KE GAKAE O EKWA BATHO BA RE LETHABO LE GO ATLEGA DI TLIŠWA KE GO BA LE TŠHELETE LE MAHUMO? Ka baka la kgopolo yeo, ba bantši ba šoma diiri tše dintši kudu e le gore ba be le tšhelete e ntši. Eupša na go ba le tšhelete e ntši le mahumo go dira gore motho a dule a thabile? Bohlatse bo bontšha’ng tabeng ye?

Go ya ka Journal of Happiness Studies, re kgotsofatšwa ke go ba le dilo tša bohlokwa bophelong, e sego go ba le tšhelete e ntši. Bothata tabeng ye ga se tšhelete. Sehlogo se sengwe makasineng wa Monitor on Psychology se re: “Go phegelela [tšhelete] ke gona go dirago gore motho a se ke a thaba.” Mantšu ao a sepedišana le keletšo yeo e ilego ya newa ka Beibeleng mengwageng e ka bago e 2 000 e fetilego, yeo e rego: “Gobane lerato la tšhelete ke modu wa mehuta ka moka ya dilo tše di gobatšago gomme ka go phegelela lerato le, ba bangwe ba . . . itlhabile gohle ka mahloko a mantši.” (1 Timotheo 6:9, 10) Mahloko ao a ka akaretša eng?

GO TSHWENYEGA LE GO FELELWA KE BOROKO KA BAKA LA GO NYAKA GO ŠIRELETŠA MAHUMO. Beibele e re: “Boroko bja mohlanka bo bose, go sa šetšwe gore o ja ganyenyane goba kudu; eupša mohumi ga a robale ka baka la boati bja dilo tšeo a nago le tšona.”—Mmoledi 5:12.

GO NYAMA GE MOTHO A SA HWETŠE MAHUMO AO A BEGO A A TSHEPIŠITŠWE. Ge e le gabotse, go nyama moo go bakwa ke gore le ge motho a ka hwetša tšhelete e ntši a ka se tsoge a e kgotsofaletše. Beibele e re: “Morati wa silifera a ka se kgotsofatšwe ke silifera, le yo mongwe le yo mongwe yo a ratago lehumo a ka se kgotsofatšwe ke tšeo di mmoelago.” (Mmoledi 5:10) Gape, go nyaka go huma go ka dira gore motho a hlokomologe dilo tša bohlokwa tšeo di tlišago lethabo, tše bjalo ka go fetša nako le lapa le bagwera goba mediro yeo e sepedišanago le go tumiša Modimo.

GO NYAMA LE GO HLAKAHLAKANA GE TŠHELETE E FELELWA KE MATLA GOBA E FELA. Beibele e re: ‘O se ke wa itapišetša go hwetša mahumo. O se ke wa ithekga ka tlhaologanyo ya gago. Na o gašitše mahlo gore o bone ge e se selo? Ka gobane  ruri lehumo le mela maphego a etšago a ntšhu la fofa.’ —Diema 23:4, 5.

GO KGOTSOFALA. Beibele e re: “Gobane ga se ra tliša selo lefaseng, le gona re ka se ke ra tloga le selo. Ka gona ge re na le dijo le diaparo re tla kgotsofala ka tšona.” (1 Timotheo 6:7, 8) Batho bao ba kgotsofetšego ga ba ngongorege goba go belaela e bile mekgwa ya bona e mebotse e ba thuša gore ba se ke ba ba le lehufa. Ka ge ba sa nyake dilo tše dintši tšeo ba ka se kgonego go di fihlelela, seo se ba thuša gore ba se ke ba belaela le go gateletšega go sa hlokagale.

GO RATA GO FANA. Beibele e re: “Go na le lethabo le legolo go neeng go feta go amogeleng.” (Ditiro 20:35) Batho bao ba ratago go fana ba dula ba thabile ka gobane ba dira gore batho ba bangwe ba thabe, le ge e le gore ba ka kgona go fana feela ka nako e nyenyane goba matla a bona. Ba thabela dilo tše dintši tšeo tšhelete e ka se kgonego go di reka, e lego lerato, tlhompho le go ba le bagwera ba nnete bao le bona ba ratago go fana.—Luka 6:38.

GO TŠEA BATHO BA LE BOHLOKWA GO FETA DILO TŠEO RE NAGO LE TŠONA. Beibele e re: “Go ja morogo mo go nago le lerato go phala go ja nama ya poo e nonnego moo go nago le lehloyo.” (Diema 15:17) Ntlha ke efe temaneng ye? Go phedišana le batho gabotse go bohlokwa kudu go feta mahumo. E bile ka ge re tla bona ka morago, seka sa lerato se bohlokwa bakeng sa gore motho a thabe.

Sabina wa Amerika Borwa, o ithutile bohlokwa bja melao ya motheo ya Beibele. Ka ge monna wa gagwe a mo tlogetše, go be go le thata gore Sabina a itlhokomele le go hlokomela barwedi ba gagwe ba babedi. O be a šoma mešomo e mebedi gomme a tsoga ka iri ya bone mesong. Sabina o ile a thoma go ithuta Beibele go sa šetšwe bophelo bja gagwe bja leemaema. Mafelelo e bile afe?

O ile a no tšwela pele a gola tšhelete e nyenyane. Eupša tsela yeo a lebelelago dilo ka yona e ile ya fetoga kudu. Ka mohlala, o ile a thabišwa ke go thoma go ithuta ka Modimo. (Mateo 5:3) O ile a hwetša bagwera ba nnete gare ga badumedi gotee le yena. E bile o ile a thabela go nea ba bangwe ka go ba botša seo a bego a ithutile sona ka Beibeleng.

Beibele e re: “Bohlale bo hlatselwa ka mediro ya bjona.” (Mateo 11:19) Tabeng yeo, re kgona go bona gore go kgotsofala le go rata go fana gaešita le go tšea batho ba le bohlokwa go feta dilo tšeo re nago le tšona, go bohlokwa kudu.