O ka Kaonefatša Boemo bja Gago bja tša Maphelo

RUSTAM, yo a dulago Russia, o dula a swaregile. Nakong e fetilego, o be a ena le mekgwa yeo e beago boemo bja gagwe bja tša maphelo kotsing eupša o ile a lemoga gore mekgwa yeo e be e mo gobatša. O ile a kgaotša go kgoga le go nwa bjala ka mo go feteletšego. Lega go le bjalo, matšatši a mantši ao a bego a a fetša a le pele ga khomphutha ya gagwe a be a dira gore a ikwe a le borokwana.

Gaešita le ge Rustam a be a thoma mošomo ka iri ya seswai mesong, o be a sa nape a phafoga go ba go fihla ka iri ya lesome gomme o be a babja gantši. Ka baka leo o ile a fetoša tsela ya gagwe ya go dira dilo. Ka mafelelo afe? O bega gore: “Nywageng e šupago e fetilego, ga se ka ka ka tšea matšatši a fetago a mabedi a go ikhutša ka ngwaga ka baka la bolwetši. Ke ikwa gabotse—ke phafogile e bile ke phakgame—gomme ke thabela bophelo!”

Ram, mosadi wa gagwe le bana ba bona ba babedi ba banyenyane ba dula Nepal. Tshepedišo ya ditšhila ga e gona motsaneng wo ba dulago go wona, gomme lefelo leo le tletše menang le dintšhi. Nakong e fetilego, Ram le lapa la gagwe gantši ba be ba tshwenywa ke mathata a tša go hema le malwetši a mahlo. Le bona ba ile ba dira diphetogo tšeo di ilego tša kaonefatša boemo bja bona bja tša maphelo kudu.

Laola Boemo bja Gago bja tša Maphelo!

Batho ba bantši ba palelwa ke go bona kgokagano magareng ga mekgwa ya bona le boemo bja bona bja tša maphelo, go sa šetšwe gore ba a diila goba ke bahumi. Ba ka lebelela go ba le boemo bjo bobotse bja tša maphelo e le taba yeo e diregago ka sewelo goba e le yeo e lego ka kua ga matla a bona. Pono e bjalo e kotsi e dira gore batho ba bantši ba se ke ba kaonefatša boemo bja bona bja tša maphelo le go phela bophelo bjo bo tšweletšago kudu.

Ge e le gabotse, go sa šetšwe boemo bja gago bja tša ditšhelete, go na le megato ya motheo yeo o ka e gatago bakeng sa go šireletša le go kaonefatša kudu boemo bja gago le bja lapa la gago bja tša maphelo. Na go dira bjalo go na le mohola? Go bjalo e le ruri! O ka kaonefatša bophelo bja gago gomme wa phema go bo fokotša go sa nyakege.

Batswadi, ka mantšu le ka mohlala, ba ka ruta bana ba bona mekgwa e mebotse yeo e tla feleletšago ka boemo bjo bobotse bja tša maphelo. Nako e oketšegilego yeo ba e fetšago le tšhelete yeo e akaretšwago di tla putswa ka go fokotšega ga malwetši, nako yeo e fetšwago ke bolwetši le tšheletše yeo e dirišwago go lefelela dikoloto tša tša kalafo. Bjalo ka ge polelwana e bolela, Thibela bolwetši e phala kalafo.

Dihlogong tše di latelago, re tla sekaseka ditsela tše hlano tša motheo tšeo di thušitšego Rustam, Ram le ba bangwe ba bantši. Le wena di ka go thuša!

[Seswantšho go letlakala 3]

Rustam

[Seswantšho go letlakala 3]

Ram le lapa la gagwe ba ga meetse a hlwekilego a go nwa