Mokgatlo wa Lefase wa tša Maphelo o akanyetša gore ge ngwaga wa 2035 o fihla, batho ba dimilione tše 24 ngwaga le ngwaga ba tla be ba swerwe ke kankere. Ye ke koketšego ya mo e ka bago 70 lekgolong go feta palo ya bao ba swerego ke kankere lehono, bao go akanyetšwago gore ke ba fetago dimilione tše 14. Go akanyetšwa gore seripagare sa palo ye se tla bakwa ke mokgwa wa bona wa bophelo, o bjalo ka go nwa kudu, go se dire selo, go nona kudu, go tšhungwa ke letšatši le go kgoga.

Ka morago ga go tšweletšwa ga bohlatse, mmušo wa Brithania o ile wa botšološiša gore go tla bjang gore bolwetši bja bogafsi bja dikgomo bjo bo swarago batho bo phatlalale ka dilo tše bjalo ka tšhelo ya madi. Setho sa Palamente Andrew Miller, se ile sa re, “Re ile ra tshwenyega kudu ge re ekwa bohlatse bja gore bolwetši bjo bjo bo sa alafegego bo sa dutše bo le kotsi kudu setšhabeng.” O tlaleleditše ka gore: “Re ile ra botšwa gore bolwetši bjo bo ka phatlalala ka tšhilafalo ya madi le ya ditho tše dingwe tša mmele tšeo go neelwago ka tšona.”

Nyakišišo yeo e tšerego nywaga e 11 yeo e dirilwego go batho ba e nyakilego go ba ba 63 000 ba kua Norway, e šišinya gore kgateletšego ya monagano e ka bea batho kotsing ya go swarwa ke bolwetši bja pelo ka tekanyo ya 40 lekgolong. Mokgatlo wa European Society of Cardiology o ile wa tsopola mantšu a mongwadi yo mongwe wa nyakišišo ye ao a rego kgateletšego ya monagano ga e bake feela dihomoune tša kgateletšego tšeo di feleletšago ka bolwetši bja pelo eupša gape e šitiša bokgoni bja motho bja go diriša keletšo yeo e ka kaonefatšago boemo bja gagwe bja tša maphelo.

Borathutamahlale ba nyakišiša ka dikotsi tša muši o šalelago wa disekerete, woo o bakwago ke mašalela a ge motho a kgoga mafelong a bodulo, diphapošing tša dihoteleng le dikoloing. Go oketšega ga mašalela a disekerete go ka ba kotsi ka morago ga nako e itšego.