NA O MOTHO YO A THABILEGO? Ge e ba go le bjalo, ke eng seo se dirago gore o thabe? Na ke lapa la gago, mošomo wa gago goba bodumedi bja gago? Mohlomongwe o letetše dilo tšeo di ka dirago gore o thabe, tše bjalo ka go fetša sekolo, go hwetša mošomo goba go reka koloi.

Batho ba bantši ba a thaba ge ba fihlelela selo seo ba bego ba se nyaka. Eupša lethabo leo le tšea nako e kaaka’ng? Gantši e no ba la nakwana, e lego seo se nyamišago.

Lethabo le hlaloswa e le go dula o kgotsofetše, e sego go no kgotsofala feela eupša go ikwa o thabela bophelo le go duma eka nkabe bo sa fele.

Bjalo ka ge go kgotsofala e le maikwelo ao motho a dulago a na le ona, le lethabo le hlalositšwe le swana le go tšea leeto, e sego selo seo motho a nyakago go se fihlelela ka nako e itšego. Go ipotša gore, “Ke tla thaba ge . . . ” ge e le gabotse go swana le go diegiša lethabo.

Ka mohlala, bapiša lethabo le go phela gabotse mmeleng. Ke bjang re ka phelago gabotse mmeleng? Re dira dilo tšeo di tla re holago tše bjalo ka go ja gabotse, go itšhidulla le tsela yeo re phelago ka yona. Ka mo go swanago, tsela yeo re dirago dilo ka yona e dira gore re thabe. Lethabo le tlišwa ke go latela tsela e botse ya bophelo, go phela ka go dumelelana le melao ya motheo yeo e holago.

Ke dika dife tšeo di dirago gore motho a thabe? Le ge dika tše dingwe di le bohlokwa go feta tše dingwe, dika tše di latelago di kgatha tema ya bohlokwa:

• GO KGOTSOFALA LE GO RATA GO FANA

• GO PHELA GABOTSE MMELENG LE GO KGONA GO KGOTLELELA

• GO BA LE LERATO

• GO LEBALELA

• GO TSEBA SEO O SE PHELELAGO

• GO BA LE KHOLOFELO

Puku e hlompšhago kudu ka baka la bohlale bja yona e re: “Go thaba bao ba se nago bosodi tseleng ya bona.” (Psalme 119:1) Anke re ithuteng ka tsela yeo.