RURI YEO KE TSHEPO E KGAHLIŠAGO KUDU! Mmopi wa rena o holofeditše go re nea bophelo bjo bo sa felego, gona mo lefaseng. Lega go le bjalo, ba bantši ba thatafalelwa ke go dumela seo. Ba bolela gore: ‘Batho ka moka ba swanetše go hwa nengneng bophelong. Lehu ke karolo ya bophelo.’ Ba bangwe ba dumela gore batho ba ka kgona go phela ka mo go sa felego, eupša e sego mo lefaseng. Ba bolela gore bophelo bjo bo sa felego bo hwetšwa ka morago ga gore motho a hwe gomme a ye legodimong. Wena o nagana’ng?

Pele o ka araba potšišo ye, go re’ng o sa hlahlobe karabo ya Beibele dipotšišong tše tše tharo: Tsela yeo motho a bopilwego ka yona e bontšha’ng mabapi le gore o be a swanetše go phela nako e kaaka’ng? Morero wa Modimo wa mathomong ka lefase le batho e be le ofe? Go tlile bjang gore batho ba hwe?

Ruri batho ba bopilwe ka tsela e kgethegilego ge ba bapišwa le mehuta e mengwe ka moka ya diphedi mo lefaseng. Ka tsela efe? Beibele e bontšha gore ke batho fela bao ba bopilwego ka “seswantšho” sa Modimo le ka “go swantšha ka yena.” (Genesi 1:26, 27) Seo se ra go re’ng? Se ra gore batho ba filwe dika tše di swanago le tša Modimo tše bjalo ka lerato le go rata toka.

Go oketša moo, batho ba filwe bokgoni bja go nagana le go nea mabaka gotee le bokgoni bja go tseba Modimo le go gwerana le yena. Ke ka baka leo re kgonago go lemoga bogolo bja legohle le go thabela dilo tše di kgahlišago tša tlhago gotee le bokgabo, mmino le direto. Go feta moo, batho ba na le bokgoni bjo bo kgethegilego bja go gwerana le Mmopi. Dika tšeo di dira gore batho ba fapane kudu le diphedi tše dingwe ka moka.

Ka gona, ela hloko se: Ge e ba Modimo a be a rerile gore re phele nako e kopana fela, na o be a tla nea batho dika tše tše dibotse kudu gotee le bokgoni bjo bo bonagalago bo sa fele bja go di hlagolela le go di kaonefatša? Therešo ke gore Modimo o file batho dika tše tše dibotse gotee le bokgoni e le gore re thabele bophelo ka mo go sa felego gona mo lefaseng.

Lega go le bjalo, ba bangwe ba bolela gore Modimo o be a sa rera gore batho ba phele mo lefaseng ka mo go sa felego. Ba bolela gore lefase le be le hlametšwe gore e be legae la nakwana, bakeng sa go bona gore ke batho bafe bao ba swanelegago go ya legodimong gore ba yo phela le Modimo ka mo go sa felego. Ge e ba seo e be e le therešo, na ge e le gabotse se be se ka se dire gore Modimo a ikarabele ka bobe bjo bo tletšego lefaseng? Seo se be se tla thulana le semelo sa Modimo. Ge Beibele e bolela ka yena e re: “Ditsela tša gagwe ka moka ke tša  toka. Ke Modimo yo a botegago, yoo go yena go se nago go hloka toka; o lokile e bile o letlile.”​—Doiteronomio 32:4.

Beibele e hlalosa gabotse morero wa Modimo wa mathomong ka lefase ka mo go kwagalago ge e re: “Ge e le magodimo ona, ke magodimo a Jehofa, eupša lefase o le neile bana ba batho.” (Psalme 115:16) Modimo o bopetše lefase gore e be legae le lebotse la batho la sa ruri. O ile a le tlatša ka dilo ka moka tšeo re di hlokago bakeng sa go thabela bophelo bjo bo nago le morero le bja ka mo go sa felego.​—Genesi 2:8, 9.

“Ge e le magodimo ona, ke magodimo a Jehofa, eupša lefase o le neile bana ba batho.”​—Psalme 115:16

Gape Beibele e hlalosa ka mo go kwagalago mabapi le morero wa Modimo ka batho. O ile a laela banyalani ba pele gore ‘ba tlale lefase ba be ba le fenye, ba buše . . . sephedi se sengwe le se sengwe se se gagabago lefaseng.’ (Genesi 1:28) Ruri ba be ba na le tokelo ya go hlokomela le go katološetša legae leo e lego Paradeise lefaseng ka moka. Ge e le gabotse Adama le Efa le ditlogolo tša bona ba be ba tlo putswa ka go phela ka mo go sa felego mo lefaseng, e sego legodimong.

Go tlile bjang gore re hwe? Beibele e bontšha gore se sengwe sa dibopiwa tša moya tša Modimo, seo ka morago se ilego sa tsebja e le Sathane Diabolo wa lerabele, se ile sa leka go senya dithulaganyo tša Modimo kua Edene. Se dirile seo bjang?

Sathane o ile a goketša batswadi ba rena ba pele e lego Adama le Efa gore ba rabele le yena kgahlanong le Modimo. Ge Sathane a be a bolela gore Modimo o be a ba tima tshwanelo ya bona ya go ikgethela se se lokilego le se se fošagetšego, ba ile ba tlatša Sathane gomme ba furalela Modimo. Seo se ile sa feleletša ka eng? Ge nako e dutše e eya, ba ile ba hwa go etša ge Modimo a be a ba lemošitše. Ba ile ba lahlegelwa ke tokelo ya go phela ka mo go sa felego lefaseng la Paradeise.​—Genesi 2:17; 3:1-6; 5:5.

Borabele bja Adama le Efa bo kgomile batho ka moka go fihla le lehono. Beibele e re: “Ka motho o tee [Adama] sebe se tsene lefaseng gomme lehu la tsena ka sebe, ka go re’alo lehu le aparetše batho bohle.” (Baroma 5:12) Re hwa ka baka la ge re abetše sebe le lehu go batswadi ba rena ba pele, e sego ka baka la morero wa Modimo wo o sa kwešišegego wo a o rerilego e sa le pele.

Borabele bja kua Edene ga se bja senya morero wa Modimo wa mathomong wa mabapi le batho le lefase. Lerato la Modimo le le phethagetšego le go rata ga gagwe toka di ile tša mo tutuetša gore a nyake go re lokolla bokgobeng bja sebe le lehu. Moapostola Paulo o hlalositše gore: “Moputso woo sebe se o lefago ke lehu, eupša mpho yeo Modimo a e neago ke bophelo bjo bo sa felego ka Kriste Jesu Morena wa rena.” (Baroma 6:23) Modimo ka lerato o ile a “gafa Morwa wa gagwe yo a tswetšwego a nnoši [Jesu Kriste] gore yo mongwe le yo mongwe yo a dumelago go yena a se ke a fedišwa, eupša a be le bophelo bjo bo sa felego.” (Johane 3:16) Ka ge Jesu a ile a ikgafa ka go rata e le sehlabelo sa topollo o ile a buša tšohle tšeo di bego di lahlegile ka baka la Adama. a

Kgauswinyane lefase la Paradeise leo Modimo a le tshepišitšego e tla ba selo sa kgonthe. O ka thabela bokamoso bjo bjo bo kgahlišago ge o ka latela temošo ya Jesu e rego: “Tsenang ka kgoro e tshesane gobane tsela e išago tshenyegong e petleke e bile e phatlaletše gomme bao ba tsenago ka yona ke ba bantši; anthe kgoro e išago bophelong ke e tshesane gomme tsela ya yona e pitlagane, le gona ke ba sego kae ba ba e hwetšago.” (Mateo 7:13, 14) Ke wena o ka ikgethelago bokamoso. O tla kgetha’ng?