Dipeakanyo tša go bula

Kgetha leleme

Eya go menyu wa bobedi

Eya go dikagare

Dihlatse tša Jehofa

Sepedi

Ke ka Baka La’ng Modimo a Ile a Dumelela Bajuda go Bolawa ga Sehlogo?

Ke ka Baka La’ng Modimo a Ile a Dumelela Bajuda go Bolawa ga Sehlogo?

Batho ba bantši bao ba botšišago potšišo ye ba ile ba hwelwa ke batho bao ba ba ratago, ka go re’alo ga ba nyake feela karabo eupša ba tsoma le khomotšo. Ba bangwe ba lebelela polao e sehlogo ya Bajuda e le bošoro bjo bogolo bja batho gomme ba thatafalelwa ke go dumela go Modimo.

Dikgopolo tše di tlwaelegilego tšeo di fošagetšego ka Modimo le polao e sehlogo ya Bajuda

Maaka: Ke phošo go botšiša Modimo gore ke ka baka la’ng a dumeletše gore Bajuda ba bolawe ga sehlogo.

Therešo: Batho bao ba nago le tumelo e kgolo ba ile ba botšiša Modimo lebaka leo a dumelelago bobe. Ka mohlala, moporofeta Habakuku o ile a botšiša Modimo gore: “Ke ka baka la’ng o dumelela bošoro, go hloka molao, bosenyi le bokgopo gore di tlale gohle?” (Habakuku 1:3, Contemporary English Version) Go e na le gore Modimo a omanye Habakuku, o ile a dira gore dipotšišo tšeo a di botšišitšego di ngwalwe ka Beibeleng e le gore ka moka ga rena re di bale.

Maaka: Modimo ga a na taba le go tlaišega ga batho.

Therešo: Modimo o hloile bokgopo le tlaišego yeo e bo bakago. (Diema 6:16-19) Mehleng ya Noa, ‘pelo ya Modimo e ile ya kwa bohloko’ ka baka la bošoro bjo bo bego bo atile lefaseng. (Genesi 6:5, 6) Ga go pelaelo gore Modimo o ile a kwešwa bohloko kudu le ke polao e sehlogo ya Bajuda.—Maleaki 3:6.

Maaka: Modimo o be a otla Bajuda ka polao yeo e sehlogo.

Therešo: Modimo o ile a dumelela gore Jerusalema e fedišwe ke Baroma lekgolong la pele la nywaga. (Mateo 23:37–24:2) Lega go le bjalo, ga e sa le go tloga ka nako yeo Modimo ga a sware morafo o itšego ka tsela e kgethegilego goba go o otla. Go ya ka Modimo, “ga go na phapano magareng ga Mojuda le Mogerika.”—Baroma 10:12.

Maaka: Ge e ba Modimo yo lerato le yo a nago le matla kudu a le gona, nkabe a ile a thibela polao e sehlogo ya Bajuda.

Therešo: Gaešita le ge Modimo a sa bake tlaišego, ka dinako tše dingwe o e dumelela gore e be gona ka lebakanyana.—Jakobo 1:13; 5:11.

Ke ka baka la’ng Modimo a dumeletše Bajuda go bolawa ga sehlogo?

Modimo o dumeletše polao e sehlogo ya Bajuda ka lebaka leo le swanago le leo a dumeletšego tlaišego ka moka ya batho, e lego: go rarolla dikgang tšeo di ilego tša rotošwa kgale. Beibele e bolela gabotse gore gona bjale Diabolo ke yena a bušago lefase, e sego Modimo. (Luka 4:1, 2, 6; Johane 12:31) Gaešita le ge linki e lego sehlogong se e hlalosa ka botlalo lebaka leo Modimo a dumeletšego tlaišego, dintlha tše di latelago tše pedi tša motheo tšeo di tšwago ka Beibeleng di ka thuša go hlalosa lebaka leo Modimo a dumeletšego polao e sehlogo ya Bajuda.

  1. Ke mang a bakilego gore Bajuda ba bolawe ga sehlogo? Modimo o boditše batho ba pele e lego Adama le Efa seo a se letetšego go bona, eupša ga se a ka a ba gapeletša go kwa. Ba ile ba ikgethela seo se nepagetšego le seo se fošagetšego, le gona kgetho ya bona e fošagetšego—go fo swana le dikgetho tšeo di dirilwego ke batho go theoša le histori—e tlišeditše batho ditlamorago tše di šiišago. (Genesi 2:17; 3:6; Baroma 5:12) Go fo swana le ge puku ya Statement of Principles of Conservative Judaism e bolela gore: “Tlaišego e kgolo yeo re lebeletšanago le yona lefaseng e tlišwa ke go dirišwa gampe ga tokologo ya boikgethelo yeo re e neilwego.” Go e na le go re amoga tokologo ya rena ya boikgethelo, Modimo o re neile nako ya go leka go itirela dilo ka ntle le gore yena a tsene ditaba gare.

  2. Modimo o tla tloša tshenyo ka moka yeo e bakilwego ke polao e sehlogo ya Bajuda. Modimo o holofetša go tsoša batho ba dimilione bao ba hwilego, go akaretša le bao ba hwilego nakong ya polao e sehlogo ya Bajuda. Le gona o tla tloša bohloko bjoo baphologi ba polao e sehlogo ya Bajuda ba bo kwago ka baka dilo tše sehlogo tšeo ba di gopolago ka yona. (Jesaya 65:17; Ditiro 24:15) Tsela yeo Modimo a re ratago ka yona ke kgonthišetšo ya gore o tla phethagatša dikholofetšo tše.—Johane 3:16.

Ba bantši bao ba ilego ba tlaišega le go phologa polao e sehlogo ya Bajuda ba ile ba kgona go dula ba na le tumelo le go hwetša morero bophelong ka go kwešiša lebaka leo Modimo a dumeletšego bokgopo le kamoo a rerilego go fediša ditlamorago tša bjona.

 

Ithute ka mo go oketšegilego

Ke ka Baka La’ng Modimo a Dumelela Tlaišego?

Batho ba bantši ba nagana gore Modimo ke yena a bakago tlaišego. Wena o nagana’ng? Ithute ka seo Modimo a rego se re bakela tlaišego