BAGOELEDI BA MMUŠO BA A BEGA

Diholo tša Mmušo di Bulegetše Bohle

GE A be a dutše a tlwaetša barutiwa ba gagwe bodiredi bja phatlalatša, Jesu Kriste o ile a ba kgothaletša go ‘goelela ba le seokamong.’ (Mateo 10:​27) Ee, ba be ba swanetše go phetha bodiredi bja bona bja Bokriste phatlalatša, mo ba bonwago ke batho bohle. Ka go dumelelana le keletšo ye, modiro wa Dihlatse tša Jehofa le wona o dirwa phatlalatša. Go bolela phatlalatša mo go dirile gore Dihlatse di kgone go fenya kganetšo le go elwa hloko ka tsela e kgahlišago.

Le ge diboka tša phuthego tša Dihlatse tša Jehofa di bulegetše bohle, go beba sefahlego go dira gore batho ba bangwe ba ikwe ba sa rate go tsena Holong ya Mmušo. Se se bjalo kua Finland. Ba bangwe ba fo ba ba šia go ya mafelong ao ba sa a tlwaelago. Ge Holo ya Mmušo e mpsha e agwa goba ge holo yeo e lego gona e mpshafatšwa, gantši go rulaganywa taletšo-kakaretšo ya go tlo bona holo. Go ka dirwa maiteko a kgethegilego a go laleletša baagišani go etela Holo ya Mmušo gore ba tlwaelane le modiro wa Dihlatse tša Jehofa.

Lefelong le lengwe, Dihlatse di ile tša rulaganya go ba le lesolo la dimakasine ka letšatši leo di bego di rulaganyeditše taletšo-kakaretšo ya go tlo bona Holo ya tšona e mpsha ya Mmušo. Dihlatse tše pedi di ile tša kopana le mokgalabje yo a ilego a bolela gore o thabetše go bala dimakasine tša Morokami le Phafoga! Bana babo rena ba ile ba mmotša ka taletšo-kakaretšo ya go yo bona holo gomme ba ithapa gore ba tla ya le yena Holong ya Mmušo. Monna yo o ile a bolela gore o tla thabela go ba gotee le bona. Mosadi wa gagwe yo a bego a theeditše poledišano o ile a goeletša ka gore, “Le se ke la ntlogela!”

Ge ba be ba tsena Holong ya Mmušo, monna yo o ile a taka-taketša mahlo gohle gomme a re: “Ga se e ntsho le gatee. Ee, ke e botse le e tagilego. Ke boditšwe gore ke tla hwetša Holo ya Mmušo e le e ntsho!” Banyalani bao ba ile ba dula ka lebakanyana gomme ba kgopela tše dingwe tša dipuku tšeo di bego di beilwe moo.

Phuthego e nngwe e be e nyaka go tsebiša kura­nteng ya lefelong leo mabapi le taletšo-kakaretšo ya go yo bona holo nakong ya go neela ga bona Holo ya Mmušo. Ka morago ga go tsebišwa ka tiragalo ye, morulaganyi-mogolo wa dikuranta tša moo o ile a šišinya gore go ngwalwe sehlogo mabapi le taba yeo. Bana babo rena ba ile ba dumela, gomme go se go ye kae ka morago ga moo, sehlogo se se kgahlišago sa go lekana seripa-gare sa letlakala se ile sa tšwelela kuranteng, se akaretša tiragalo yeo le go hlalosa mediro ya lefelong leo ya Dihlatse tša Jehofa.

Ka morago ga go gatišwa ga sehlogo seo, Hlatse ya motšofadi e ile ya kopana le moagišani yo a ilego a e botša go­re: “Go be go e-na le sehlogo se se kgahlišago ka Dihlatse tša Jehofa kuranteng lehono!” Kgaetšedi o ile a kgona go nea bohlatse go motho yoo gomme ka morago a mo sepedišetša poroutšha ya Dihlatse tša Jehofa Lekgolong la Nywaga la Masome-pedi.

Go oketša tabeng ya go lokiša dikgopolo tše fošagetšego mabapi le Dihlatse tša Jehofa, dithulaganyo tše bjalo tše tswalanago le taletšo-kakaretšo ya go bo­na ho­lo le mananeo a go neelwa ga Diholo tše difsa tša Mmušo di hlohleleditše bagoeledi ka go ba kgothaletša go­re ba laletše batho ba oketšegilego go­re ba be gona dibokeng. Ee, dinageng tše dintši, go akaretša le Fin­land, batho ba ile ba lemoga go­re Diholo tša Mmušo tša Dihlatse tša Jehofa di bulegetše bohle.