Karabo ya Beibele

 Jesu o phološitše batho bao ba botegelago Modimo ge a be a neela moya wa gagwe gore e be topollo. (Mateo 20:28) Ke ka baka leo Beibele e rego Jesu ke “Mophološi wa lefase.” (1 Johane 4:14) E oketša ka gore: “Ga go phološo go motho le ge e le ofe yo mongwe, gobane ga go leina le lengwe ka tlase ga legodimo leo le neilwego batho leo ka lona re tlago go phološwa.”—Ditiro 4:12.

 Jesu o ‘hwetše motho yo mongwe le yo mongwe’ yoo a dumelago go yena. (Baheberu 2:9; Johane 3:16) Ka morago ga moo, ‘Modimo o ile a mo tsoša bahung,’ ke moka Jesu a boela legodimong e le sebopiwa sa moya. (Ditiro 3:​15) Ka ge Jesu a le legodimong, o kgona ‘go phološa ka mo go feletšego bao ba batamelago Modimo ka yena, gobane o phela a ba phophothela ka mehla.’​—Baheberu 7:25.

Ke ka baka la’ng re nyaka gore Jesu a re phophothele go Modimo?

 Ke ka gobane ka moka ga rena re na le sebe. (Baroma 3:​23) Ka gona, sebe se se dira gore Modimo a se ke a re amogela le gore re feleletše re ehwa. (Baroma 6:​23) Lega go le bjalo, ge e ba re dumela sehlabelong sa Jesu sa topollo, o tla re ‘thuša.’ (1 Johane 2:1) O tla re thuša bjang? Ka gore a lope Modimo gore a kwe dithapelo tša rena, le gore a re lebalele dibe tša rena a diriša sehlabelo sa Morwa wa gagwe sa topollo. (Mateo 1:​21; Baroma 8:​34) Ke moka Modimo o araba dithapelo tšeo ka ge di dumelelana le thato ya gagwe. Modimo o ile a roma Jesu mo lefaseng “gore lefase le [tle le] phološwe ka yena.”​—Johane 3:​17.

Na go no dumela go Jesu go ka dira gore re phološwe?

 Aowa. Go no dumela go Jesu feela go ka se dire gore re tle re phološwe. (Ditiro 16:30, 31) Beibele e re: “Bjalo ka ge mmele ka ntle le moya o hwile, le tumelo ka ntle le mediro e hwile.” (Jakobo 2:​26) E le gore re tle re phološwe, re swanetše go dira dilo tše di latelago:

•   Re swanetše go ithuta ka Jesu le Tatagwe e lego Jehofa.​—Johane 17:3.

•   Re be le tumelo go bona.​—Johane 12:44; 14:1.

•   Re bontšhe gore re kwa ditaelo tša bona. (Luka 6:​46; 1 Johane 2:​17) Jesu o ile a bolela gore ga se batho ka moka bao ba mmitšago “Morena” ba tlago go phološwa, eupša go tla phološwa bao ba “dirago thato ya [Tatagwe] yo a lego magodimong.”​—Mateo 7:​21.

•   Re tšwele pele re bontšha tumelo gaešita le ge re na le mathata. Jesu o ile a bolela gore: “Yo a kgotleletšego go fihla bofelong ke yena a tlago go phološwa.”​—Mateo 24:13.