Batho ba bantši ga ba nyake go rapela Modimo ka gobane ba nagana gore ke yena a re bakelago mathata.

Baruti ba bantši ba ruta batho gore Modimo ke yena a re bakelago mathata. Ka mohlala, ba bangwe ba re:

• Ge go eba le dikotsi tša tlhago, Modimo o tla be a re otla.

• Ge bana ba ehwa, ke ka gobane Modimo o nyaka barongwa ba bantši legodimong.

• Le ge dintwa di dira gore batho ba feleletše ba tlaišega, Modimo o a di thekga.

Eupša na go ka direga gore seo baruti ba se rutago ka Modimo ke maaka? Ge e ba dilo tšeo baruti ba di bolelago ka Modimo e le maaka, na re ka ba tshepa ge ba bolela gore ke yena a re bakelago mathata?

Ga se Modimo a dirago gore re welwe ke mathata.

Ge nkabe Modimo e le yena a re bakelago mathata, gona go tla ra gore seo Beibele e se bolelago ka yena ga se nnete. Ka mohlala:

DOITERONOMIO 32:4 e re: ‘Ditsela tša Modimo ka moka ke tša toka. O lokile e bile o letlile.’

JOBO 34:10 e re: “Go dira tše kgopo [goba tše mpe] a go be kgole le Modimo wa therešo, le go dira ka go hloka toka a go be kgole le Ramatlaohle!”

JOBO 34:12 e re: “Ramatlaohle yena ga a kgopamiše kahlolo.”

Modimo o hloile dikereke tšeo di rutago maaka ka yena.

Se se ra gore Modimo o hloile dikereke tšeo di rutago batho gore ke yena a dirago gore re welwe ke mathata le tšeo di tsenatsenago dintweng.

JEREMIA 14:14 e re: ‘Baporofeta ba porofeta maaka ka leina la Modimo. Ga se a ba roma, e bile ga se a ba laela goba go bolela le bona. Ba le porofetela pono ya maaka gotee le boradia bja pelo ya bona.’

Jesu o boletše ka boikaketši bja dikereke.

Go MATEO 7:21-23 o itše: “Ga se yo mongwe le yo mongwe yo a rego go nna: ‘Morena, Morena,’ a tlago go tsena Mmušong wa magodimo, eupša go tla tsena yo a dirago thato ya Tate yo a lego magodimong. Ba bantši ba tla re go nna letšatšing leo: ‘Morena, Morena, na ga se ra ka ra porofeta ka leina la gago, ra leleka batemona ka leina la gago, ra dira mediro e mentši e matla ka leina la gago?’ Lega go le bjalo, ke tla ba botša ka re: Ga se ka ka ka le tseba! Tlogang go nna lena ba go hloka molao.”