Botšofadi bo ka se go Palediše go Gwerana le Modimo

Ka ge go anega Olavi J. Mattila

“Na o be o tseba gore o ka hwetša therešo ka Mmopi?” Yo mongwe wa Dihlatse tša Jehofa o kile a mpotšiša potšišo yeo gomme ka šala ke naganišiša. Ke be ke na le nywaga ya ka godimo ga e 80 ka nako yeo e bile ke be ke tseba batho ba go tuma, gaešita le baetapele ba dipolitiki. Lega go le bjalo, na ruri ke be nka kgona go tseba Modimo gomme ka ba mogwera wa gagwe ke šetše ke gotše ka tsela yeo?

KE BELEGWE ka October 1918 kua Hyvinkää, Finland. Ge ke be ke sa le yo monyenyane, ke ile ka thoma go šoma polaseng. Lapa lešo le be le ruile dikgomo, dipere, dikgogo le maganse. Ke ile ka ithuta go šoma ka thata le go ikgantšha ka mošomo wa ka.

Ge ke dutše ke gola, batswadi ba ka ba ile ba nkgothaletša go phegelela thuto. Ge ke šetše ke godile ka mo go lekanego, ke ile ka tloga gae ka ya kholetšheng. Ke ile ka ba ka tsenela dipapadi tše di fapafapanego gomme ka tlwaelana le modulasetulo wa Mokgatlo wa Finnish Athletic, e lego Urho Kekkonen. Ke be ke sa tsebe gore ka letšatši le lengwe Morena Kekkonen o tla ba tonakgolo ya Finland gomme ka morago ya ba mopresidente wa naga, e lego mediro yeo a e dirilego ka nywaga e 30. Le gona, ke be ke sa tsebe gore o be a tla kgoma bophelo bja ka kudu.

Go Tuma le go ba le Matla

Ka 1939, Finland le Soviet Union di ile tša thoma go se kwane. Ngwageng wona woo ka November, ke ile ka laelwa gore ke tsenele bošole. Mathomong ke be ke tlwaetša mašole gomme ka morago ke ile ka ba molaodi wa madira a dirišago motšhene wa go thuntšha. Go be go lwelwa Karelia, e lego selete seo se lego mollwaneng wa Finland le Soviet Union. Selemong sa 1941, ge re be re le ntweng kgauswi le toropo ya Vyborg, ke ile ka gobatšwa o šoro ke dikolo gomme ka išwa bookelong bja mašole. Dikgobalo tše di ile tša dira gore ke se hlwe ke sa ya ntweng.

Ka September 1944, ke ile ka tlogela bošole gomme ka boela kholetšheng. Ke ile ka tšwela pele ke phegelela dipapadi tše di fapafapanego. Ke ile ka thopa sefoka nageng ka makga a mararo, ka thopa sefoka lebelong la go neeletšana ka makga a mabedi gomme ka thopa sefoka gatee lebelong leo re tšamago re tshela dilo. Ke ile ka ba ka hwetša lengwalo la yunibesithi thutong ya thekinolotši le ya tša boiphedišo.

Ka yona nako yeo, Urho Kekkonen o be a na le tutuetšo e matla dipolitiking. Ka 1952, nakong ya ge e be e le tonakgolo, o ile a nkgopela gore ke šome bjalo ka motseta kua China. Ge ke be ke le fao, ke ile ka kopana le bahlankedi ba mmalwa ba mmušo go akaretša le Mao Tse-tung, yoo ka nako yeo e bego e le moetapele wa China. Lega go le bjalo, motho wa bohlokwa kudu yo ke ilego ka kopana le yena kua China ke kgarebe e rategago, e lego Annikki, yo a bego a šoma lefapheng la Tirelo la Merero ya Dinaga Dišele ya Finland. E bile mosadi wa ka ka November 1956.

Ka morago ga ngwaga woo, ke ile ka išwa ngwakong wa botseta wa Finland kua Argentina.  Ge re be re le nageng yeo, re ile ra ba le bana ba rena ba pele, e lego barwa ba babedi. Ka January 1960, re ile ra boela Finland. Gateetee ka morago re ile ra ba le ngwana wa rena wa boraro, yena e bile mosetsana.

Maemong a Phagamego Kudu a Mmušo

Gaešita le ge ke be ke sa ka ka ba setho sa mokgatlo wa dipolitiki, ka November 1963, Mopresidente Kekkonen o ile a nkgopela gore ke be tona ya gagwe ya ditaba tša dikgwebo dinageng dišele. Nywageng e 12 yeo e ilego ya latela, ke hlanketše maemong a tshela kabineteng, ka šoma nywaga e mebedi ke le tona ya merero ya dinaga dišele. Mehleng yeo ke be ke tloga ke dumela gore mathata a lefase a ka rarollwa ka bohlale bja motho. Eupša gateetee ke ile ka lemoga gore batho ba rata maemo. Ke ile ka iponela mafelelo a šoro a go se botege le a go ba le lehufa.—Mmoledi 8:9.

Le gona, ke ile ka lemoga gore go na le batho ba bantši bao ba tlogago ba leka go kaonefatša dilo. Lega go le bjalo, mafelelong ke ile ka lemoga gore gaešita le baetapele bao ba nago le maikemišetšo a mabotse ba palelwa ke go fihlelela dipakane tša bona.

Selemong sa 1975, baetapele ba dinaga tše 35 ba ile ba tla Helsinki Sebokeng sa Polokego le Tirišano ya Kua Yuropa. Ka nako yeo, ke be ke le tona ya merero ya dinaga dišele e bile ke le moeletši wa Mopresidente Kekkonen. Ke be ke neilwe boikarabelo bja go rulaganya seboka gomme ke ile ka kopana le baetapele ka moka ba dinaga bao ba bego ba tlile sebokeng se.

Matšatšing ao, tsebo yeo ke e hweditšego sekolong e ile ya lekwa kudu. Go fo dira gore bašomi ba dumele go dula ka tsela e swanetšego go be go le thata! Lega go le bjalo, ke ile ka lemoga gore seboka se, gotee le diboka tše dingwe tše di ilego tša latela, di kgathile tema go kaonefatšeng ditshwanelo tša batho le go dira gore bao ba lego matleng a taolo ba kgone go kwana.

Go Lemoga Gore ke Nyaka Dilo tša Moya

Ka 1983, ke ile ka rola modiro gomme ka boela Fora, moo morwedi wa ka a bego a dula gona. Ke moka ra welwa ke masetlapelo. Ka November 1994, go ile gwa hwetšwa gore Annikki o na le kankere ya matswele. Ka wona ngwaga woo, ke ile ka ikhwetša ke beeleditše tšhelete mokgweng wo o bego o na le boradia. Ke katane ka thata bophelong bja ka ka moka gore ke dule ke na le leina le lebotse. Eupša phošo ye e tee e ile ya ntshenya leina.

Bophelong bja ka ka moka ke be ke kopana le Dihlatse tša Jehofa. Le ge ke be ke thabela diketelo tša bona e bile ke amogela le dimakasine tša bona, ke be ke swaregile kudu e bile ke se na nako ya dilo tša moya. Lega go le bjalo, ka ngwaga wa 2000, ke be ke hlokometše Annikki, yo a bego a dutše a lwantšhana le kankere. Ka letšatši le lengwe ka September 2002, ke ile ka etelwa ke yo mongwe wa Dihlatse tša Jehofa. O ile a botšiša potšišo yeo ke boletšego ka yona mathomong  a sehlogo se. Ke ile ka ipotšiša gore: ‘Na ruri go a kgonega go ithuta therešo ka Modimo? Na go gwerana le yena go a kgonega?’ Ke ile ka gonyolla Beibele ya ka mo e sa lego ke e bea gona, e be e tletše lerole gomme ka thoma go ba le dipoledišano tša Mangwalo le Dihlatse.

Ka June 2004, mosadi wa ka yo ke mo ratago o ile a hlokofala gomme ka itšhalela ke nnoši. Go ba gona, bana ba ka ba be ba nkhomotša kudu. Eupša ke be ke sa dutše ke ipotšiša gore go direga eng go rena ge re ehwa. Ke ile ka botšiša baruti ba babedi ba Malutere. Ba ile ba fo nkaraba ka gore: “Hei, dipotšišo tša gago di thata.” Karabo ya bona ga se ya ka ya nkgotsofatša. Ke moo ke ilego ka napa ke lemoga gore ke nyaka dilo tša moya.

Ge ke dutše ke ithuta Beibele le Dihlatse, ke be ke hwetša tsebo e nepagetšego yeo ke bego ke e nyoretšwe. Ka mohlala, Beibele e hlalosa gore lehu le swana le go robala le gore bahu ba tla tsošetšwa mo lefaseng. (Johane 11:25) Taba ye e ntirile gore ke be le kholofelo gomme e nkhomoditše kudu.

Go se go ye kae ke ile ka bala Beibele ka moka ga yona ke nnoši. Le lengwe la mangwalo ao a ilego a nkgahla ke Mika 6:8, e rego: “Ke eng seo Jehofa a go kgopelago sona ge e se go bontšha toka, go rata botho le go ba le boipoetšo ge o sepela le Modimo wa gago?” Kgopolo yeo e bohlale le e bonolo e ile ya nkgahla. E ile ya ba ya bontšha kamoo Jehofa Modimo e lego motho yo lerato le wa toka ka gona.

Ke Bile le Kholofelo ya Bokamoso

Ge ke be ke dutše ke ithuta therešo ka Modimo, tumelo ya ka le kholofelo go yena di ile tša gola. Segwera sa kgonthe le Mmopi wa ka se be se gola! Ke ile ka kgahlwa ke mantšu a gagwe ao a begilwego go Jesaya 55:11 e rego: “Le lentšu la ka le le tšwago molomong wa ka le tla ba bjalo. Le ka se boele go nna le le feela, eupša le tla dira seo se nkgahlago, la atlega ka seo ke le rometšego sona.” Ruri Modimo o be a šetše a phethagaditše dikholofetšo tša gagwe go fihla ka nako ye, e bile o tla phethagatša tša nakong e tlago. O tla phethagatša seo mebušo ya batho gotee le diboka tša yona tše dintši tša dipolitiki di paletšwego ke go se phethagatša. Ka mohlala, Psalme 46:9 e re: “O fediša dintwa go fihla pheletšong ya lefase.”

Go ya dibokeng tša Dihlatse tša Jehofa go nkhotše kudu. Ke moo ke ilego ka bona lerato la kgonthe la Bokriste leo le hlaolago balatedi ba kgonthe ba Jesu. (Johane 13:35) Lerato le le feta kgole moya wa botšhaba gomme ga le gona dipolitiking le dikgwebong tša lefase le.

Tokelo e Kgolo Kudu

Ga bjale ke na le nywaga ya ka godimo ga e 90 gomme go ba yo mongwe wa Dihlatse tša Jehofa ke tokelo e kgolo kudu yeo nkilego ka ba le yona. Seo ke bego ke se nyoretšwe moyeng se ile sa kgotsofatšwa. Ke bile le tokelo ya go ithuta ka morero wa bophelo le therešo ka Modimo.

Le gona ke thabela gore gaešita le ge ke šetše ke godile ka tsela ye, nka tšea karolo ka mafolofolo medirong ya Bokriste. Le ge ke ile ka šoma le batho ba bantši bao ba neilwego matla gomme ka rwala maikarabelo a mantši bophelong, ga go na selo seo se ka bapetšwago le tokelo ya go tseba Mmopi, Jehofa Modimo le go ba mogwera wa gagwe. Ke a mo leboga e bile ke a mo tumiša ge a mphile sebaka se sa gore ke be yo mongwe wa “bašomigotee” le yena. (1 Bakorinthe 3:9) Botšofadi bo ka se go palediše go gwerana le Mmopi, Jehofa Modimo!

[Seswantšho go letlakala 26]

Ke na le Mopresidente Kekkonen le Mopresidente Ford wa United States sebokeng sa Helsinki ka 1975

[Seswantšho go letlakala 26]

Ke na le Mopresidente Kekkonen le moetapele wa Soviet e lego Brezhnev

[Seswantšho go letlakala 27]

Ke tšea karolo ka mafolofolo medirong ya Bokriste

[Methopo ya Diswantšho go letlakala 26]

Lower left: Ensio Ilmonen/Lehtikuva; lower right: Esa Pyysalo/Lehtikuva