Dipotšišo tše Tšwago go Babadi
Dipotšišo tše Tšwago go Babadi
Na Sathane Diabolo o na le bokgoni bja go tseba seo motho a se naganago?
Gaešita le ge re ka se kgonthišetše taba yeo, go bonagala Sathane goba batemona ba gagwe ba se na bokgoni bja go tseba seo re se naganago.
Ela hloko maina ao a hlalosago ao a neilwego Sathane. O bitšwa Sathane (Moganetši), Diabolo (Mothomeletši), Noga (lehlalosetša-gotee la Moradia), Moleki le Mofori. (Jobo 1:6; Mateo 4:3; Johane 8:44; 2 Ba-Korinthe 11:3; Kutollo 12:9) Ga go le letee la maina a a hlalosago leo le bolelago gore Sathane o na le bokgoni bja go tseba seo re se naganago.
Lega go le bjalo, ka mo go fapanego, Jehofa Modimo o hlaloswa e le “mohlahlobi wa dipelo.” (Diema 17:3, NW; 1 Samuele 16:7; 1 Koronika 29:17) Ba-Hebere 4:13 e re: “Xa xo sebopya se se kaxo mo [Jehofa] širêla; tšohle ó di bôna dì hlobotše dì khurumolotšwe. Xomme ké Yêna-eo re naxo le taba le Yêna.” Ga go makatše ge Jehofa a neile Morwa wa gagwe e lego Jesu bokgoni bja go hlahloba dipelo. Jesu yo a tsošitšwego o ile a re: “Nna Mo-lekola-phsio-le-pelo. Xomme mang le mang wa lena ke tlo mo nea se se lebanexo medirô ya lena.”—Kutollo 2:23.
Beibele ga e bolele gore Sathane o kgona go fenyeka dipelo tša batho gotee le menagano. Taba ye e a kwagala ka ge moapostola Paulo a re kgonthišetša gore Bakriste ‘ga se gore ga ba tsebe maano a Sathane.’ (2 Ba-Korinthe 2:11) Ka gona ga se ra swanela go boifa gore Sathane o na le bokgoni bjo bo sa tlwaelegago bjo re sa bo tsebego le gatee.
Lega go le bjalo, se ga se bolele gore Lenaba la rena ga le kgone go lemoga mafokodi a rena. Sathane o bile le nywaga e mentši ya go ithuta boitshwaro bja batho. Ga go nyakege gore a kgone go tseba megopolo ya rena bakeng sa go lemoga boitshwaro bja rena, go tseba boithabišo bjo re bo phegelelago goba go theetša seo re se bolelago gotee le tše dingwe. Tsela yeo re arabelago ka yona ka difahlego tša rena le boitšhišinyo bja mmele e ka bontšha seo re se naganago goba kamoo re ikwago ka gona.
Lega go le bjalo, gantši Sathane o diriša mekgwa yona yeo a ilego a e diriša tšhemong ya Edene—e lego maaka, boradia le tsebišo e fošagetšego. (Genesi 3:1-5) Gaešita le ge Bakriste ba se ba swanela go boifa gore Sathane o tla tseba menagano ya bona, ba swanetše go kgomega ka gore ke dikgopolo tša mohuta ofe tšeo Sathane a ka lekago go di tsentšha ka menaganong ya bona. O nyaka gore Bakriste ba ‘senyege dikgopolo gomme ba timelelwe ke therešo.’ (1 Timotheo 6:5) Ga go makatše ge lefase la Sathane le phatlaladitše lefula la tsebišo e gobošago gotee le boithabišo. E le gore Bakriste ba kgone go emeletšana ka katlego le go hlaselwa, ba swanetše go šireletša menagano ya bona ka go rwala “kêfa ya pholoxô.” (Ba-Efeso 6:17) Se ba se dira ka go tlatša menagano ya bona ka ditherešo tša Beibele le ka go phema go ikgokaganya ka mo go sa nyakegego le ditutuetšo tše di gobošago tša lefase la Sathane.
Sathane ke lenaba le le boifišago. Eupša ga se ra swanela go boifa Sathane goba batemona ba gagwe o šoro. Jakobo 4:7 e re kgonthišetša gore: “Le lwê le Diabolo, ’me ó tlo Le thšaba.” Ge e ba re e-kwa keletšo ye, re tla kgona go bolela bjalo ka Jesu gore Sathane ga a na se a tlogo re dira sona.—Johane 14:30.