gore Jehofa a ka se ke a re lahla.” Monna wa gagwe yena o oketša ka gore: “Ka dithapelo tše sa kgaotšego re le gotee, re batametše kgaufsi le Modimo le go batamelana kgaufsi seng sa rena, gomme seo se re neile khomotšo yeo re bego re e nyaka.”

Moya o mokgethwa wa Modimo le wona o tla re thuša go kgotlelela. Boitshwaro, bjo moya wa Modimo o re thušago gore re be le bjona, bo ka dira gore re boloke maikwelo a rena a tsepame. (Ba-Galatia 5:22, 23) Go ka fo se be bonolo, eupša go a kgonega ka gobane Jesu o holofeditše gore “Tata-weno wa maxodimong . . . Ba ba Mo  kxopêlaxo ó ba nea Môya o mokxêthwa.”—Luka 11:13; 1 Johane 5:14, 15.

O se ke wa Hlokomologa Dinyakwa tša Gago tša Moya

Go lahlegelwa ke mošomo go sa letelwa go ka thoma ka go hlobaetša gaešita le Bakriste bao ba leka-lekanego, eupša ga se ra swanela go hlokomologa dinyakwa tša rena tša moya. Ka mohlala, bona Moše wa nywaga e 40, yoo bophelo bja gagwe ka moka bo ilego bja fetoga ge a be a lahlegelwa ke maemo a gagwe ka lapeng la bogoši gomme a swanelwa ke go ba modiši, e lego mošomo o nyatšwago ke ba-Egipita. (Genesi 46:34) Moše o ile a swanelwa ke go tlwaelana le maemo a gagwe a mafsa. Nywageng e 40 e latetšego, Moše o ile a dumelela Jehofa gore a mo hlahle le go mo hlama gore a tle a kgone go šoma mešomo e mefsa yeo e bego e letše ka pele. (Ekisodo 2:11-22; Ditiro 7:29, 30; Ba-Hebere 11:24-26) Go sa šetšwe go lebeletšana ga gagwe le mathata, Moše o be a tsepeletše dilong tša moya gomme a ikemišeditše go amogela tlwaetšo ya Jehofa. Anke le ka mohla re se ke ra dumelela maemo a sa kgahlišego a bipa mediro ya rena ya bohlokwa ya moya!

Le ge e le gore go lahlegelwa ke mošomo go sa letelwa go ka baka kgateletšo ya monagano, yeo ke nako e botse ya go matlafatša tswalano ya rena le Jehofa Modimo le batho ba gagwe. Adam yo go boletšwego ka yena pejana o ile a ikwa ka tsela yeo. O re: “Ge nna le mosadi wa-ka re be re lahlegelwa ke mešomo ya rena, kgopolo ya go foša diboka tša Bokriste goba go fokotša modiro wa rena wa boebangedi ga se ya ka ya tšwelela. Pono e bjalo e ile ya re šireletša gore re se tshwenyege ka mo go feteletšego ka letšatši le le latelago.” Ryszard le yena o ikwa ka mo go swanago ge a re: “Ge nkabe e be e se ka diboka le ka bodiredi, re ka be re sa ka ra kgotlelela; ga go pelaelo gore re ka be re ile ra gateletšwa ke mathata. Dipoledišano tša moya le ba bangwe di a imolla ka ge di retollela tlhokomelo  ya rena go dinyakwa tša bona, e sego tša rena.”—Ba-Filipi 2:4.

Therešo ke gore go e na le go tshwenyega ka go hwetša mošomo, leka go diriša nako yeo e oketšegilego bakeng sa mediro ya moya, go swara thuto ya motho ka noši, go tšea karolo medirong ya phuthego goba go oketša bodiredi bja gago. Go e na le gore o phele bophelo bja motho wa go se šome, o tla ba le ‘mo gontši moo o go dirago modirong wa Morena’—e lego seo se tlago go go tlišetša lethabo gotee le go le tlišetša batho le ge e le bafe ba botegago e le ka kgonthe bao ba arabelago molaetšeng woo o o tsebatšago wa Mmušo.—1 Ba-Korinthe 15:58, bapiša le NW.

Go Hlokomela Lapa la Gago Nameng

Lega go le bjalo, dijo tša moya di ka se khoriše mpa e swerwego ke tlala. Re dira gabotse go gopola molao wa motheo o latelago: “Xe motho a sa babalele b’abô, xaxolo ba lapeng la xabô, ó latola tumêlô; ó phalwa ke e a sa dumelexo.” (1 Timotheo 5:8) Adam o dumela ka gore: “Le ge bana babo rena ka phuthegong ba arabela ka pela dinyakweng tša rena tša nama, rena bjalo ka Bakriste re swanetše go rwala boikarabelo bja go tsoma mošomo.” Re ka lebelela thekgo go Jehofa le go batho ba gagwe, eupša le ka mohla ga se ra swanela go lebala gore re swanetše go gata mogato wa pele wa go tsoma mošomo.

Ke bjang re ka gatago mogato wa pele? Adam o hlalosa gore: “O se ke wa phutha matsogo o holofetše gore Modimo o tla go nea mošomo ka mohlolo. Ge o tsoma mošomo, o se ke wa tšhaba go itsebiša o le yo mongwe wa Dihlatse tša Jehofa. Mabakeng a mantši bathwadi ba tšeela seo godimo.” Ryszard o nea keletšo ye: “Botšiša motho le ge e le ofe yoo o mo tsebago ka dikgoba tša mešomo, tšwela pele o hlola mafapheng ao a tsomelago batho mešomo, le gona bala le dipapatšo tše bjalo ka tše rego: ‘Go nyakega mosadi yo a ka kgonago go hlokomela motho yo a golofetšego’; goba tšeo di rego: ‘Mošomo wa go fula dienywa wa lebakanyana.’ Tšwelapele o tsoma! O se ke wa hlaola kudu, gaešita le ge o ka swanelwa ke go šoma mošomo wa go lefa tšhelete e nyenyane goba woo e sego wa ditoro tša gago.”

Therešo ke gore ‘Jehofa ke mothuši wa gago.’ ‘A ka se ke a go lahla, a ka se ke a go tlogela.’ (Ba-Hebere 13:5, 6) Ga se wa swanela go belaela ka mo go feteletšego. Mopsalme Dafida o ngwadile gore: “Xafêla Morêna ditsela tša xaxo, O mmôtê; Yêna ó tlo dira.” (Psalme 37:5) ‘Go gafela ditsela tša rena go Jehofa’ go bolela gore re ithekgile ka yena le gona re dira dilo ka tsela ya gagwe, le ge maemo a ka bonagala a sa re thabiše.

Adam le Irena ba kgonne go iphediša ka go hlatswa mafasetere le go hlwekiša manamelelo a go ya mabatong le ka gore ba seketše ge ba reka dilo. Le gona ba be ba etela ka mehla mafapha a go tsomela batho mešomo. Irena o re: “Thušo e be e e-tla ka nako yeo re bego re e nyaka.” Monna wa gagwe o tlaleletša ka gore: “Ge e le gabotse, go feta ga nako go re rutile gore mathata ao re bego re rapela ka ona a be a sa sepedišane ka mo go feletšego le thato ya Modimo. Se se re rutile gore re ithekge ka bohlale bja gagwe gomme re se dire dilo go ya ka tlhaologanyo ya rena. Go kaone go leta ka go se fele pelo tharollo yeo Modimo a tla e neago.”—Jakobo 1:4.

Ryszard le Mariola ba ile ba šoma mešongwana e fapa-fapanego ya lebakanyana eupša ka nako e swanago ba ile ba tšea karolo go neeng bohlatse ditikologong tšeo go bego go nyakega thušo e kgolo. Ryszard o re: “Re be re hwetša mešomo ka nako yeo re bego re tloga re hloka sa go ja. Re ile ra gana mešomo e lefago gabotse yeo e bego e tla re šitiša go rwala boikarabelo bja rena bja mabapi le pušo ya Modimo. Re be re bona go le kaone go letela Jehofa.” Ba dumela gore Jehofa o ile a tsena ditaba gare gore ba kgone go lefelela folete ka tšhelete ya fase gomme mafelelong Ryszard o ile a hwetša mošomo.

Go lahlegelwa ke mošomo wa boiphedišo go ka kweša bohloko kudu, eupša ke ka baka la’ng o sa go lebelele e le sebaka se sebotse sa gore o bone ka bowena gore Jehofa a ka se ke a go tlogela? Jehofa o a go hlokomela. (1 Petro 5:6, 7) O ile a holofetša ka moporofeta Jesaya gore: “O se kê wa thšoxa, xobane Modimo wa xaxo ké Nna. Ke a Xo tiiša; ke a Xo thuša.” (Jesaya 41:10) Le ka mohla o se ke wa dumelela go fetšwa matla ke tiragalo e sa letelwago, go akaretša le ya go lahlegelwa ke mošomo. Dira sohle seo o ka se kgonago gomme tše dingwe ka moka o di tlogelele diatleng tša Jehofa. Letela Jehofa o “ikhomoletše.” (Dillo tša Jeremia 3:26) O tla ba le ditšhegofatšo tše di humilego.—Jeremia 17:7.

[Seswantšho go letlakala 9]

Dirišang nako yeo medirong ya moya

[Diswantšho go letlakala 10]

Ithute go seketša, le gona o se be yo a hlaolago kudu ge o tsoma mošomo