MOKGADITSWANE wa thorny devil (Moloch horridus) wa kua Australia o kgona go monya meetse kgoding le santeng yeo e thapilego. Ke moka o dira gore meetse ao a ye molomong gore o a nwe. O dira seo bjang? Sephiri se ka ba se letše letlalong leo le makatšago la mokgaditswane wo.

Ela hloko: Letlalo la mokgaditswane wa thorny devil le na le magapi. Borathutamahlale ba bangwe ba nagana gore meetse ao a tsenago magaping a sepela letlalong la makgwakgwa la mokgaditswane wo, ke moka a tsena mekerong goba mašobaneng ao a lego magareng ga magapi. Mekero ye e a tsenelana ke moka ya iša meetse ka mathoko a molomo wa mokgaditswane wo.

Eupša mokgaditswane wo o kgona bjang go monya meetse kgahlanong le matlakgogedi, go tloga maotong go ya mmeleng wa ona go fihlela a tsena molomong? Le gona, o kgona bjang go monya meetse moo go thapilego ka go fogohla mpa ya ona?

Go bonala banyakišiši ba utolotše sephiri sa mokgaditswane wa thorny devil. Mekero yeo e lego letlalong la ka ntle la mokgaditswane wo e kgokagantšwe ka diphaephe go ya mekerong e mengwe yeo e lego letlalong la ka gare. Kagego ya mekero ye e kgontšha meetse go namelela gabonolo go ya mmeleng, e lego tiragalo e makatšago ya gore mašobana a manyenyane a monye meetse kgahlanong le matlakgogedi. Letlalo la mokgaditswane wo le šoma bjalo ka sepontšhe.

Janine Benyus e lego mopresidente wa Mokgatlo wa go Ekišetša Diphedi, o boletše gore, go ekišetša diphedi tšeo di monyago meetse go ka thuša boradientšineare go hlama sedirišwa seo se ka kgonago go monya meetse ao a lego moyeng e le gore meago e be yeo e fodilego le gore go hwetšwe meetse a go nwa.

O nagana eng? Na letlalo la mokgaditswane wa thorny devil leo le kgonago go monya meetse le bile gona ka tlhagelelo? Goba na le hlamilwe?