Seo Beibele e se Bolelago ka Bophelo bja Nakong e Tlago
Na o kile wa ipotšiša gore bophelo bo tla ba bjang nakong e tlago? Beibele e re botša ka dilo tše dibotse tšeo di tlo diregago e se kgale tšeo re tlo di thabelago mo lefaseng.
Jesu o boletše ka dilo tšeo re tlo bonago ka tšona “gore Mmušo wa Modimo o batametše.” (Luka 21:31) O itše tše dingwe tša dilo tšeo ke dintwa tše dikgolo, ditšhišinyego tše dikgolo tša lefase, tlhaelelo ya dijo le malwetši a mantši. Tše ke dilo tšeo re di bonago lehono.—Luka 21:10-17.
Le gona, Beibele e itše “mehleng ya bofelo” batho ba tlo itshwara gampe. O ka bala 2 Timotheo 3:1-5 go kwa gore e hlalosa seo bjang. Ge o bona dilo tše di direga lehono, le wena o tlo bona gore seo Beibele e se boletšego ke nnete.
Seo se ra gore’ng? Se ra gore e se kgale Mmušo wa Modimo o tlo tliša diphetogo tše dikgolo tšeo di tlago go dira gore batho ba ipshine ka bophelo mo lefaseng. (Luka 21:36) Ka Beibeleng, Modimo o re o tlo direla batho dilo tše dibotse mo lefaseng e le gore ba tle ba ipshine ka bophelo. Ekwa ka tše dingwe tša dilo tšeo.
GO TLO BA LE PUŠO E BOTSE
DANIELE 7:14 e re: “[Jesu] a newa pušo, seriti le mmušo, gore batho ba merafo, ditšhaba le maleme ka moka ba mo hlankele. Pušo ya gagwe ke ya neng le neng, yeo e ka se kego ya fedišwa gomme mmušo wa gagwe ke wo o ka se kego wa senywa.”
Seo se ra gore’ng? Se ra gore o ka tla wa thabela bophelo ge Mmušo wa Modimo o tla be o buša mo lefaseng. Kgoši ya Mmušo woo e tla be e le morwa wa Modimo, e lego Jesu.
BATHO GA BA SA TLO BABJA
JESAYA 33:24 e re: “Ga go na modudi yo a tla rego: ‘Ke a babja.’”
Seo se ra gore’ng? Se ra gore o ka se sa lwala goba wa golofala, o tlo phela go ya go ile.
GO TLA BA LE KHUTŠO YA SA RURI
PSALME 46:9 e re: Modimo o tla “fediša dintwa go fihla pheletšong ya lefase.”
Seo se ra gore’ng? Se ra gore go ka se sa ba le dintwa le masetlapelo ao a bakwago ke dintwa.
LEFASE LE TLO TLALA KA BATHO BA GO LOKA
PSALME 37:10, 11 e re: “Yo kgopo o tla be a se sa le gona . . . ba boleta bona e tla ba beng ba lefase.”
Seo se ra gore’ng? Se ra gore mo lefaseng go ka se sa ba le batho ba babe, go tlo šala feela batho bao ba kwago Modimo.
LEFASE KA MOKA E TLO BA PARADEISE
JESAYA 65:21, 22 e re: “[Batho] ba tla aga dintlo ba dula go tšona; ba tla bjala dirapa tša merara ba ja dienywa tša tšona.”
Seo se ra gore’ng? Se ra gore lefase ka moka e tlo ba le lebotse. Modimo o tlo araba dithapelo tša rena tša gore thato ya gagwe e direge “mo lefaseng.”—Mateo 6:10.
You May Also Like
DIPOTŠIŠO TŠA BEIBELE DI A ARABJA
Mmušo wa Modimo o tla Phetha Eng?
Ithute seo o ka se letelago ge mmušo wa Modimo o tla be o buša lefase.
