Kgoši ya Mmušo wa Modimo ke Mang?

BAPALA

Modimo o ile a kgetha batho ba mmalwa gore ba ngwale ka Beibeleng dilo tšeo di bego di tla re thuša go tseba Kgoši ya Mmušo wa gagwe. Kgoši yeo re be re tlo e tseba ka dilo tše di latelago:

E be e tla kgethwa ke Modimo ka boyena. Psalme 2:6, 8 e re: “Nna ena ke beile kgoši ya ka, . . . gore ke go nee ditšhaba e be bohwa bja gago, ke go nee le pheletšo ya lefase e be leruo la gago.”
E be e tla tšwa lelokong la Kgoši Dafida: Jesaya 9:6, 7 e re: “Re belegetšwe ngwana, re neilwe morwa . . . Go naba ga pušo ya gagwe le go ata ga khutšo go ka se fele sedulong sa bogoši sa Dafida le mmušong wa gagwe, e le gore a e tiiše.”
E be e tla belegelwa motseng wa Betlelehema. Mika 5:2, 4 e re: “Wena Betlelehema . . . , go wena go tla tšwa yo e tlago go ba mmuši . . . E tla ba yo mogolo go fihla pheletšong ya lefase.”
E be e tla ganwa ke batho le go bolawa. Jesaya 53:3, 5 e re: “O ile a nyatšwa gomme [a tšewa] e le yo e sego wa bohlokwa. . . . O ile a hlabja ka baka la go tshela ga rena molao; o ile a šilakanywa ka baka la diphošo tša rena.”
E be e tla tsošwa bahung, gomme ya newa maemo a phagamego. Psalme 16:10, 11 e re: “O ka se tlogele moya wa ka o le Bodulabahu. O ka se dumelele mohlanka wa gago yo a botegago a bola ka lebitleng. . . . Ka seatleng sa gago sa le letona go bose ka mo go sa felego.”

Ke ka baka la Eng Jesu Kriste e le Yena a tlo Kgonago go Buša Batho?

Go batho ka moka bao ba kilego ba phela mo lefaseng, ke motho o tee feela yoo dilo tšeo re boletšego ka tšona di diregilego go yena. Motho yoo ke Jesu Kriste! Ge e le gabotse, morongwa o ile a botša Maria mmago Jesu gore: “Modimo o tla mo nea sedulo sa bogoši sa Dafida tatagwe, . . . gomme Mmušo wa gagwe o ka se fele.”—Luka 1:31-33.

Ge Jesu a be a le mo lefaseng, ga se a ka a buša batho. Eupša ka ge e le Kgoši ya Mmušo wa Modimo, o tlo buša batho a le legodimong. Ke’ng seo se mo dirago gore e be Kgoši yeo e phalago dikgoši ka moka? Ekwa kamoo a bego a hlaloswa ka gona ge a be a le mo lefaseng.

Jesu o be a rata batho. Jesu o be a thuša banna le basadi, bana le batho ba bagolo, go sa šetšwe gore e be e le bahumi goba badiidi. (Mateo 9:36; Mareka 10:16) Ka mohlala, ge motho yo a bego a swerwe ke bolwetši bja lephera a be a mo kgopela gore: “Ge feela o rata, o ka ntlhwekiša,” Jesu o ile a mo kwela bohloko gomme a mo fodiša.—Mareka 1:40-42.
Jesu o re rutile gore re ka dira eng gore re thabiše Modimo. O itše: “Le ka se be makgoba a Modimo le a Mahumo.” Le gona o ile a eletša batho gore ba sware bangwe ka tsela yeo bona ba bego ba ka rata go swarwa ka yona. Go oketša moo, o ile a bontšha gore Modimo ga a no tshwenyega feela ka dilo tšeo re di dirago, eupša o tshwenyega le ka tsela yeo re naganago ka yona le kamoo re ikwago ka gona. Ka gona e le gore re thabiše Modimo le go dula re thabile, re swanetše go šoma ka thata gore re se nagane ka dilo tše di fošagetšego. (Mateo 5:28; 6:24; 7:12) Jesu o ile a bontšha gore go bohlokwa gore re ithute dilo tšeo Jehofa a di nyakago go rena gomme re di dire.—Luka 11:28.
Jesu o re rutile gore re ka dira eng gore re rate batho ba bangwe. Dilo tšeo Jesu a bego a di bolela le go di dira di be di kgoma dipelo tša batheetši ba gagwe. Beibele e re: “Mašaba a ile a tlabja kudu ke tsela ya gagwe ya go ruta, gobane o be a ba ruta bjalo ka motho yo a nago le matla.” (Mateo 7:28, 29) O ile a ba ruta le gore ba ‘rate manaba a bona.’ O ile a ba a rapela Modimo gore a swarele batho ba bangwe bao ba ilego ba dira gore a bolawe. O itše: “Tate, ba lebalele, gobane ga ba tsebe seo ba se dirago.”—Mateo 5:44; Luka 23:34.

Ka nnete, Jesu ke Kgoši feela yeo e tlago go kgotsofatša batho ka moka. Ga se seo feela, ka ge a rata batho e bile a le botho, ke yena feela a kgonago go buša. Eupša o tlo thoma neng go buša?